Бээжинд болох тэмдэглэлт ажиллагаанд 49 орны төлөөлөгч оролцоно

Дундадын албаны тал 8 дугаар сарын 25-нд мэдээ нийтэлж, одоогийн байдлаар 49 улс орон Дундад улсын урилгыг хүлээн авч, 9 дүгээр сарын 3-ны тэмдэглэх арга хэмжээнд оролцохоор байгааг мэдээллээ. Гадаадын төлөөлөгчдөд Төрийн тэргүүд, засгийн газрын тэргүүд зэрэг гадаадын 30 удирдагч, засгийн газрын өндөр дээд 19 албан тушаалтан, олон улсын болон бүс нутгийн байгууллагын хариуцлагатай 10 албан тушаалтан багтаж байна.

Дундадын Төрийн зөвлөлийн мэдээллийн алба 25-нд Дундадын ард түмний Японыг эсэргүүцсэн дайн болон Дэлхийн фашизмын эсрэг дайны ялалтын 70 жилийн ойг тэмдэглэх арга хэмжээний талаар хэвлэлийн бага хурал хийлгэж, Дундад улсын ГХЯ-ны дэд сайд Жан Мин холбогдох байдлыг танилцууллаа. Тэрээр хэлэхдээ: – Бид Дундадын ард түмний Японыг эсэргүүцсэн дайны ялалтын төлөө алтан амиа өргөж, үнэтэй хувь нэмэр оруулсан олон улсын хүндэт төлөөлөгчдөд тусгай урилга илгээсэн. Дундадын 56 үндэстэн бол энэрэнгүй нигүүлсэхүй сэтгэлт үндэстнүүд юм. 70 жилийн өмнө холын замд алжаалгүй Дундад улсад ирж, Дундадын ард түмний Японыг эсэргүүцсэн дайнд шууд оролцсон болон дэмжиж оролцсон олон улсын зарим найрсаг сэтгэлт хүмүүс, тэдний зарим нь дайны талбарт алтан амиа алдаж байсныг Дундадын ард түмэн үүрд мөнх санан дурсаж явах болно гэжээ.

Тус хэвлэлийн бага хуралд Дундадын Төрийн зөвлөлийн мэдээллийн албаны дэд дарга Гүө Вэйминь хэлэхдээ, \”Дундад улсын дарга Ши Жиньпин цэргийн парадын өмнөх өдөр ахмад дайчид, жанжин генералуудад дурсгалын одон гардуулна. Тэмдэглэх арга хэмжээний бэлтгэл ажил урагштай явагдаж, үндсэндээ бэлэн боллоо\” гэжээ.

Тэмдэглэх арга хэмжээний 70 жилд зориулсан цэргийн парадыг удирдах албаны дэд дарга, жанжин штабын байлдааны хэлтсийн дэд дарга Чюй Рүй хэлэхдээ, гадаадын 17 жагсаалын баг, төлөөлөгчдийн баг парадад оролцож, 1000 шахам хүн төрөл ангилсан жагсаалд оролцох бөгөөд одоо бүгд сургуулилтын баазад ирээд байна гэжээ.

Дундадын Төрийн зөвлөлийн цагаачдын албаны дэд дарга Хэ Яфэй хэлэхдээ, 9 дүгээр сарын 3-нд 120 гаруй улс орон бүс нутгаас Дундадын 1779 цагаач иргэн Бээжинд болох ёслолыг үзэх юм. Үүгээр нам, засгийн газар цагаачдын оруулсан түүхэн гавьяа зүтгэлийг бүрэн үнэлж байгаагаа харуулсан бөгөөд гадаадад тархан суурьшсан өргөн олон цагаачдыг сайн сайхан уламжлалаа түгээсээр байхыг уриалж байна гэжээ.