УИХ-ын Төрийн байгуулалтын байнгын хорооны дарга Ц.Сандаг-Очир сэтгүүлчдэд мэдээлэл өглөө.
Тэрээр “Өчигдөр өглөө Цэцийн Их суудлын хурал эхэлхээс өмнө бүх асуудал тодорхой байсан учраас бид бүхэн үдээс хойш хуралдааныг хаяж гарсан. Өглөө хуралдаан дээр олон асуудлыг тавьсан. Асуудлуудыг огт авч хэлэлцээгүй. Цэцийн Их суудлын хуралдаан ил тод нээлттэй болох ёстой. Гэтэл сэтгүүлчдийг мэдээллээр хангахгүй байсан. Хаалттай явагдсан.
Маргаан хянан шийдвэрлэж байгаа Цэцийн гишүүнээс татгалзах асуудлыг тавьсан. Энэ асуудлыг огт хүлээж аваагүй.
Х.Булгантуяа гишүүнийг өмгөөллөөр хангаагүй. Үүнийг хуульчид шүүмжилж байгаа. Ямар ч шүүх хуралдаанд өмгөөлөгчөөр хангадаг. Гэхэд өмгөөлөгчөөр хангаагүй. Энэ мэт асуудлаас бид Цэцийн шийдвэр гарчихсан юм байна гэж үзсэн үүднээс хурлын орхисон. Хуульд гуравхан тохиолдолд л шууд Дунд суудлын хуралдааныг алгасаж Их суудлын хуралдаанаа хийнэ гэж заасан байхад яаран сандран Их суудлын хуралдаанаа хуралдуулдаг нь ямар учиртай юм бэ. Өнөөдөр Монгол Улсад онц байдал яригдаагүй байхад Их суудлын хуралдаанаар хэлэлцэж байгаа нь хууль бус.
Цаашдаа процесс яаж явахыг мэдэхгүй байна. Цэцийн дүгнэлт гар дээр албан ёсоор ирээгүй байна. Ерөнхийлөгчийн хоригийг авч хэлэлцэх асуудлыг даргын дэргэдэх зөвлөлөөс дэмжсэн. Өнөөдрийн Төрийн байгуулалтын байнгын хороогоор хэлэлцүүлэх асуудлыг ярьсан. Гэхдээ хэлэлцэх асуудалд байгаагүй учраас өнөөдөр дахиж Төрийн байгуулалтын байнгын хороо, Хууль зүйн байнгын хороо хуралдана.
Ерөнхий сайдыг огцруулах эрх гишүүдэд бий. МАН хоёр хуваагдчихсан явааг та бүхэн мэдэж байгаа. Энэ асуудал гэхдээ АН-аас хамаарна. АН өмнөх байр суурь дээрээ байгаа эсэхийг мэдэхгүй байна.
Цаашид Ерөнхий сайдыг огцруулах асуудлыг УИХ-ын чуулганы хуралдааны дэгийн тухай хуулиа баримталж Байнгын хороо хэлэлцэх хэрэгтэй юм уу, хэрэггүй юм уу гэдгийг эргэж харах хэрэгтэй болж байна” гэв.
