УИХ-ын чуулганы өнөөдрийн /2025.11.05/ нэгдсэн хуралдаанаар УИХ-ын дэд дарга Х.Булгантуяаг огцруулах асуудлыг хэлэлцэж эхэллээ.
УИХ дахь МАН-ын бүлгийн дарга Ж.Батжаргал УИХ-ын дэд дарга Х.Булгантуяаг огцруулах тухай МАН-ын бүлгийн саналыг дэмжин, шийдвэрлэж өгөхийг хүсэв.
Хэлэлцэж буй асуудалтай холбоотой АН-ын бүлгийн дэд дарга Х.Тэмүүжин үг хэллээ. Тэрбээр, АН-ын бүлэг өчигдөр хуралдаад, Үндсэн хуулийн цэцийн Их суудлын хуралдааны шийдвэрт дурьдагдсан зүйлүүдийг УИХ хүлээн зөвшөөрөх ёстой гэж АН-ын бүлэг үзсэн. Хүлээн завшөөрч буйтай холбоотой дараах асуудал үүсэж байна.
Ерөнхий сайдыг огцруулах тухай УИХ-ын 95-р тогтоолыг цаашид хэрхэх вэ гэдэг асуудал яригдана. Үндсэн хуулийн цэцийн дүгнэлт УИХ-д ирсэн. Үндсэн хуулийн 66-р зүйлд, Үндсэн хууль зөрчсөн эсэх маргаантай асуудлыг Цэцээр хэлэлцээд дүгнэлт гаргаж, УИХ-д оруулна. Дүгнэлттэй холбоотой оруулсан асуудлыг УИХ хүлээж аваагүй бол Цэц дахин хянан үзэж, эцэслэн шийдвэрлэнэ гэсэн зохицуулалттай.
Өнөөдрийн хуралдаан болон өмнөх байнгын хороодын хуралдаанаар УИХ-ын 95-р тогтоолыг хэрхэн шийдвэрлэх талаар яригдаагүй, Үндсэн хуулийн 66-р зүйлд зааснаар УИХ ямар шийдвэр гаргах талаар яригдаагүй.
УИХ-ын шийдвэртэй холбоотойгоор УИХ-ын олонх хүрэлцэн ирж саналаа ил гаргах замаар шийдвэрлэх ёстой. Тэгж байж Цэцийн шийдвэрийг хүлээж авсан, аваагүй гэдэг асуудал хөндөгдөнө.
2025 оны 10-р сарын 22-ны өдрийн Их суудлын хуралдааны дүгнэлтийг хүлээн зөвшөөрөх нь хууль ёсонд нийцнэ гэж үзсэн учир УИХ хүлээн ажлаа хийх ёстой. Энэ ажлаа хийгээгүй үл ойлголцсон байдалтай байгаа учир хэлэлцэж буй асуудлаар АН-ын бүлэг таван өдрийн завсарлага авахыг хүсэж байна.
АН-ын бүлгийн хүсэлтийг хуралдаан даргалагч, АН-ын бүлгийн дарга Б.Пүрэвдорж хангаж, таван өдрийн завсарлага өгснөөр УИХ-ын дэд дарга Х.Булгантуяаг огцруулах асуудал хойшлогдов.
