Хүнс, хөдөө аж ахуй, хөнгөн үйлдвэрийн сайд Ж.Энхбаяр МАН-ын даргын сунгаад өрсөлдөхгүй гэдгээ мэдэгдэв.
Тэрээр “МАН-ын улс төрийн дээд шийдвэр гаргадаг Их хурал 2025 оны арваннэгдүгээр сарын 16, 17-ны өдөр болно. Уг хурлаар намын даргын асуудал болон намын дүрмийн өөрчлөлтийн талаар хэлэлцэж, шийдвэрлэнэ. Хүн хүсч өөрөө нэр дэвшдэг алба биш. Тийм ч албан тушаал биш. Намын бодлого гаргаж, олон дунд судалгаа явуулж, санал хүсэлтийг нэгтгэнэ. Үүний дараагаар энэ цаг үед улс оронд тулгамдаж байгаа нийгэм, эдийн засгийн зорилтыг хэрэгжүүлэхэд энэ улстөрч намыг авч явах бололцоотой гэдэг бодлого гаргадаг.
Тэр журмын дагуу явна. Тэрнээс би болъё гэж авдаг албан тушаал ч биш, цаг ч биш. Миний хувьд залуу үеэ дэмжинэ. Би ямар нэгэн сонгуулийн өрсөлдөөнд оролцохгүй.
Намын үнэт зүйл хэвээрээ, үзэл бодлын зөрүү гараагүй, гишүүд эв нэгдэлтэй байгаа. Эрх мэдлийн төлөөр өөр өөр байр суурийн асуудал үүсч, ҮХЦ дээр хүрч байж асуудлын ард гарлаа. Одоо 21 дүгээр зуун. Тийм учраас улс орныг аваад явах, улс орноо эдийн засаг, нийгмийн шинэ түвшинд гаргах, шинэ эдийн засагт дасан зохицох чадвартай хүн хэрэгтэй байна. Намын Бага хурлаасаа Удирдах зөвлөлөө байгуулж, МАН улс төрийн шинэ өргөө өрнө” гэв.
