Ардчилсан намаас 2026 оны нэгдүгээр сарын 29-ний Пүрэв гарагийн 11:00 цагт Төрийн ордны III давхарт “4:11 мэдээллийн цаг” хэвлэлийн бага хурлыг зохион байгуулж байна.
Энэ удаагийн хэвлэлийн бага хурлаар:
Бизнесийн орчны доройтлын талаарх тоо баримт,Эдийн засгийн эрх чөлөөний тухай хуулийн хэрэгцээ шаардлага; Цаг үеийн нөхцөл байдал ба Ардчилсан намын улс төрийн байр суурь;Нээлттэй, цэгцтэй Ардчилсан намын аяны нээлт зэрэг асуудлаар мэдээлэл өгөх юм.
Ардчилсан Намын Ерөнхийн нарийн бичгийн даргын албан үүргийг түр орлон гүйцэтгэгч Д.Амарбаясгалан: Сүүлийн гурван жилийн хугацаанд төлөвлөсөн байдлаар 70 гаруй их наяд төгрөгийг захиран зарцуулсан байна.
Гэвч эрх баригчид өнөөдрийн байдлаар нэг ч цахилгаан станцыг ашиглалтад оруулаагүйгээр барахгүй өвлийг ард иргэдийнхээ нуруунд үүрүүлж, тогийн хязгаарлалт хийж байна. Энэ нь үнэхээр зохимжгүй үйлдэл юм.
Үүнээс гадна маш их хэмжээний төсвийг захиран зарцуулж байгаа хэдий ч нийгэм, эдийн засагт олигтой өөрчлөлт гарахгүй байна. 30 гаруй сайдтайгаар “данхар” төрийг бий болгож байгаад нь Ардчилсан намын бүлгийн гишүүд шүүмжлэлттэй хандсан.
Иймд дэд сайд нарыг томилсон асуудлаа эгүүлэн харахгүй бол Засгийн газарт хариуцлага тооцох асуудлыг тавьсан. Хэрэв Т.Доржханд, Б.Чойжилсүрэн нарыг ойрын хугацаанд сайдаас нь эгүүлэн татахгүй бол үндэсний хэмжээнд ЗГ-т хариуцлага тооцох акцыг өрнүүлнэ гэдгээ хариуцлагатайгаар мэдэгдэж байна.
