Ардчилсан намын “4:11 мэдээллийн цаг” хэвлэлийн бага хурлын үеэр, Ардчилсан Намын Нарийн бичгийн дарга, УИХ дахь Ардчилсан Намын бүлгийн зөвлөх А.Батпүрэв “ 2016-2025 онд буюу эрх баригч МАН завсаргүй засаглаж байгаа энэ хугацаанд нийтдээ 62,202 бизнес үүдээ хааж, 104.454 шинээр бүртгэгдсэн боловч 60 хувь нь хаагдаж ердөө 40 хувь нь үлджээ.
Гэтэл ОУ-ын хөгжингүй орнуудын дунджаар эсрэгээрээ шинээр бий болж буй бизнесүүдийн 65 хувь нь тогтвортой үйл ажиллагаа явуулж, үлдсэн хувь нь л эрсдэлд ордог байна.
Үүний шалтгаан нь бусад оронд зах зээлийн өрсөлдөөн, бизнес, менежментийн ур чадвар, технологи гэсэн жам ёсны хүчин зүйл нөлөөлдөг бол Монгол Улсад төрийн дарамтаас болж байна.
Өөрөөр хэлбэл:
-
Өндөр хүүтэй,
-
Хүртээмжгүй санхүүжилт,
-
Татвар, авлигын дарамт,
-
Эрчим хүч дэд бүтцийн найдвартай бус байдал,
-
ААН-үүдийг хааж боосон зохицуулалттай холбоотой.
Эрчим хүч, дэд бүтцийн найдваргүй байдал нь яагаад бизнесийн үйл ажиллагаанд нөлөөлдөг болохыг бид сүүлийн хэдэн өдөр харж байна. Жижиг үйлдвэрүүдийн тоног төхөөрөмж олон удаа унаснаас болж техникүүдэд нь доголдол үүсэж, шатаж, улмаар тогтвортой үйл ажиллагаа явуулахад нь сөргөөр нөлөөлж байна. Өдөрт хоёр удаа тог тасрахад л орлогынхоо талаас илүүг алдаж байна.
Тэгэхээр жижиг, дунд бизнесүүд чинь Б.Чойжилсүрэн сайдын 100 хоногт тэсэж үлдэх үү. Маш хэцүү харагдаж байна. Өөрөөр хэлбэл Монголын бизнесийн орчинд “төр” хамгийн том өрсөлдөгч болжээ.
Үүнийг өөрчлөхийн тулд олон цогц арга хэмжээ авах шаардлагатай. Гэхдээ нэн тэргүүнд “Эдийн засгийн эрх чөлөөний тухай хууль” батлагдсанаар эхэлнэ гэж Ардчилсан намын зүгээс үзэж байна” гэв.
