Яг одоо Энэтхэг, Мексик зэрэг улсуудад түүхэнд байгаагүй буюу Цельсийн 50 градус давж халж, хүмүүс гудамжиндаа ухаан алдан унаж байна. Харин Монгол нутагт маань 6-р сарын сүүлээр нойтон цас малгайлан орж, хүмүүс зузаан хувцастайгаа зусаж байгаа нь хачирхалтай.
Энэхүү эрс тэс ялгаа нь дэлхийн уур амьсгалын өөрчлөлт болон “Эл Ниньо” үзэгдлийн шууд үр дагавар юм.
Товчхондоо, агаар мандлын урсгал өөрчлөгдөж, хойд туйлын хүйтэн агаарын масс манай орныг дайран өнгөрч байгаа тул зуны дунд сард өвлийн мэт жихүүн өдрүүд үргэлжилж байна. Уур амьсгалын энэ тогтворгүй байдал зөвхөн Монголд гэлтгүй дэлхий даяар байгалийн гамшигт үзэгдлийн хэлбэрээр илэрч эхэллээ.
Цаг уур, орчны шинжилгээний газрын мэдээллээр яг өнөөдрөөс буюу 22-ны өдрөөс эхлэн хөрсөн дээр цочир хүйтрэх эрсдэл нүүрлээд байна.
Тухайлбал, Хөвсгөл, Хэнтийн уулархаг нутаг болон Туул, Тэрэлж, Хэрлэн, Онон голын хөндийгөөр ойрын шөнүүдэд -4 градус хүртэл хүйтрэх тул тариаланчид болон зусландаа гарсан иргэд дулаалга, хамгаалалтаа яаралтай базаах шаардлагатай байна. Хэдийгээр 24-ний өдрөөс эхлэн ихэнх нутгаар бага зэрэг дулаарах төлөвтэй байгаа ч уулархаг нутгуудаар 26-ныг хүртэл сэрүүхэн, тогтворгүй цаг агаар хадгалагдах нь ээ.
Байгаль цаг уурын энэхүү гэнэтийн үзэгдэл нь малын тарга хүч, газар тариалангийн гарцад ноцтой хохирол учруулж болзошгүйг албаныхан анхааруулж байна. Тиймээс хөдөө орон нутгийг зорих жолооч нар болон аялал зугаалгаар явах гэж буй иргэд цаг агаарын нөхцөл байдлыг сайтар тооцоолж, дулаан хувцастай хөдөлгөөнд оролцохыг зөвлөж байна. Дэлхийн дулаарал гэдэг нь зөвхөн “халахын” нэр биш, харин ийм гэнэтийн, эрс тэс уур амьсгалын гажуудал болохыг бид энэ зуны өдрүүдээс бэлхнээ харж байна.
