Засгийн газрын ээлжит хуралдаанаар өвөлжилтийн бэлтгэлийн талаар хэлэлцсэн байна. Нийслэлийн өвөлжилтийн бэлтгэлийн талаарх хотын дарга Б.Пүрэвдагва дараах мэдээллийг өгч, сэтгүүлчдийн асуултад хариуллаа.
Тэрбээр “Өвөлжилтийн бэлтгэл ажлыг хангах хүрээнд нийслэлд 573 төсөл хөтөлбөр хэрэгжүүлснээс гүйцэтгэл нь 83 %-д хүрсэн. Энэ өвөл 280 мянган тонн хагас кокс, 180 мянган тонн мидлингийг түлнэ. Улаанбаатар хотод 446 цэгээр түлшээ борлуулна. Эдгээр цэгүүдэд жигд түгээлтээ хийнэ. Сайжруулсан түлшний стандартыг барьж, кг-ыг байнга хянана. Аль цэгт дутагдал гарч байгааг хянаж, 200 гаруй машинаар түгээлтийг бүрэн хийнэ.
Энэ жил 5,000 айл хийн зууханд шилжлээ. Улаанбаатар хотод байгаа 270 уурын зуухны 8-ыг нь хийн зууханд шилжүүлж, агаарын бохирдлыг 5.6 хувиар бууруулж чадлаа.
Дулааны ачаалал 146 хувьтай байна. Дулааны эх үүсвэрээ нэмэх шаардлагатай. Цахилгаан 109-117 хувиар ачаалсан. Бохир усных 107 хувиар ачаалж байна. Тиймээс инженер хангамжийн ажилд гол анхаарлаа хандуулж, энэ зуныг үдлээ.
57.3 км урттай шугам сүлжээ, засварын ажил хийлээ. Бохир, цэвэр усны шугамаа засаж, 17.6 км борооны ус зайлуулах сүлжээг шинээр ашиглалтад орууллаа. Шугам сүлжээний 60 хувь нь насжилт өндөртэй болсонд 1.8 их наядыг зарцуулж ард нь гарна. Ил харагдах байдалдаа илүү их анхаарч ирснээс эрсдэлтэй нөхцөл байдал үүссэн байна.
Дулааны V цахилгаан станцын ажил 20 хувийн гүйцэтгэлтэй явж байна. Төр хувийн хэвшлийн түншлэлээр явж байгаа энэхүү төсөл 2027 онд ашиглалтад орно. Дамбадаржаагийн ДЦС-ын ажил 80 хувьтай явж байна. Бөөрөлжүүлтийн цахилгаан станц өнгөрсөн жил нойтон нүүрснээс болж гацсан учраас энэ жил 350 тонн нүүрс хатаалаа. Хоолойг шууд татдаг шинэчлэл хийлээ.
Нийтдээ 111 км зам шинээр барилаа. 31 км зам заслаа. 76 км дугуйн зам шинээр хийсэн. Ирэх жил 350 км дугуйн замын сүлжээтэй болно. Энэ өвөл 1300 нийтийн тээвэр иргэдэд үйлчилнэ. Ес хоногийн түлшний нөөцөө бүрдүүлсэн. Ирэх жил тухайн автобус хэдэн минутын дараа тухайн зогсоолд ирэх ухаалаг самбарыг буудлуудад байршуулна” гэдэг мэдээлэл өглөө.
Үргэлжлүүлэн сэтгүүлчдийн асуултад өгсөн хариултаас товчлон хүргэж байна.
Хотын дарга Б.Пүрэвдагва “Дүүжин тээврийн техникийн тестийг өчигдрөөс эхэлж хийж байна. Улсын комисст хүлээлгэж өгөх хоёр үе шаттай процесс явна.
Арванхоёрдугаар сарын 5-н гэхэд нэвтрүүлэх графиктай ажиллаж байгаа. Гэхдээ техникийн тестэд алдаа гарвал засвар үйлчилгээ хийгээд хугацаа хойшлох магадлал бий.
Би ирэх жил их багтаамжийн тээврийг заавал эхлүүлнэ. Трамвайн газар шорооны ажлыг эхлүүлэхээ гол зорилго болгон тавиад ажиллаж байна.
Хоёрдугаарт, skyshuttle гэдэг BYD-гийн хамгийн сүүлийн үеийн технологийг ирэх жил яаж ийж байгаад ажлыг нь эхлүүлэх гээд зорьж байна. 2027 ондоо багтаад ядаж 5-7 км их багтаамжийн тээврийг нийслэлчүүддээ хэрэглүүлээд үзүүлчих юм сан гэдэг зорилготой ажиллаж байна. Тэгэхгүй бол манай нийслэлчүүд 20-30 жил метро мөрөөдөж байна шүү дээ.
Цаашид олон түвшний уулзварууд хийхээр төлөвлөж байгаа. Тухайлбал, ХХААИС-ийн уулзвар, Баянбүрдийн уулзварыг дөрвөн зам болгох шаардлагатай, Нохойтой хөшөөний тэнд дөрвөн замын уулзвар хийх шаардлагатай, Нарантуулын орчимд олон түвшний уулзвар хийх шаардлагатай байгаа.
Мөн гүүрэн явган хүний гарцууд хийхээр төлөвлөж байна. Ялангуяа Яармагийн түгжрэл тэр чигээрээ гарцтай холбоотой. Энхтайваны өргөн чөлөө тэр чигээрээ гарцууд байна. Тиймээс дээгүүр нь гүүрэн байгууламж маягаар гаргахаар төлөвлөж байгаа.
Манайхан их сонин юм билээ. Нүхэн гарц хийчихээр доошоо ордоггүй. Юмны доогуур орохгүй гэдэг уламжлал гэх юм уу. Тэгэхээр манайд нүхэн гарц үр ашиг муутай юм билээ. Тэгэхээр дандаа дээгүүр гарах байдлаар шийднэ” гэв.
