Засгийн газрын ээлжит хуралдаанаас гаргасан шийдвэрийг танилцуулж байна.
Энэ үеэр малын гоц халдварт өвчинтэй холбоотой асуудал ба вакцины талаар Шадар сайд, Улсын онцгой комиссын дарга Н.Номтойбаяр дараах мэдээллийг өглөө.
Тодруулбал өнгөрсөн хугацаанд шүлхий Сат-1 өвчлөлтэй холбоотой вакцин худалдан авахад 1.5 тэрбум төгрөг зарцуулсан. Мөн ямааны годрон өвчний эсрэг вакциныг 1.5 тэрбум төгрөгөөр худалдан авах болсныг хэллээ.
Малын гаралтай өвчлөлөөс үүдэлтэй мал хорогдох болгонд татвар төлөгчдийн эх үүсвэр болсон улсын нөөцөөс хэдэн арван тэрбумаар нь мөнгө зарцуулж байгаа асуудлыг хөндөж, хамгийн гол нь урьдчилан сэргийлэх ажил чухал байгааг ярив.
Улсын онцгой комиссын дарга Н.Номтойбаяр “Шүлхий өвчний Сат-1 хэв шинжтэй холбоотой асуудал өнгөрсөн хугацаанд гарсан.
Өнөөдөр хүчин төгөлдөр үйлчилж байгаа эрх зүйн орчинд шийдвэр гаргах цаг хугацаа их орж байна.
Зөвхөн вакцин худалдан авахад 1.5 тэрбум төгрөгийг шийдэх гэж хоёр долоо хоног зарцуулдаг. Мөнгөө шийдсэний дараа тээвэр ложистикийн асуудал гардаг. Харамсалтай нь Сат-1 шүлхий өвчин гарахад тухайн өвчинд тохирсон вакцин дэлхийд байгаагүй.
БНХАУ-д шинээр вакцин үйлдвэрлэсэн байсан бөгөөд вакцин гармагц бид худалдаж авсан.
Вакцин гарах хүртэл 32 хоногийн алдагдал хүлээсэн. Энэ хугацаанд 4,167 толгой мал хорогдсон байдаг. Улмаар толгой мал бүрийн зах зээлийн үнэлгээг тооцоолж нөхөн олговор олгосон. Үүнд 6 орчим тэрбум төгрөгийг зарцуулсан байдаг.
Хорио цээр тогтоосон бөгөөд бензин тос, хүн хүчний зардал гэх мэтчилэн нийт зардал 20 орчим тэрбум болж байгаа.
Холбогдох хууль дүрэм журамд тун ойрын хугацаанд томоохон өөрчлөлт оруулахгүй бол зөвхөн шийдвэр гаргах гэж цаг хугацаа алдсанаас үүдэн түүнээс их хэмжээний хохирол амсаж байгаа.
Өнөөдөр Био комбинатад очиж ажиллана. УОК малын гаралтай өвчтэй холбоотой асуудал дээр голлон хуралдаж байна. Дараа нь эрэмбээрээ дулаан эрчим хүчтэй холбоотой асуудал дээр хуралдаж байгаа” гэлээ.
Үргэлжлүүлэн “Ямааны годрон өвчний асуудал гарахад манайд вакцин нь байгаагүй. Дээр дурдсанчлан Сат-1 шүлхий өвчин гарахад мөн вакцин байгаагүй.
Өнөөдөр ямааны годрон өвчинтэй холбоотой 1.5 тэрбум төгрөгийн үнэ бүхий вакцин худалдаж авах шийдвэрийг гаргаж байгаа.
Малын гаралтай янз бүрийн өвчин их гарах нь ээ. Энэ болгонд цаг хугацаа алддаг, вакцин нь байдаггүй асуудлыг цэгцлэх үүднээс Био комбинатын хөгжлийн бодлого төлөвлөлт дээр суух шаардлагатай.
Өнгөрсөн хугацаанд бид 330 сая орчим ам.долларын мах, махан бүтээгдэхүүнийг гадаад улсад экспортолсон. Тэгэхээр гадаад улстай хийж байгаа эдийн засгийн хамтын ажиллагаа, худалдааны асуудал ч хөндөгддөг. Малаа эрүүлжүүлэх нь маш чухал.
Малыг эрүүлжүүлэх ажлыг Био комбинатаас эхлэх ёстой.
Улсын хэмжээнд мал тооллогыг технологид суурилсан байдлаар хийхээр Засгийн газар бэлтгэл ажлыг хангаж байна. Ерөнхий сайдаас өгсөн үүрэг даалгаврын дагуу миний бие хариуцан ажиллаж байгаа. Бодит тоогоо мэдэж байж бодитой эдийн засгийн бодлого төлөвлөлтийг гаргана.
Бид нар малаа эрүүлжүүлж байж эдийн засгийн эргэлтэд оруулна. Үүнтэй холбоотойгоор томоохон эрх зүйн асуудлууд гарч ирнэ.
Төрийн хяналт шалгалт суларсантай холбогдуулан гадаадаас эх үүсвэртэй элдэв малын өвчин Монголд орж ирж байна.
Түүнчлэн малчдын хариуцлагагүй байдлаас үүдэлтэй асуудлууд бий. Энэ бүхнийг эрх зүйн орчинд тодорхойлох хариуцлагатай цаг үе иржээ.
Малаа эрүүлжүүлэх эдийн засаг, бизнесийн бүхий л таатай нөхцөлийг төр засаг боломжоороо дэмжих асуудлууд хөндөгдөнө.
Малын гаралтай өвчлөлөөс үүдэлтэй мал хорогдол болгонд татвар төлөгчдийн эх үүсвэр болсон улсын нөөцөөс хэдэн арван тэрбумаар нь алийн болгон авах вэ” гэлээ.
