“Үндэсний шуудан” сонины өнөөдрийн дугаарт Хөдөлмөр эрхлэгчдийг дэмжих санг цөлмөсөн гэх УИХ-ын эмэгтэй гишүүдийн талаар мэдээлэл дэлгэлээ.
ЖДҮХС-аас төрийн дээд албан тушаалтнууд, УИХ-ын гишүүд өөрсдийн хамаарал бүхий хүмүүстээ зээл авч өгсөн гэх хэрэг ил болоод жил гаруйн хугацаа өнгөрчээ. Гэтэл дахиад л ХЭДС-г цөлмөсөн гэх УИХ-ын гишүүдийн нэрс ил боллоо. “Үндэсний шуудан” сонин өнөөдрийн дугаартаа энэ тухай өгүүлэхдээ
“…Хөдөлмөр эрхлэлтийг дэмжих сангаас 2016-2017 онд албан тушаал, эрх мэдлээ ашиглан зориулалтын бусаар, тендергүйгээр нэр бүхий компаниудад зээл олгосон хэргээр ХХҮЕГ-ын дарга Б.Нямдаваа, хөдөлмөрийн асуудал хариуцсан дэд дарга Б.Шижиржаргал нарыг хууль хяналтын байгууллагаас шалгаж буй. АТГ болон хууль хяналтын бусад байгууллагад сар гаруй хугацаанд тасралтгүй шалгагдаж буй дээрх хоёр албан тушаалтан өнгөрсөн долоо хоногт ноцтой мэдүүлэг өгсөн байна. Тэд “Н.Номтойбаяр сайдын тушаалаар 27 аж ахуйн нэгжид тендерийн шалгаруулалтгүйгээр 2.7 тэрбум төгрөг шилжүүлсэн. Үүнд, УИХ-ын 17 гишүүн, гурван сайд, хоёр төрийн нарийн бичгийн дарга, хоёр дэд сайд, аймаг, дүүргийн хоёр засаг даргын хамаарал бүхий компани, аж ахуйн нэгжүүдэд санхүүжилт олгосон” хэмээн мэдүүлээд буйг албаны эх сурвалж онцолж байгаа. Тэгвэл бор зүрхээрээ хөдөлмөр эрхлэгч, бизнесээ өргөжүүлэхийг хичээж буй аж ахуйн бичил бизнес эрхлэгч, хөгжлийн бэрхшээлтэй иргэд, МСҮТ төгсөгчид, малчдад очих ёстой байсан 2.7 тэрбум төгрөгийг хэн гээч УИХ-ын гишүүн, өндөр албан тушаалтнууд хувааж хүртсэн гэдгийг хүргэе.
УИХ-ЫН ГИШҮҮН Б.САРАНЧИМЭГ 200 САЯЫГ НЭГ ТББ-Д, М.ОЮУНЧИМЭГ 140 САЯЫГ ГУРВАН АЖ АХУЙН НЭГЖИД ЗЭЭЛЭХЭД НЬ НӨЛӨӨЛСӨН ҮҮ
Н.Оюундарь, Б.Ундармаа, Б.Саранчимэг, М.Оюунчимэг зэрэг УИХ-ын эмэгтэй гишүүд албан тушаал эрх мэдлээ ашиглан танил тал, хамаарал бүхий компани, аж ахуйн нэгжүүддээ ЖДҮХС-гаас бага хүүтэй, их хэмжээний зээл авахад нь нөлөөлсөн байж болзошгүй хэрэг өнгөрсөн онд ил болсон. Тэгвэл энэ удаад бид Хөдөлмөр эрхлэлтийг дэмжих сангаас орон нутаг, нийслэлийн онцлог, хэрэгцээнд нийцүүлсэн зорилтот төслийн жилийн 8.4 хувийн хүүтэйгээр олгодог 40-200 сая төгрөг хүртэлх зээлийг ах дүү, өөрийн хамаарал бүхий аж ахуйн нэгжүүддээ ногоон гэрлээр шийдүүлж өгсөн байж болзошгүй эмэгтэй гишүүдийг танилцуулъя.
1.УИХ-ын гишүүн, монгол улсын их хурлын өргөдлийн байнгын хорооны дарга Мөнхөөгийн Оюунчимэг нь ХХҮЕГ- ын дэргэдэх ХЭДС-гаас “Сэрмүүн өнгө” гэх хэвлэл, хаяг, реклам, бэлэг дурсгалын чиглэлээр үйл ажиллагаа явуулдаг компанид 50 сая, “Эгшиглэн магнай” хэмээх компанид үйлдвэрлэлийн хүчин чадал нэмэгдүүлэхэд 50 сая, иргэн Б.Болорцэцэгт “Хүрээ айл” төсөл хэрэгжүүлэхэд нь 40 сая төгрөгийг тендерт оролцуулалгүйгээр шууд олгуулсан байх магадлалтай байна.
2.УИХ-ын гишүүн Наваан-Юндэнгийн Оюундарь тус сангаас Сэлэнгэ аймгийн Шаамар суман дахь “Ээж оюу сайхан” нэртэй компанид олон улсын жишигт нийцсэн авто зам засвар, авто угаалгын газар байгуулах зорилгоор 100 сая төгрөгийг олгуулахад нь нөлөөлсөн гэх хэрэгт шалгагдаж эхэлжээ.
3.УИХ-ын гишүүн Намсрайн Амарзаяа Өмнөговь аймгийн Даланзадгад хотод харьяалалтай гэх “амин хэлхээ байгаль сан”-д 123.9 сая төгрөгийг олгоход нь албан тушаал, танил талаа ашиглан нөлөөлсөн байх хэмээн атг-аас шалгаж байна.
4.УИХ-ын гишүүн Агваанлувсангийн Ундраа 1990 онд төрсөн Т.Жаргалсайхан гэх иргэнд “хагас дамжуулалтын чип дизайн хөгжүүлэх, үйлдвэрлэлийг өргөжүүлэх” төсөл нэрээр 100 сая төгрөгийн зээл авахад нь нөлөөлсөн бололтой.
5.УИХ-ын гишүүн Батсүхийн Саранчимэг нь “монгол сор хөгжил олон улсын академи” ТББ-ийг монгол зөөлөн тоглоом, даавуун эдлэл хийлгэхээр 200 сая төгрөгийг тендергүйгээр зээлэхэд нь эрх мэдлээ ашигласан уу гэдгийг шалгаж байна.
6.УИХ -ы н гишүүн Цэдэнбалын Цогзолмаа нь сонгинохайрхан дүүрэгт амьдардаг гэх харъяалалтай иргэн Б.Тамирт 150 сая төгрөгийг мал аж ахуйн ферм ажиллуулна хэмээн зээлэхэд нь нөлөөлсөн байж болзошгүй гэх мэдээллийг эх сурвалжууд өгч байгаа юм.
Дээрх зээл нь УИХ-ын гишүүн Н.Номтойбаярыг нийгмийн хамгаалал хөдөлмөрийн сайд байхад олгогдсон бөгөөд ХХҮЕГ-ын дарга Б.Нямдаваа, хөдөлмөрийн асуудал хариуцсан дэд дарга Б.Шижиржаргал нар “Номтойбаяр сайдын өгсөн жагсаалтын дагуу зээлийг нь даруй олгосон” хэмээн мэдүүлээд байгаа юм” гэсэн байна.
Эх сурвалж: Үндэсний шуудан
