Nissan пүүс Япон дахь үйлдвэрлэлээ түр зогсоож, шалгалт хийхээр болжээ

 

Сүүлийн хоёр долоо хоногийн турш Nissan пүүсийн
үйлдвэрлэлийн хяналтын явцад алдаа гарсан тухай мэдээлэл багагүй шуугиан
тарьсан билээ. Тэгвэл тус компаниас Япон дахь зургаан үйлдвэрээ зогсоож,
аюулгүй ажиллагааны журмыг дагаж мөрдсөн эсэхийг нягтлахаар болжээ.

Автомашины зах зээлд тэргүүлэгч Nissan пүүстэй
холбоотой энэхүү таагүй мэдээлэл цацагдсаны дараа буюу өнгөрөгч Баасан гаригт хувьцаа
нь хоёр хувиар буурсан байна. Түүнчлэн энэ сарын эхээр худалдаанд гаргасан 1.2
сая автомашинаа зах зээлээс эргүүлэн татахаар болжээ. Японы Зам тээврийн яамны сайд Кейчи
Иши энэ явдал хэр хугацаагаар үргэлжлэх нь тодорхойгүй байгаа талаар мэдэгдсэн
юм. NHK телевизэд
өгсөн түүний тайлбараас харахад аюулгүй ажиллагааны заавар дүрмийг мөрдөөгүй
явдал нь 20 орчим жилийн хугацаанд үргэлжилсэн байж болзошгүй гэжээ. Харин уг
мэдэгдэлд Nissan-ний
зүгээс татгалзсан, эсвэл хүлээн зөвшөөрсөн тайлбар алиныг нь ч хийгээгүй байна.

Пүрэв гаригт болсон хэвлэлийн бага
хурлын үеэр Nissan-ний
гүйцэтгэх захирал Хирото Сайкава мэдэгдэхдээ, тээврийн хэрэгслийг хянадаг
ажилтнуудыг гэрчилгээжүүлдэг компанийн үйл ажиллагаа 20 жилийн турш
өөрчлөгдөөгүй, хэвээр байгаа тухай ярьжээ. Өнгөрөгч сарын сүүлчээр энэ асуудал
дэгдэхэд, Nissan шалгалт
хяналтын явцыг чангаруулсан хэмээн мэдэгдсэнээр гэрчилгээжүүлээгүй техникийн
ажилчдыг шалгах ажлыг үргэлжлүүлсэн байна. Дээрх шалгалт хяналтын явц нь хилийн
чанадад гаргадаг автомашинуудад хамаарахгүй учир компанийн зүгээс гадаадад
экспортолдог автомашинуудаа үргэлжлүүлэн үйлдвэрлэх аж.

Японы автомашины хоёрдогч том
үйлдвэрлэгч Nissan нь энэ
оны наймдугаар сард дотооддоо зорчигчийн болон арилжааны гээд 79,300 орчим
автомашин үйлдвэрлэсний 27,600-г нь дотоодын зах зээлд нийлүүлжээ. Урьд өмнө \”Kobe Steel” болон \”Takata Airbag” компаниудад
тохиолдсон асуудлын нэгэн адил Nissan-ний
аюулгүй ажиллагааны журам зөрчсөн хэрэг нэг хэсэгтээ намжихгүй бололтой.

 

Б.Болормаа