Ц.Нямдорж: Эрдэнэтийн 49 хувийг хөдөлгөх үйл ажиллагаанд Б.Хурц оролцсон

 

 

Тагнуулын Ерөнхий газрын дарга Б.Хурц Хууль
зүй, дотоод хэргийн сайд Ц.Нямдоржтой холбоотой мэдээлэл хийсэн. Энэ мэдээллийн
дараа Ц.Нямдорж төрийн ордонд эсрэг тайлбар хийлээ. 

-ТЕГ-ын
дарга Б.Хурц таньтай холбоотой мэдээлэл хийлээ. Та ямар тайлбар өгөх вэ?

-Зул бөхөхийн өмнө бамбардаж асдаг л даа.
Тэр л болж байна уу гэж бодож байна. Мөн би \”Нам дагасан бүлэглэлийг цэгцэлнэ”
гэж УИХ дээр үгээ хэлж байсан. Энэ бүлэглэлийн гол зохион байгуулагч нь Б.Хурц
л даа. Энэ хүн албан тушаалаасаа чөлөөлөгдөхөө мэдчихээд хэвлэлийн хурал хийж
байгаа байх. Би өнөөдөр ЦЕГ-ын даргыг өөрчлөх саналаа оруулна. Энэ асуудлыг
өнөөдөр шийдвэрлэнэ. Цаашид олон ийм асуудлыг шийдвэрлэнэ. Эрдэнэтийн 49 хувийг
хөдөлгөх үйл ажиллагаанд Б.Хурц оролцсон. Б.Хурц бол Худалдаа хөгжлийн банкны Д.Эрдэнэбилэгийн
хуурай дүү. Намайг Эрдэнэтийн асуудлаар шийдвэр гаргахаас өмнө өрсөж мэдэгдэл
хийж байна.

-Таны
хүү Н.Анхбаяр нарын хүмүүс 2004-2006 онуудад Эрдэнэт үйлдвэрт 42 сая
ам.долларын бараа нийлүүлсэн тухай мэдээллийг ТЕГ-аас өглөө. Гэтэл та өмнө нь
ийм зүйл байхгүй гэж мэдэгдэж байсан санагдах юм?

-42 сая ам.долларын бараа нийлүүлсэн
Анхбаярын талаар би мэдэхгүй. Миний хүүгийн холбогдсон асуудал олон нийтэд мэдээллэгдээд
тайлбар хийгдээд учир нь олдчихсон.

-Тантай холбоотой 42 баримт Тагнуулын
байгууллагаас алдагдсан гэдэг мэдээлэлд ямар тайлбар өгөх вэ?

-Наадах чинь хурандаа Ч.Баатарын хийсэн
ажил.

-С.Зориг
агсны хэргийг мөрдөн шалгаж байсан ажлын хэсгийг дөрвөн ч удаа сольж, өөрчилж
байсан тухай мэдээллээ. Энэ ямар учиртай вэ?

-Би мөрдөн шалгалт хийж байгаа ажлын
хэсгийг ерөөсөө өөрчилж, сольж байгаагүй. Гэхдээ одоо цагдаагийн байгууллагаас төлөөлж,
орж ирсэн хүмүүсийг би солино. Захиалагчийг нь олоогүй байж \”хүн захиалгаар
алсан” гэж шийтгэнэ болохгүй биз дээ. Мангар л биш бол ердийн хүн энэ асуудлыг
ойлгоно шүү дээ.

-Захиалагчийг
зарлах болоогүй гэж мэдэгдсэн?

-Захиалагчийг зарлах, зарлахгүй тухай
асуудлыг Б.Хурц мэддэггүй юм. Шүүхээр боловсруулагдсан шийдвэрийг ил болго
гэдэг саналыг би хүргүүлчихсэн байгаа. Тун удахгүй энэ саналаа Засгийн газарт
оруулна. Хууль өөрчлөгдөөд энэ асуудлыг Засгийн газар шийдвэрлэдэг болчихсон.

-С.Зоригийн
хэрэг илрэхгүй удсан нь тантай холбоотой гэж мэдэгдсэн байна?

-Надтай холбоотой зүйл байхгүй. Энэ хүмүүс яагаад
сандраад байна вэ гэхээр, хүмүүсийг мөчид баримтаар хилсээр шийтгэчихсэн. Энэ
асуудал нь сөхөгдөж магадгүй гэдгээс үхтлээ айж байгаа хэрэг.

-Ажлын
хэсгийг өөрчлөхөд улс төрийн зорилго бий юу?

-Байхгүй. Би та нар захиалагч гэж байгаа
түүнийгээ зарла л гэсэн.

-ТЕГ-ын
даргын өнөөдрийн мэдэгдэл нь улс төрийн зорилготой гэж та харж байна уу?

-Энэ бол цэвэр улс төр шүү дээ. Монголын
хууль хяналтын байгууллага намууд, дарга нарт үйлчилдэг болчихсон. Сүлжээ бий
болсон. Түүнийг нь нураагаад эхлэхээр бужигнаж байна. Нураана гэхээс айж байна.
Гэхдээ би нураана. Нам дамнасан бүлэглэл бүрэн бүрэлдэхүүнээрээ Б.Хурцын ард
байгаа. 49-ийнхөн байгаа. Энэ бол дөнгөж эхлэл.

Намайг тагнахын тулд Анхбаяр гэж миний
багшийн хүүхдийг тагнаж, гүйцэтгэх ажиллагаа зохион байгуулсан. Мөн над дээр
бүтэн жил тагнах ажиллагаа зохион байгуулсан шүү. \”Хууль хяналтын байгууллага
толгой дээр гарлаа” гэж яриад байгаа минь энэ л дээ. Би Б.Хурцыг Ж.Эрдэнэбат
дээр дагуулж орж байсан. Тагнуулын байгууллага хоёр л үүрэгтэй. Гэтэл өнөөдөр
юу хийж байна вэ. Гадаадын тусгай албадыг шалгадаг, улсын аюулгүй байдлыг
хангадаг байгууллагын дарга ажлаа өгөхийн өмнө улс төрийн мэдэгдэл хийж байгааг
юу гэж ойлгох ёстой вэ.

-ТЕГ-ын
дарга солигдоно гэсэн үг үү. Хэзээ солих вэ?

-Солигдоно. Солих тухай асуудлаар би
Ерөнхий сайдтай зөвшилцөж байгаа.