\”Засаг задрана\”

 

Яг үүн шиг үйл явдал Монгол Улсад хамгийн хэрэггүй нь.
Засгийн газраа татан буулгаж, эмхлэн тохинуулахад улс орны хэрхэн өртөж,
амьдрал ахуй яаж доройтдогийг ард иргэд нүдээрээ харлаа, мэдэрлээ, одоо ч
зовлонг нь нуруун дээрээ үүрсээр явна. Гэвч
улс төрийн ертөнцөд Засгийн газрыг задлах, уганах тухай яриа улам л хүчирхэгжсээр
байна.

 

Шинэчлэлийн Засгийн газар унаж, Шийдлийн нэртэй
Ч.Сайханбилэгийн Засгийн газар байгуулагдсан. Гэвч байгуулагдсаны маргааш л
унагах, огцруулах тухай яриа дэгдэх болсон юм. Энхэл донхол эхний алхамаа хийх зуураа
л насаа тоолуулж байсан болохоор Ч.Сайханбилэгт ч тийм ч амар байгаагүй биз.

Тэгсэн мань хүн өөрөө алдаа гаргаж, Дубайн гэрээг
байгуулснаар огцруулах бичиг бэлэн болж гишүүдийн гарын үсгийг цуглуулж эхэлсэн
юм. Н.Алтанхуяг МАХН-тай бат найрамдлын гэрээ байгуулснаар хойдохоо уншуулсан
шиг. Ч.Сайханбилэг Дубайд гэрээ байгуулснаараа Г.Уянга, бие даагчид, МАН-ын
бүлгийн зарим гээд 20 гаруй гишүүдийн гарын үсэг огцруулах бичиг дээр зурагдах
шалтгаан болсон юм. Энэ тоо нэг нэгээр нэмэгдсээр… Харин Ч.Сайханбилэгийн
хувьд эсрэг дорвитой арга хэмжээ авалгүй дэмий л хөмхийгөө зуусаар л байна.

Ингэж явтал Ерөнхий сайдаа хэзээ ч огцруулахгүй гэж
мэдэгдээд байсан Ардчилсан нам нь дотроо хагаралдаж эхэллээ. Ер нь АН-ыг
шуудайнд хийсэн үхрийн эвэртэй зүйрлэдэг. Нэг нам л болохоос биш маш олон бүлэг,
францууд дотор нь үйл ажиллагаа явуулж, эрх мэдэл, сандал, суудлын төлөө
тэмцэлдсээр байгаа. Тиймээс ч УИХ-д олонх болсон сонгуульт жилүүдэд хамгийн
олон удаа Засгийн газраа огцруулсан рейтингийг АН тэргүүлдэг юм.

Тэд энэ удаад дахиад л Засгийн газраа огцруулах нь. Энэ
үгийг саяхан болсон нууцхан хэрнээ, сүржин баривчилгаа нотлох шиг боллоо гэж
хэвлэлүүд онцолж байна.

Зам тээврийн яамны Төрийн нарийн бичгийн дарга асан Б.Батзаяаг
гэрээс нь баривчилсан нь АН-ынхны хоорондоо хийж буй тэмцлийн нэг хэлбэр хэмээн
тайлбарлах боллоо. Үүнийг УИХ-ын гишүүн Х.Баттулга ч баталж \”Энэ асуудал
цаашдаа ч нэлээд зохион байгуулалттай хөврөх байх. Нарийн царигаар баялаг зөөх
бүлэглэлтэй тулгарсаар өнөөдрийг хүрч байна. Б.Батзаяа тэр бүлэглэлийн золиос
болчихлоо. Ер нь баялгаас болж янз бүрийн юм болдог шүү дээ. Баялгийг хэн
зарцуулах, хэн барьж, эрх мэдлээ тэлэх удаан суух асуудал дээр тэмцэл болж
байна” хэмээн хэлсэн юм.

АН олонх болж Засаг барьж байна. Тиймээс эрх мэдлийн
төлөөх тэмцэл энд л явагдаж байна гэж хардах үндэслэлтэй. Уг асуудлаас болоод
АН-ын бүлгийн хуралдаан ч тун ширүүн болсон сураг дуулдав. Эцэстээ Х.Баттулга
гишүүн \”Нэгийгээ араас нь \”хутгалаад” явах юм уу. Ингээд яваад байя гэвэл явж
болно. Хэн ийм ажлыг хийснийг мэдэж байна” хэмээн нэлээд ноцтой уур амьсгал
үүсгэх мэдэгдэл хийгээд авсан байгаа юм.

\” …алалцвал алалцъя” гээд хурлаа хаяад явчихсан тухай
сошиал ертөнцөд бичиж байна. Х.Баттулга МоАХ-г тэргүүлдэг. Энэ холбоонд бас ч
үгүй олон гишүүд хамаарч УИХ-д сууж байгаа. Тиймээс тэд \”алалцаад” эхэлвэл
хамгийн түрүүнд өртөх бай нь Засгийн газар болж таарах гээд байна. Ямар сайндаа
л өчигдрийн бүлгийн хурал дээр Ч.Сайханбилэг \”би баривчилгаа явуул гэж тушаал
өгөөгүй” хэмээн сандрангуй мэдэгдэл хийсэн тухай эх сурвалж мэдээлж. Энэ нь Х.Баттулга руу
тавьсан сумны эсрэг талыг олоход л дөхөм
болгожээ гэж ойлгогдохоор.

Ер дөө Засгийн газар яаж ч магадгүй байгаа энэ үед
Б.Батзаяаг баривчилсан нь маш том нэрмээс болох нь. Энэ удаад сөрөг хүчин бус
АН өөрсдөө Засгийн газраа шоглох нь дээ.

А.Аюуш