АТГ, Г.Шийлэгдамба хоёрын хэн нь улс төрийн \”золиос\” вэ

Г.Шийлэгдамба үнэхээр улс төрийн золиос байв уу. МАХН-ын
нарийн бичгийн дарга нарын тайлбарлаж байгаагаар Эрүүл мэнд, спортын сайд үнэхээр
улс төрийн золиос болжээ гэж хардмаар.

Гэхдээ зүгээр явсан хүнд эрүүгийн хэрэг үүсгэж баривчлах
хэмжээний улайрсан улс төр байна гэж үү. Үүнд л нэг л итгэл төрж өгөхгүй л байгаа
юм даа. Н.Энхбаярыг баривчилж, шүүхээр ялласан нь ч улс төрийн золиос,
хэлмэгдүүлэлт гэж тайлбарладаг. Шүүх л гэм буруутанг эцсийн байдлаар тогтооно
гэдгээр шүүх л Н.Энхбаярыг авлига авсан төрийн өмчийг үнэгүйдүүлж, шамшигдуулсан
гэдгийг тогтоож ял оноосон. Одоо үнэгүйдүүлж авсан барилгууд нь төрийн ордонг
тойроод л байж байна шүү дээ. Үүнийг улс төрийн золиос гэж нэрлэнэ гэж үү.

Ер нь улс төрийн золиос хийхгүйгээр Н.Энхбаярын авлига
албан тушаалаа ашигласан хэргүүдийг хуулийн байгууллага нүдээ аниад өнгөрөх
ёстой байж л дээ.

Г.Шийлэгдамба ч мөн адил улс төрийн золиос болчихоод
байгаа. Бүр сайн найруулсан кино зохиолын баатар болсон гэж МАХН-аас мэдэгдсэн.
Нөхөр хүнээс авлига авч байж.Яг тэр үед нь АТГ-ын албан хаагчид гэнэт гарч
ирээд л баривчилгаа хийсэн байгаа юм. Энэ тайлбараас харахад сайхан өрнөлтэй
кино шиг харагдаж байна л даа. Гэхдээ төрийн сайд хүнийг авлига авах хэмжээнд
хүртэл мөрдлөгө явагдсан л байж таараа.

Г.Шийлэгдамба яагаад авлига авав гэдэг тайлал ерөнхий дөө
задарч байх шиг байна. Сийрүүлбэл, Засгийн газраас БНХАУ-ын хөнгөлөлттэй
зээлийн нөхцлөөр улсын эмнэлгүүдийг цахим системд шилжүүлэх төсөл хэрэгжиж
байгаа юм байна. Мэдээж төсөл хөтөлбөр хэрэгжүүлж байгаа тохиолдолд гүйцэтгэгч
шалгаруулах тендер зарлах нь ойлгомжтой. Тендер зарласнаас хойш хоёр компани
тунаж үлджээ. Гэвч салбарын сайд шинэчлэгдэхэд дахин нэг компани тунаж үлдсэн
хоёрын дундуур орж ирсэн байна. Энэ үеэс л хуулийнхан асуудлыг анхаарч эхэлжээ.

Тэгвэл саяхны болсон баривчилгааны үеэр тендерт гэнэт орж
ирсэн компанийн төлөөлөгч Г.Шийлэгдамбатай хамт байсан нь дээрх үндэслэлийг
улам л баталж өгч байгаа мэт санагдав.

Яахав сонгууль дөхөж байгаа улс төрийн намуудад
санхүүжилт хэрэгтэй. Тиймээс л сайд намдаа санхүүжилт олохоор өөрийгөө
золиосолсон байж болох л юм. Энэ талаас харвал үнэхээр улс төрийн золиос
болжээ. Түүнээс хуулийнхны хийж буй ажлыг улс төртэй хутгах нь тийм ч оновчтой
санагдсангүй.

АТГ-ын даргыг томилдог хүн Н.Энхбаярт дургүй учраас л
МАХН-ын удирдлагуудыг оролдоод байна гэж тайлбарлаж байна. Хэргүй цэвэрхэн
хүнийг хэн ч оролдохгүй, оролдоод ч юм гарахгүй. Г.Шийлэгдамба авлига авах
ухамсартай хүн биш. Тийм байж болохыг үгүйсгэхгүй. Тэгвэл үйлдэлдээрээ
баригдсан явдлыг кино зохиол гэж тайлбарлаад л \”булчих уу”. Харин ч энэ
тайлбарыг чинь \”улс төр” гэж нэрлэдэг байх шүү.

Шүүх эцсийн байдлаар гэм буруутанг тогтооно. Энд улс төр
хэрэггүй. Нэгдүгээр хүн болон номер нэгийн тулаанд хуулийн байгууллагуудыг
битгий хутгаач. Тэдэнд нөлөөлөлгүй, ажиллах боломж олгооч. АТГ-ыг захиалгаар ажилладаг л гэх юм. Магадгүй. Зарим талаар үнэхээр тэгэж харагддаг. Гэхдээ энэ байгууллага байгаагүй бол татвар төлөгчдийн мөнгийг шамшигдуулж, хагартлаа баяжсан эрхмүүд хуулийн цаана нуугдаад л үлдэх байсан гэж боддог уу?

Амар