Оросууд олимпт орох эрхээ хасуулж ч магадгүй

Дэлхийн сэргээшийн эсрэг агентлагаас ОХУ-д хийсэн тусгай шалгалтын дүнгээ танилцуулсан нь тус улсыг ирэх жилийн олимпт оролцох эрхийг ч хасч магадгүйд хүргэх ноцтой дүгнэлт гарчээ. Тус агентлагийн ерөнхийлөгч асан Дик Паундын удирдан явуулсан шалгалтын багийнхан Оросын баг тамирчид \”бүх түвшиндээ хуурч мэхэлж сурсан”, \”үүнийг улсаас нь дэмжин санхүүжүүлдэг” хэмээн үзэхээс өөр аргагүй хэмээн хэвлэлийн бага хурлаар зарлажээ.

 

Оросын тамирчдын удаа дараа гаргаж байсан допингийн зөрчлийн дараа тус агентлаг тусгай шалгалтын баг гаргаж, 11 сарын турш шалгалт шинжилгээ хийсэн байна. Ингэхдээ тэд Оросын тамирчдаас авсан шинжилгээний 1400 дээжийг шалгахаар Москва дахь тусгай лабораторид нь хандахад бүгдийг нь санаатайгаар устгасан хэмээн мэдээлж байна.

Шалгалтаар илэрсэн зөрчлүүдийг дурдвал, ОХУ өөрсдөө дэлхийн стандартад нийцсэн тусгай лаборатортой гэдэг ч тэнд шинжилгээ хийх стандарт нь шаардлага хангахгүй, Оросын Допингийн эсрэг агентлаг нь олон улсын допингийн эсрэг кодыг дагаж мөрддөг гэх баталгаагүй, тус агентлагийн захирал Григорий Родченко зарим тамирчны сэргээшийн шинжилгээний хариуг устгасныхаа төлөө авлига авсан хэрэгт холбогдож байсан хэмээн буруутгажээ. Мөн лабораторийн ажилтнууд, эмч мэргэжилтнүүд дасгалжуулагчидтай үгсэн хуйвалддагийг нотлох мэдээлэл бий хэмээн шалгалтын дүгнэлтэд дурдсан байна.

Москва, Сочи дахь сэргээшийн лабораторид Оросын аюулгүй албаныхан хяналт тавьдаг нь тэдний үйл ажиллагаанд төрийн зүгээс шууд оролцдог гэдгийн баталгаа хэмээн үзэж буйн дээр Оросын сэргээшийн эсрэг агентлаг Русадагаас зөрчил илэрсэн тамирчдад шинжилгээний дүнгийн талаар урьдчилан мэдээлэл өгдөг, тэднээс авлига авч нуун дарагдуулдаг гэдгийг нь тогтоосон гэнэ.

Ер нь бол Оросын тамирчид дунд сэргээш хэрэглэх нь түгээмэл байдаг, үүнийг нь лабораторийн шинжилгээгээр тогтоодог ч албан тушаалтнууд нь авлига, хээл хахуулиар нуун дарагдуулах маягаар бүх л түвшиндээ хууран мэхэлдэг хэмээн үзжээ.

Өнгөрсөн хугацаанд Оросын тамирчдаас илэрсэн сэргээшийн тохиолдлоор бол Лондонгийн олимпт ч тус улсын баг тамирчдыг оролцохыг нь хориглоход хангалттай хэмжээнд хүрээд байсан гэж Дэлхийн сэргээшийн эсрэг агентлагаас дүгнэжээ.

Тиймээс тус агентлаг нэн тэргүүнд Оросын таван тамирчин, таван дасгалжуулагчийг бүх насаар нь олон улсын тэмцээн уралдаанд орох эрхийг хасах саналтай байгаагаа холбогдох газар нь уламжилсан байна.

Тэд шалгалтын дүнгээ Олон улсын тамирчдын холбоонд танилцуулсан бөгөөд тус холбооноос Оросын талд хандан энэ долоо хоногийн эцэс гэхэд хариу тайлбар мэдээлэл ирүүлэхийг шаарджээ. Олон улсын тамирчдын холбооны ерөнхийлөгч Лорд Кой сэргээшийн шалгалтын дүнг нягтлан үзээд авч болох арга хэмжээ, тэр дундаа баг тамирчдыг нийтээр нь олон улсын тэмцээн уралдаанд оролцохыг хориглох хүртэл аргыг бодолцож үзнэ хэмээн мэдэгдээд байна.

Харин Дэлхийн сэргээшийн эсрэг агентлагийн зүгээс ОХУ-д бүр тодорхой шийтгэл оноохыг шаардаж буй. Тэд 2016 оны Риогийн олимпт Оросын баг тамирчдыг бүрэн бүрэлдэхүүнээр нь оролцохыг хориглох санал гаргаад байна. \”Хэрэв ОХУ-ын тал өөрсдөө санаачилгаараа энэ бүх худал хуурмгаа засч залруулахгүй бол Риогийн талбайд Оросын нэг ч тамирчин гарахгүй. Одоо өөрчлөлт хийх цаг нь болсон” хэмээн тус агентлагийн ерөнхийлөгч асан Дик Паунд хэлсэн байна.

Оросын спортын ертөнцийг донсолгосон энэ мэдээллийн дараа тус улсын Спортын сайд Виталий Матко мэдэгдэл хийж, энэ бүхэн Оросын эсрэг барууны орнуудын тавьдаг давхар стандартын нэг жишээ хэмээн тайлбарлажээ.

\”Допингийн зөрчил улс орон болгоноос гардаг. Гэхдээ аль ч улсыг тусгайлан шалгасан тохиолдол өмнө огт гарч байгаагүй  атал Оросыг онцгойлон шалгаж, ийм үндэслэлгүй, бодит байдлаас зөрсөн дүгнэлт гаргасан нь ОХУ-д барууныхны тавьдаг давхар стандартын ээлжит нэг жишээ” хэмээн тэрбээр мэдэгджээ.

Түүний хэлснээр Оросын сэргээшийн лаборатор жил бүр 15 мянган тамирчнаас шинжилгээ авч, дээжийг нь хадгалдаг бөгөөд үүнээс хоёр хувьд нь л допинг илэрдэг гэнэ. Энэ бол олон улсын хэмжээнд хэвийн үзүүлэлт хэмээн Виталий Матко хэлээд энэ бүх мэдээллийг өнөө үед нуун дарагдуулах ямар ч аргагүй. Бид зөвхөн Сэргээшийн эсрэг дэлхийн агентлагийн өөрсдийнх нь заавар зөвлөмжийн дагуу л ажлаа явуулдаг гэжээ.

Оросын спортын ертөнцийн нэр хүндийг унагааж, зориуд харлуулах гэсэн энэ  дүгнэлтийн дараа оросуудад нэр төрөө цэвэрлэх боломж олгох ёстой, хэрэв үнэхээр баг тамирчдыг нь хориглохоор яригдаж байгаа бол энэ бүх зөрчил хувь хүний алдаа дутагдал биш, Оросын тамирчдын холбооноос зохион байгуулсан үйлдэл гэдгийг  батлах ёстой гэж үзэж байгаа аж.

ОХУ-ын талын үзэж буйгаар тус улсын баг тамирчдад хориг тавих эрх Дэлхийн сэргээшийн эсрэг агентлагт байхгүй, энэ сард болох Олон улсын тамирчдын холбооны хурлаар зүй зохисоор нь ярих ёстой аж. ОХУ-ын тал маргааш гэхэд Олон улсын тамирчдын холбоонд хариу тайлбараа ирүүлэх ёстой бөгөөд ирэх баасан гарагт энэ талаар хуралдах юм байна.

Дээрх мэдээлэлтэй холбогдуулан Олон улсын олимпийн хорооны зүгээс маш их цочирдож, бас харамсч байгаагаа илэрхийлсэн бөгөөд Олон улсын тамирчдын холбооны удирдлага Себастиан  Кой зөв шийдвэр гаргана гэж  итгэж буйгаа мэдэгджээ.     

Оросын тамирчин Чернова сэргээш хэрэглэсэн нь шинжилгээгээр илэрч, олимпийн медалиа хураалгасан билээ

Дэлхийн сэргээшийн эсрэг агентлагийг шалгалт хийж эхлэхээс ч өмнө барууны зарим хэвлэлээр Оросын спортын ертөнц дэх допингийн асуудлын талаар томоохон нийтлэл, нэвтрүүлгүүд гарч байсан. Тухайлбал, Германы телевизээр дамжуулсан баримтат кинонд  Оросын тамирчид сэргээшийн шинжилгээнийхээ дүнг нуухын тулд орлогынхоо таван хувийг төлдөг хэмээн гаргаж байсан бөгөөд Оросын сэргээшийн эсрэг агентлагт ажиллаж байсан Виталий Степанов, түүний эхнэр Юлия нарын ярианаас иш татан тус улсын спортын ертөнцөд допинг хэрхэн газар авсан тухай мэдээлж байсан юм.

Эх сурвалж: newscom.mn

Б.Сэвжидмаа