АНУ-ын ерөнхийлөгч Дональд Трамп сургуулийн багш нарт галт зэвсэгтэй байхыг зөвшөөрөх санааг, мөн сургуулийн орчинд зэвсэг авч явахыг хориглосон дүрмийг цуцлахыг дэмжиж байна. Тэрбээр Цагаан ордонд болсон хэвлэлийн бага хурлын үеэр ийм мэдэгдэл хийлээ. Мөн тэрээрФлорида мужийн Маржори Стоунмэн Дугласын нэрэмжит сургуулийн багш сурагчидтай уулзсан байна.
Флорида мужийн сургуульд болсон эмгэнэлийг үзэж харсан, даван туулсан багш, сурагчид эрх баригчдаас цаашид дахин ийм зүйл гаргахгүй байх тал дээр боломжтой бүхнийг хийхийг шаардсантай холбогдуулан Трамп багш нарыг зэвсэглэх санааг дэмжиж байгаа илэрхийллээ.
Мөн галт зэвсэг худалдан авах хүсэлтэй байгаа хүмүүсийг шалгах системийг чангатгах саналыг бас дэмжиж байгаагаа мэдэгдэв. Флорида мужийн Маржори Стоунмэн Дугласын нэрэмжит сургуульд болсон хэрэг явдал хохирогчийнхоо тоогоор 2012 оноос хойш хамгийн их цус асгаруулсан хэрэгт тооцогдож байна. 2012 онд “Сэнди-Хук” сургууль руу халдах үеэр 26 хүн амь үрэгдэж байжээ.Флоридагийн сургуулийн байранд аллага үйлдсэн 19 настай Николас Круз гэгч хэргээ бүрэн хүлээгээд байна. Ерөнхийлөгч Трамп аймшигт аллагын гэрч болсон багш, сурагчдад хандаж хэлсэн үгэндээ, “Бид маш хатуу шалгалт хийнэ. Ялангуяа зэвсэг худалдан авч байгаа хүний сэтгэцийг сайтар шалгаж байна” гэлээ.
Ингэхийн хажуугаар Трамп Америкийн үндэсний галт зэвсгийн ассоциацаас аль эртнээс л санал болгож байсан багш нар болон сургуулийн ажилтнуудад галт зэвсэг авч явах, хэрэглэхийг зөвшөөрөх саналыг дэмжиж байгаагаа илэрхийллээ. “Хэрвээ танай багш галт зэвсэгтэй хэрхэн харьцахыг мэддэг байсан бол халдлагыг даруй зогсоох боломж байсан байж болох юм гэж” Трампхэлжээ. Мөн тэрээр сургууль орчимд галт зэвсэг авч явахыг хориглосон бүс байгуулсныг эрс шүүмжилж, “Энэ бүс бол гэмт этгээдийг өөгшүүлж байгаа явдал, “би ямар ч саадгүй сургууль руудайран орж гал нээж болно” гэдгийг түүнд итгүүлж байгаа явдал” гэлээ.
Гэвч ерөнхийлөгчийн энэ санал зарим хүмүүсийг эгдүүг хүргээд байна. Тухайлбал халдлагын үеэр охиноо алдсан Эндрю Поллак, “Миний охин өнгөрсөн долоо хоногт гэмт этгээдийн гарт амь үрэгдсэн, түүний минь биед 9 сум зоогдсон. Эрх баригчид та нар бидний хүүхдүүдийн төлөө юу ч хийгээгүй, би үнэхээр эгдүүцэж байна” гэжээ. АНУ-ын Вашингтон, Чикаго, Питтсбург, Таллахасси хотуудад галт зэвсгийн худалдаанд хязгаарлалт тогтоохыг шаардсан эсэргүүцлийн жагсаал цуглаан болж байна.
