Хатгалгааны эсрэг вакциныг нийслэлийн хэмжээнд энэ сарын 1-нээс хийж эхэлсэн. Энэхүү вакцины талаар Эрүүл мэндийн яамны Тандалт шуурхай удирдлагын хэлтсийн дарга Д.Нарангэрэлтэй ярилцлаа.
-Хатгалгааны вакциныг энэ сарын 1-нээс хийж эхэлсэн. Энэ удаагийн вакциныг нийслэлийн бүх дүүргийн хүүхдүүдийг хамруулах уу?
-Хатгалгааны вакциныг дэлхийн 100 гаруй оронд хэрэглэдэг. Пневмококкоор үүсгэдэг уушигны хатгалгаа өвчнийг бууруулахад өндөр үр нөлөөтэй. Манай оронд хийсэн судалгаагаар ч гэсэн тогтоосон. Бид нар Пневмококкийн вакциныг дархлаажуулалтад үе шаттайгаар хийж байгаа. Өнгөрсөн 2016 онд нийслэлийн өвчлөл их Сонгинохайрхан, Сүхбаатар дүүргийн 39900 хүүхэд дархлаажуулсан. Мөн 2017 онд Баянзүрх дүүргийн хүүхдүүдийг хамруулсан. Нийтдээ 48 мянган хүүхдийг Пневмококкийн эсрэг 13 цэнт вакцинаар дархлаажуулсан байгаа. Харин энэ жил гуравдугаар сарын 1-нээс эхлээд нийслэлийн бүх дүүргийн хүүхдүүд уушгины хатгалгааны вакциныг хийж байна.
-Одоогоор хэчнээн хүүхэд хамрагдаж байна?
-Эхний гурав хоногийн байдлаар хоёр сартай 158 хүүхдүүд вакцинд хамрагдсан байна. Одоо хоёр сартайдаа хийлгэсэн хүүхдүүд дөрвөн сартайдаа хийлгэнэ. Мөн есөн сартай бас хийлгэнэ.
Иргэд сайн дураар 0-2 насны хүүхдэдээ хатгалгааны вакциныг төлбөртэй хийлгэх боломжтой
-Насны хувьд зөвхөн хоёр сартай хүүхдүүд хамрагдах юм уу. Таваас доош насны хүүхдүүд хатгалгааны вакцинд хамрагдах боломжтой юу?
-Тийм ээ. Хоёр сартай хүүхдүүдэд товлолын дагуу хийж байгаа. Гурван тунгаар явах учраас эхний ээлжинд хоёр сартайд нь нэг тун. Хоёр дахь тунг нь дөрвөн сартай, гурав дахь тунг нь есөн сартайд хийнэ. Харин нийслэлийн иргэд өөрсдөө хүсвэл 0-2 насны хүүхдэдээ сайн дураар ХӨСҮТ -д очиж хатгалгааны вакциныг төлбөртэй хийлгэх боломжтой. Ирэх 2019 оноос улсын хэмжээнд бүх аймгуудад нэвтрүүлэх зорилго тавьж байгаа.
-Өнгөрсөн 2016 онд өвчлөл ихтэй хоёр дүүргийн хүүхдүүдэд хатгалгааны вакциныг хийсэн гэсэн. Энэ өвчлөлийг бууруулж чадсан уу?
-Энэ вакцины үр дүнг эхний хоёр жилд хийсэн судалгаагаар дүгнэж болно. Вакцинд хамрагдсан, хамрагдаагүй гэсэн чиглэлээр судалгаа хийсэн. Судалгаагаар уушгины хатгалгаа өвчнийг 40 хувиар бууруулж чадсан. Харин хүнд хэлбэрийн хатгалгаа өвчнийг 30 хувиар бууруулсан байгаа. Мөн өнгөрсөн онуудад Пневмококкийн вакцин хийлгэсэн 70 мянган хүүхэд байгаа. Эдгээр хүүхдүүд дотор уушгины хүнд хэлбэрийн хатгалгаар хүүхэд өвчлөөгүй. Тэгэхээр энэ вакцин их үр дүнтэй байна гэдгийг тогтоосон. Дэлхийд ч гэсэн ингэж тогтоосон байгаа.
Өнгөрсөн 2017 онд уушгины хатгалгаа өвчнөөр 17817 хүүхэд өвчилсөн
-Улирлын хувьд заавал гуравдугаар сард хийх ёстой юу. Өвлийн улиралд хийж болно биз дээ?
-Жилийн дөрвөн улиралд хийх боломжтой. Энэ жилийн хувьд яагаад гуравдугаар сард эхэлсэн бэ гэхээр нэг, хоёрдугаар сард томуугийн өвчлөл их өндөр байсан учраас нэг сард хийх вакцинаа хойшлуулсан байгаа. Вакциныг эрүүл хүүхдэд хийх ёстой. Ханиад томуутай хүүхдэд хийвэл тодорхой хэмжээний урвал хүндрэл гардаг. Иймээс томуугийн өвчлөлийг бууруулж байгаад хатгалгааныхаа вакциныг хийж байгаа.
–Хатгалгааны вакцин хийсээр өвчлөл нэлээд хувиар буурч байгаа юм байна. Ер нь хатгалгаа өвчнөөс болж бага насны хүүхэд эндэх тохиолдол цөөнгүй гардаг. Энэ онд бага насны хүүхэд эндсэн тохиолдол хэр гарсан бэ?
-Уушгины хатгалгаа өвчин 0-5 насны хүүхдийн өвчлөл, эндэгдлийн тэргүүлэх шалтгаан болдог. Мөн агаарын бохирдол болон хөрсний бохирдлоос болж 0-5 насны хүүхэд уушгины хатгалгаа өвчинд нэлээд өртөмтгий байдаг. Өнгөрсөн 2017 онд уушгины хатгалгаа өвчнөөр 17817 хүүхэд өвчилсөн. Үүнээс 0-5 насны 148 хүүхэд эндсэн байна. Иймээс эцэг эхчүүд хатгалгааны вакциндаа идэвхтэй хамрагдах хэрэгтэй.
-Хатгалгааны вакциныг аль улсаас оруулж ирсэн бэ?
-НҮБ-ийн Хүүхдийн сангийн шугамаар Дэлхийн эрүүл мэндийн байгууллагын гэрчилгээтэй үйлдвэрээс авч байгаа. Зах зээлийн үнээр авбал 13 долларын үнэтэй. Нэлээд үнэтэй вакцин. Харин НҮБ-ийн Хүүхдийн сангийн шугамаар хөнгөлөлттэй үнээр буюу 3,5 доллароор нийлүүлж байна. Эдийн засгийн хүнд энэ үед НҮБ-ийн Хүүхдийн сангаас бид нарт туслалцаа үзүүлж, хөнгөлөлттэй үнээр оруулж ирж байгаа юм.
-Мэдээлэл өгсөнд баярлалаа.
Н.Алтанцэцэг
