Нийслэлийн цагдаагийн газраас хуулийн байгууллагууд болон гар утасны бизнес эрхлэгчдийн хамтарсан уулзалт зөвлөгөөнийг өнөөдөр Нийслэлийн иргэний танхимд зохион байгууллаа. Уг зөвлөгөөний үеэр гар утасны худалдаа эрхлэгчид нь гэмт хэргийн замаар хууль бусаар олдсон, эх үүсвэр нь тодорхой бус гар утас, эд зүйлс гэдгийг мэдсээр байж худалдан борлуулсан бол тухайн этгээдийг Эрүүгийн хуулийн 18.6 дугаар зүйлийн 1-д зааснаар Мөнгө угаах гэмт хэрэгт холбогдон шалгадаг болсон талаар мэдээлсэн юм.
Он гарсаар Нийслэлд халаасны хулгайн гэмт хэргийн шинжтэй, 474 гомдол, мэдээлэл бүртгэгджээ
Он гарсаар Нийслэлд халаасны хулгайн гэмт хэргийн шинжтэй, 474 гомдол, мэдээлэл бүртгэгдэж шалгагдсанаас 85.4 хувь нь гар утасны хулгайн гэмт хэрэг эзэлжээ. Гар утасны хулгайн гэмт хэргээс урьдчилан сэргийлэх, таслан зогсоох зорилгоор Харилцаа холбооны зохицуулах хороо, үүрэн телефоны оператор компаниуд, цагдаагийн байгууллага хамтраад www.smartdevice.mn сайтыг тун удахгүй ажиллагаанд оруулах юм. Ингэснээр иргэд гар утасныхаа IMEI код, утасны дугаараа бүртгүүлснээр хулгайд алдсан гар утсаа хурдан шуурхай олох боломж бүрдэх юм.
Иргэн та уг сайтад гар утасныхаа IMEI код, гар утасны дугаарыг өөрийн нэр дээр бүртгүүлнэ. Ингээд гар утсаа хулгайд алдсан тохиолдолд “алдагдсан” төлөвт шилжүүлэх юм. Хулгайч тухайн утсанд сим карт хийсэн тохиолдолд үүрэн холбооны операторт мэдээлэл очиж, оператор хэрэглэгчийн талаарх мэдээллийг цагдаагийн байгууллагад шилжүүлнэ. Өөрөөр хэлбэл таны нэр дээр бүртгэл бүхий гар утсыг өөр хүн ашиглах боломжгүй болно гэсэн үг. Нэг хүн өөрийн ашиглаж буй бүх ухаалаг утас, төхөөрөмжөө бүртгүүлэх боломжтой.
Гар утсаа хулгайд алдлаа ч гэсэн түргэн шуурхай олдог болно
Нийслэлийн Цагдаагийн газрын Мөрдөн шалгах газрын Халаасны хулгайн гэмт хэрэгтэй тэмцэх хэлтсийн дарга Э.Бат-Эрдэнэ хэлэхдээ “Гар утасны хулгайн гэмт хэргийг илрүүлэх ажлыг төрийн болон төрийн бус байгууллагатай хамтран ухаалаг утаст зориулсан төрөл бүрийн апликейшн зохион бүтээх, ломбардуудад мэдээллийн сан бий болгох зэрэг ажлыг хийж байна. Тун удахгүй Монголчууд гар утасны хулгайгүй, хулгайд алдлаа ч гэсэн түргэн шуурхай олдог болно. Хулгайн гэмт хэргийг таслан зогсоох, урьдчилан сэргийлэхэд ганцхан цагдаагийн байгууллага ажиллаад хүчин мөхөстөж байна. Тиймээс ард иргэд, аж ахуйн нэгжийг ердөө хуулиа мөрдөж, иргэний үүргээ биелүүлээч ээ л гэж байгаа. Ер нь цагдаагийн байгууллагаас хулгайн гэмт хэргийн эсрэг хатуу, чанга бодлого барьж, ард иргэдийг айх аюулгүй амар тайван амьдрах боломжоор хангамаар байна” гэв.
Н.Алт
