АН-ын Ерөнхий нарийн бичгийн дарга Ц.Туваан, Нарийн бичгийн дарга О.Магнай, АН-ын Хуулийн хэлтсийн дарга Д.Батхуяг нар өнөөдөр цаг үеийн асуудлаар мэдээлэл хийлээ. АН-ын Үндсэн дүрмийн хороо хуралдаж, шийдвэрээ гаргажээ. Уг шийдвэртэй холбогдуулан Намын дарга С.Эрдэнэ “Намын гишүүн С.Баярцогтыг АН-ын гишүүнчлэлийн бүртгэлээс хассугай” гэсэн тушаал гаргасныг АН-ын Хуулийн хэлтсийн дарга Батхуяг танилцуулав.
Ц.Туваан: Өнөөдөр АН-ын улстөрийн зөвлөл хуралдаж тодорхой шийдвэрүүдийг гаргалаа. Намын гишүүн С.Баярцогтын нэр хүндтэй холбоотой мэдээлэл нь намын үндсэн дүрмийг зөрчиж байгаа эсэх талаар тодруулахаар намын Үндсэн дүрмийн хорооноос тайлбар хүссэн. Үүний дагуу АН-ын Үндсэн дүрмийн хороо хуралдаж шийдвэрээ гаргаж, намын даргын тушаал гарсан.
О.Магнай: Бидний байгуулж байгаа нээлттэй нийгмийн хамгийн том дайсан бол авилгал, хээл хахууль. АН хэзээ ч авлига, хээл хахуультай эвлэрч байгаагүй, цаашид ч эвлэрэхгүй. Гадаадын байгууллагатай гэрээ хэлцэл байгуулахдаа эх орныхоо эрх ашгийг ноцтойгор зөрчиж, авлига хээл хахууль авсан нь шүүхээр нотлогдсон бол нам, эвсэл, нэр нөлөө харгалзахгүй хуулийн хатуу хариуцлага тооцно гэж АН үзэж байна. С.Баярын тэргүүлсэн ЗГ-ын Сангийн сайд С.Баярцогттой холбоотой мэдээлэл сүүлийн үед цахим орчинд гарлаа. Дээрх мэдээллийн үнэн зөв эсэхийг тодруулахаар АН-аас Швейцарийн холбооны улсын Прокурорын газарт тодруулга авахаар хандсан. Энэхүү асуудалд С.Баярцогт гэм буруутайд тооцогдвол Монгол Улсаас Рио Тинто компанитай байгуулсан хөрөнгө оруулалтын гэрээг эргэж харах зайлшгүй хэрэгтэй гэж АН үзэж байна.
Монголын улстөрчидтэй холбоотой авлига хээл хахууль, оффшор данстай холбоотой асуудлыг цаг алдалгүй шийдвэрлэхийг УИХ, ЗГ, АТГ-аас АН хариуцлагатайгаар шаардаж байна. Авлига хээл хахуультай холбоотой асуудал нь нэг хүн гэхээс илүү нам дамжсан бүлэглэлүүдээс АН өөрийгөө цэвэрлэж байгаа юм. Тухайн үед гэрээнд дөрвөн хүн гарын үсэг зурсан. АН боломжийнхоо хүрээнд улс орны эрх ашгийг уландаа гишгэсэн, авлига хээл хахуультай холбогдсон хүмүүсийн хэргийг шийдвэрлүүлэх чиглэлээр ажиллаж, хариуцлага тооцох болно гэж мэдэгдэж байна гэв.
Энэ асуудлаар С.Баярцогттой өөртэй нь уулзсан уу? АН-ын Швейцарийн прокурорын байгууллагаас ямар мэдээлэл авсан юм бол?
– АН өөрийн Үндсэн дүрмийн хүрээнд үйл ажиллагаа явуулдаг. Жилийн өмнө Үндсэн дүрмийн хороо хуралдаж Үндэсний бодлогын хорооны гишүүнээр сонгогдох асуудлыг түдгэлзүүлж байсан. Бүтэн нэг жилийн хугацаанд өөрөө ирж ямар нэгэн тайлбар хийгээгүй. Дэлхийн нэртэй хэвлэл мэдээллийн агентлагуудаар дээрх асуудалтай холбоотой мэдээлэл гарч эхэлсэн. Үүнд Швейцарийн прокурорын байгууллагын мэдээлэл гэсэн үг үсэг орсон учир мэдээллийг нягтлахаар хүсэлт явуулсан. АН дүрмийнхээ хүрээнд өөрийн гишүүддээ сахилга, ёсзүйн хариуцлага тооцдог. Энэ хүрээнд асуудлыг авч хэлэлцэн дээрх арга хэмжээг авч байна.
-Тус улсын прокурорын байгууллагаас манай хуулийн байгууллагуудтай хамтарч ажиллах ёстой юу?
-Манай намаас гаргасан шийдвэр бол намын дотоод асуудалтай холбоотой. Харин уг асуудал бол олон улсын хууль тогтоомжийн хүрээнд явна.
-Нэг сая ам.долларын оффшортой данстай нь холбоотой асуудалд хариуцлага яригдсан юм болов уу?
-Дүрмийн шинэчлэл саяхан батлагдсан учир шинэ зохицуулалтаар хариуцлага тооцож байна. Швейцарийн прокурорын байгууллагын хариуцлагатай албан тушаалтан С.Баярцогтын оффшор дансанд нь 1.8 сая ам.долларын үлдэгдэлтэй байна гэж мэдээлсэн. Тодорхой баримт байгаа учир энэ шийдвэрийг гаргаж байна. Гэхдээ энэ бол нэг гишүүн гэхээс илүү улс төрийн нам дамжсан бүлэглэлээс АН цэвэрлэгдэх эхний алхам энэ гэж ойлгоосой гэж хүсч байна.
