МАН хүнд цохилт авчихаад \”манарч\” явна

 

Хүнд цохилт авсан хүн хэсэг хугацаанд
манарч, жингүйдэж, энэ бүгдийн дараа юу болсноо ч ойлгохгүй дүнхүүрч суух нь
бий. Тэгвэл улс төрийн ууган хүчин маань яг л ийм байдалтай жингүйдэж, манарч
явна. Ардчилсан нам \”МАН Үндсэн хуулийн цэцтэй
үгсэн хуувилдаж, найман хувийн хүүтэй ипотекийн зээлийг зогсоолоо” гэсэн
ганцхан цохилт хийсэн нь Монгол ардын намд ихэд хүндээр тусч үүнээсээ гарч
чадахгүй явсаар өчигдрийг хүрч байх шиг байна.

 

Харин энэ хооронд АН-аас \”МАН-ын гацаасан
ипотекийн зээлийг үргэлжлүүлнэ. Ингэхдээ бүр найман хувийг тав болгож буулгана”
гэж мэдэгдээд л ирэх сонгуулиар олонх болох эрхээ баталгаажуулаад явж байна. Яг үнэндээ Үндсэн хуулийн цэцэд үл хөдлөх
хөрөнгөтэй холбоотой гомдлыг Ардчилсан намын харьяалалтай хүн гаргасан гэх.
Гэвч Монгол ардын намаас үүнийгээ баталгаажуулж, нэрээ ч цэвэрлэж чадахгүйгээр
гүн шоконд орж, саяхнаас манарч, жингүйдэж эхэлсэн нь ажиглагдах боллоо.

Арилжааны банкууд цаашид орон сууцны зээл
олгох чадамжгүй болсон учраас шалтаг гармагц бушуухан зээлээ зогсоочихсон.
Монгол Улс ч эдийн засгийн хувьд ипотекийн зээлийг үргэлжлүүлээд байх боломжгүй
болчихсон тухай Засгийн газрын зарим гишүүд мэдэгдэл хийгээд эхэлж.

 

Гэвч үнэхээр боломжгүй зүйлийг \”болгоно” хэмээн ямартай ч амлалт өгч байгаагаараа УИХ-ын
дарга сонгогчдоос илүү оноо цуглуулж байна.

Гэтэл МАН яав? АН-д ипотекийн зээлээс нам
цохиулснаа мэдэж сэрээд \”солиорч” эхлэв. Дүйнгэ нь гараагүй явна уу гэлтэй олон
сонин шийдлийг өчигдрийн бүлгийн хурлаар хэлэлцэж, түүнийгээ хэвлэлийнхэнд
танилцууллаа.

 

Улс орны эдийн засаг хямралтай байгаа гэж
өдөр шөнөгүй үглэсэн хүмүүс бол МАН-ынхан. Тооцоо судалгаатай, эртнээс далдыг
харсан мэдээ мэдээллүүдийг тэд л хийж байсан. Гэтэл үнэхээр улс орон хямарч,
Засгийн газар нь хүүхэд хөгшдийнхөө халаас руу гараа шургуулаад эхэлсэн энэ үед
оюутнуудын тэтгэлгийг ялгаваргүй олгох, хүүхдийн мөнгийг 30 мянган төгрөг
болгох, аль эрт мартагдсан Тавантолгойн 1072 ширхэг хувьцааг \”амь оруулах”
зэрэг үл бүтэх санаануудыг дэвшүүлээд эхэллээ.

 

Сонгууль дөхчихсөн нь үнэн. Мөн өрсөлдөгч нам нь ипотекийн зээлээр сонгогчдын
саналыг татахаар зүтгэж байгаа нь ч үнэн. Гэхдээ улс төрийн ууган хүчин минь \”арай
л биш” саналууд гаргаж байна даа.

 

Тавантолгойн 1072 ширхэг хувьцаа \”мянгуужингийн үлгэр” болсон. Өмнө нь энэ
үлгэрээр оноо цуглуулдаг байсан бол одоо бүтэхгүй. Харин улс орон хямралтай
байгааг хамгийн сайн мэдэх хүмүүс яагаад оюутны тэтгэлэг, хүүхдийн мөнгийг
нэмэх тухай яриад эхлэв. Тэгэхээр энэ ч бас худлаа \”үлгэр” болж таарах нь уу. Бас
нэг бүтэхгүй асуудал зээлийн хүүг бууруулах. Үйл ажиллагаа явуулж буй бүхий л
арилжааны банкуудыг татан буулгахгүй л бол зээлийн хүүг буулгах боломжгүй
гэдгийг хэн бүхэн мэдмээрсэн.

 

Эндээс л МАН-ыг хүнд цохилт авч түүнийхээ дараа дүнхүүрч, манарч, жингүйдэж
явна гэж дүгнээд байгаа юм. Одоо сэр, АН тэртээ хоол тасарчихлаа. Дүнхүүрч
яваад гүйцэхгүй юм болов. Хүүхдийн мөнгө, оюутны тэтгэлэг, зээлийн хүүд иргэд,
сонгогчид хууртахаа больсон шүү.

Амар