Томчууд гэж том сэтгэж, “том юм” хийдэг хүнийг хэлдэг юм гэж хэн нэгэн хэлсэн байдаг. Манай зарим томчуудын идэж буй хоол хүнс, амьсгалах агаар, хэрэглэж байгаа хэрэглээ нь цаагуураа л том тэднийг нялхруулаад байх шиг. Энгийн ард бид яахав, хоёр идэхгүй хоосон хонохгүй гэхдээ эгэл бүхнийг эдэлж, хэрэглэж дассан улс.
Биднээсээ нарийлан байж өөрсдийгөө бордож байгаа тэр тансаг хэрэглээнээсээ болоод өнөөдөр тэд өл ч даахгүй, өчүүхэн нялцгай амьтад болж мутацилагдаж байгаа бололтой. Эсвэл тэдний баашлах башир арга уу? Жишээ сөхье.
2010 онд УИХ-ын тамгын газрын Гадаад харилцаа хамтын ажиллагааны хэлтсийн зөвлөх Ц.Жаргалсайхан улсын нууц задруулсан, эх орноосоо урвасан хэргээр Чингэлтэй дүүргийн шүүхээс чанга дэглэмтэй хорих ангид 17 жилийн хорих ял сонсоод л шоконд орж, бие нь муудсан гэдэг. Түүний ар гэрийнхэн хятадад биш, орост мэдээ дамжуулсан гэж хүртэл хэлсэн байдаг тухай хэвлэлээр бичиж байсан.
Хамгийн сүүлд гэхэд, Ерөнхий сайд асан С.Баяр харшил, багтраа өвчнөөс болж бие нь муудсан, эмнэлгийн тусламж цаг алдалгүй үзүүлсэн. ТЕГ-ын дарга асан Б.Ариунсан тулуй, чихрийн шижин өвчин хүндэрсний улмаас мөн тэндээ эмнэлэгт эмчлүүлж байгаа тухай хэвлэлүүд мэдээлж байна.
“Жаст”-ын Ш.Батхүүгийн хувьд чихрийн шижин өвчин нь хүндэрсэн гэснийг нь ХЭҮК-оос шалгаад гайгүй гэж байгаа.
Үүнээс өмнө их олон үйл явдлууд өрнөсөөн. Өрнөл болгонд өвчин хэлж баашлах нь өнөөдөр хэргээс мултрах, өдөр хоног өнгөрөөх, цаг хугацаа хожих арга саам болж харагдах болсныг захын хүн хэлэх болж.
Өмнөх цаг үеэс дурьдвал, их хэмжээний мөнгө угаасан хэрэгт холбогдсон МИАТ-ийн удирдлагууд болон Төрийн өмчийн хороонд ажиллаж байсан С.Батхишиг, “Монголиан Эйрлайнес” компанийн эзэн Ч.Хоролсүрэн тэргүүтэй холбогдогч нарыг Цагдан хорих 461 дүгээр ангид саатуулан шалгажээ. Гэтэл энэ үеэр буюу 2013 оны эхээр Ч.Хоролсүрэнгийн биеийн байдал муудаж эмнэлгийн тусламж авах шаардлагатай болжээ. Тэрээр бие муутай нэгэн аж.
МАХН-ын дарга Н.Энхбаярын тухай түмэн олон бүгд санаж байгаа. Шоронд байхдаа тэрээр өлсгөлөн зарласнаас болж бие нь муудаж эмнэлгийн бараа харсан. Улмаар Солонгос улсад хүртэл эмнүүлээд ирсэн. Түүний хувьд хэд хэдэн удаагийн хагалгаанд орсноос солонгост эмчлүүлж байхдаа хүртэл бие нь муудсан гэсэн мэдээлэл байдаг.
Зам тээврийн яамны Төрийн нарийн бичгийн дарга асан, “Монголын төмөр зам” ТӨХК-ийн ТУЗ-ийн дарга асан Б.Батзаяа мөн л ШШГЕГ-ын харьяа цагдан хорих 461 дүгээр ангид 2015 оны аравдугаар сараас саатуулагдаж байгаад 2016 оны эхээр өлсгөлөн зарласнаас болж түүний хоёр бөөр нь муудаж, уушги нь эдээлсэн гэсэн. Б.Батзаяаг шинэ төмөр замтай холбоотой хэргээр Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсээс саатуулсан байдаг юм.
Эрүүл мэнд спортын сайд Г.Шийлэгдамбыг 2015 оны арваннэгдүгээр сарын 4-нд Авлигатай тэмцэх газраас баривчлан саатуулан хорих 461-р ангид хориход мөн л түүний биеийн байдал муудсан талаар өмгөөлөгч нь хэлж байв. Тиймээс батлан даалтад гаргаж, биеийг нь эмчлүүлэх хүсэлтийг гаргасан ч хүлээн авч байгаагүй юм.
Мөн 2015 оны арванхоёрдугаар сарын сүүлчээр, С.Зоригийн амь насыг хөнөөсөн хэрэгт холбогдуулан Б.Булганыг хорьсноос хойш сар гаруйн хугацааны дараа Б.Булганы биеийн байдал муу байгаа талаар эх сурвалж мэдээлэв.
Түүнчлэн энэ үед Ерөнхий сайд асан Н.Алтанхуягийн ахлах зөвлөхөөр ажиллаж байсан Л.Гансүхийн бие муу байгааг эх сурвалжууд мэдээлж байлаа. Тэрээр “Нүүрс” хөтөлбөрийг хэрэгжүүлэхдээ 3.6 тэрбум төгрөгийг завшсан хэмээн шүүхээс 4.6 жилийн ял сонсон хоригдож байв. Түүний хувьд бөөрний архаг үрэвслээр өвдсөн байж болзошгүй гэсэн бөгөөд хорихын эмнэлгээр эмчлүүлэхээс татгалзсан гэж тухайн үед мэдээлж байсан юм. Л.Гансүх өмнө нь БНСУ-д эмчилгээ хийлгүүлж байсан аж. “Нүүрс”-ний гэх хэрэгт холбогдсоноос хойш, эмчилгээгээ тасалдуулсан тул ясны хавдрын улмаас хөлийнхөө хурууг хүртэл тайруулсан гэх бөгөөд сүүлд нь түүний бөөрний архаг үрэвсэл сэдэрч, бие нь тааруу байгаа тул эмнэлэгт хэвтүүлэх гэсэн боловч ийнхүү эмнэлэгт хэвтэхээс татгалзсан гэж байв.
Энэ мэтээр нэг бүрчлэн дурьдвал цаг зав багагүй орно. Учир нь тийм хэрэгт холбогдсон тэр хүний “бие мууджээ” гэх мэдээлэл тухай бүрт “шуурхай” хүрдэг, өнөөдөр ч хүрч байна. Эрүүл саруул байсан ч өлсгөлөн зарлаж байгаад л биеэ өвтгөж орхино.
Хэрэгт орооцолдсон, холбогдсон, сэжиглэгдсэн, яллагдагчаар татагдсан гэх энэ мэт өнгөтэй, мөнгөтэй томчууд төмөр торны ард орохоороо л учиргүй бие нь муудацгаах юм. Нарсанд орсон тэдэнд наранд байгаа хэн нэгэн хор хүргэдэг юм болов уу гэлтэй. Аалзны тор шиг сүлжилдсэн томчуудын энэ холбоо сүлбээ, далд нууц бүхний ард тэдний л эрх ашиг явж байдаг гэдэг нь нэгэнтээ тодорхой болсон. Эрх чөлөөтэй явахдаа эмнэлгийн бараа огт харахгүй хэрнээ, илчлэгдээд, ороогдоод хоригдохоороо элдэв зүйлийн өвчин тоочиж, амь тавихаас наагуур юм болно. Тэднийг хэн нэгэн эрүүдсэн үү? гэвэл үгүй бололтой. Ингэж хэлэхийн учир гэвэл, ихэвчлэн ужиг өвчний оноштой байхыг лавтай та анзаарах хэрэгтэй.
“Цагдан хорих 461 дүгээр ангид бүх хүн яг ижил нөхцөлтэй байдаг. Эмнэлгийн тусламж ч цаг алдалгүй авдаг болсон.” гэдгийг ч ХЭҮК-ийн дарга Ж.Бямбадорж хэлж байна.
Хориход өрнөдөг энэ ер бусын мутацид зөвхөн томчууд л өртөж өвчлөөд, өвдөг сөхрөөд, үхэлд хүрэх гээд байдаг нь сонирхолтой. Баашлах энэ башир аргын цаана юу нуугдаж, бас ямар тохиролцоо өрнөхийг харин бид таашгүй.
Хүний амьд явах эрхийг хуулиар баталгаажуулсан байдаг ч, бусдын энэ эрхийг далдхан булааж яваа зарим томчууд булан тохойд бултаж үлдэх вий гэсэн болгоомжлол хаа сайгүй байгааг нуух юун. Тэгэхээр тэднийг шорон гэх төмөр тор, түүнд орох айдас, хууль цааз, хулчгар зан л өвтгөдөг юм болов уу?
