Монгол Улсын нийслэл Улаанбаатар хотноо 2018 оны 4 сарын 20-21-нд олон улсын оюутан, залуу судлаачдын “Оюутны спорт: Үндэстний эрүүл мэнд, хөгжил дэвшил” сэдэвт эрдэм шинжилгээний 8 дугаар их хурал амжилттай зохион байгуулагдаж өндөрлөө. Хурлын үйл ажиллагаанд оролцохоор ОХУ, БНХАУ, Латви, Казахстан, Тажикстан, Украин, БНСУ, Япон, Армен, Узбекстан, Болгар, Беларусь зэрэг 17 орны их, дээд сургуулийн 70 гаруй залуу судлаач, эрдэмтэн, доктор, ректор захирлууд биечлэн Монгол оронд хүрэлцэн ирсэн юм.
Хурлыг Олон улсын спортын их, дээд сургуулийн холбоо, Боловсрол, соёл, шинжлэх ухаан, спортын яам, Монголын оюутны спортын холбоо (МОСХ), Үндэсний биеийн тамирын дээд сургуулиас (ҮБТДС) эрхлэн явуулсан байна. Хурлын нээлтийн үйл ажиллагаа 4 сарын 20-ны 09:00 цагаас “Тусгаар тогтнолын ордон”-ы 3 давхарын бага танхимд боллоо.
Нээлтийн ёслолын үйл ажиллагаанд Боловсрол, соёл, шинжлэх ухаан, спортын сайд Ц.Цогзолмаа, Олон улсын спортын их, дээд сургуулийн холбооны тэргүүн, академич К.К.Закирьянов, МОСХ-ны Ерөнхийлөгч, ОУОСХ-ны Ерөнхий санхүүч Д.Баясгалан, Үндэсний БТДС-ийн ТУЗ-ийн дарга Г.Даваасүрэн нарын зэрэг хүндэт зочид төлөөлөгчид оролцон баяр хүргэж үг хэлэв. Нээлтэнд Монгол Улсын 20 гаруй их дээд сургуулиудын захирал, биеийн тамирын тэнхимийн эрхлэгч нар, спортын төрийн болон төрийн бус байгууллагуудын төлөөлөгч, оюутан залуучууд урилгаар оролцлоо.
Хурлын нээлтийн ёслолын үеэр хүндэт зочин К.К.Закирьянов болон профессор Д.Бордух нарт “Үндэсний БТДС”-ийн хүндэт доктор, МОСХ-ны Ерөнхий НБДарга Д.Жаргалсайханд дэд профессорын цол олгох ёслол болов. Нээлтийн үеэр зочид төлөөлөгчид зориулсан оюутны урлагийн тоглолт боллоо.
Нээлтийн дараах нэгдсэн хуралдаанд ҮБТДС-ийн захирал, хурлын Зохион байгуулах хорооны дарга, доктор (Sc.D) профессор Л.Алтанцэцэг “Дээд боловсролын байгууллага дах биеийн тамир, спортын өнөөгийн байдал, тулгамдаж байгаа асуудлууд, МОСХ-ны Ерөнхий нарийн бичгийн дарга, доктор Д.Жаргалсайхан “Оюутны спортын хөгжлийн өнөөгийн байдал, дүгнэлт, хийх ажил” сэдвээр илтгэл тавин ерөнхий хэлэлцүүлэг хийв. Ийнхүү нээлтийн ёслол, нэгдсэн хуралдааны дараа МУИС-ийн шинэ номын санд нэгэн зэрэг 5-н салбар хорооны хуралдаан хуваагдаж явагдан илтгэлүүдийг хэлэлцлээ.
Энэхүү эрдэм шинжилгээний их хуралд орноос алдартай эрдэмтэд ирснээс Олон улсын спортын их, дээд сургуулийн холбооны тэргүүн, Олон улсын оюутны спортын холбооны (ОУОСХ) Гүйцэтгэх хорооны гишүүн, академич, доктор (Sc.D), профессор К.К.Закирьянов, ОХУ-ын Москва мужийн Биеийн тамирын их сургуулийн ректор, ОХУ-ын оюутны спортын холбооны Ерөнхийлөгч, доктор (Sc.D), профессор С.С.Сейранов, Казакстаны Биеийн тамирын их сургуулийн тэргүүн дэд ректор доктор, профессор А.С. Махаганов, Украины Биеийн тамирын их сургуулийн профессор, доктор (Sc.D), академич В.Н.Платонов, Тажикстаны Биеийн тамир, спортын дээд сургуулийн проректор, доктор, профессор Д.А.Каримова нарын зэрэг дэлхийн спортын салбарын тэргүүлэх эрдэмтэд энэхүү хурлын үйл ажиллагаанд хүрэлцэн ирж оролцлоо.
Хурлаар оюутны спортын хөдөлгөөний туршлага, асуудал, хэтийн төлөв, БТС-ын анагаах ухаан, биологийн асуудлууд, БТС-ын онол арга зүй ба сэтгэл судлалын асуудал, БТС, аялал жуучлал, спортын үйлчилгээ, эдийн засаг, хүмүүнлэгийн асуудал, оюутны спортын удирдлага, зохион байгуулалтын асуудлууд, хүн амын эрүүл мэндийг бэхжүүлэхэд оюутны спортын үүрэг, мэргэжлийн боловсролын их, дээд сургуульд суралцагчдын бие бялдар, бэлтгэлжилтийг сайжруулах асуудал, оюутны спортыг хөгжүүлэх, оюутны олон улсын арга хэмжээ, спортын тэмцээн, биеийн тамирын арга хэмжээ зэрэг олон асуудлаар санал дүгнэлтээ гарган, хэлэлцүүлэг явуулж, асуудлыг шийдэх арга замын талаар хөндөн ярилцлаа.
Хурлын материалд 319 судлаач түүний дотроос 240 гадаадын 79 Монгол улсын залуу судлаач нарын хамтарсан болон 148 илтгэлийн бүтээл, түүний дотроос гадаадын 119 илтгэл, дотоодын 29 илтгэл ирж тэдгээр нь гадаадын 37 их, дээд сургууль, дотоодын есөн их, дээд сургуулийн илтгэгч нар оролцсон юм. Залуу судлаач нараас 3 илтгэлийг шалгаруулан шагнаж, урамшуулав.
Залуу судлаач, оюутан, магистр, докторантын илтгэлүүдийг багтаасан 502 хуудас бүхий эрдэм шинжилгээ, судалгааны эмхэтгэл бүтээл энэ хурлаас гарчээ. Ийнхүү Монгол Улсад спортын хамгийн том цар хүрээтэй, өргөн хэмжээний эрдмийн хурал амжилттай боллоо.
БОЛОВСРОЛ, СОЁЛ, ШИНЖЛЭХ УХААН, СПОРТЫН ЯАМ
ОЛОН УЛСЫН СПОРТЫН ИХ, ДЭЭД СУРГУУЛИЙН ХОЛБОО
МОНГОЛЫН ОЮУТНЫ СПОРТЫН ХОЛБОО
ҮНДЭСНИЙ БИЕИЙН ТАМИРЫН ДЭЭД СУРГУУЛЬ
