Ингэж байхаар бүхлээрээ огцорчихвол яасан юм бэ

Түгжил
Төмөрийг биш, төрийг минь самарч гүйцлээ. Энд адуу хариулж яваа андыгаа араас
нь дүрчихээд л зугтаж оддог, уран зохиолын баатрын тухай бус харин энэ цаг үед
төрийн ажлыг жинхэнэ утгаар нь гацааж, цаг нөхцөөж буй \”гонжоомтой түгжилүүд”-ийн
тухай дурдаж байгаа болно.

2012 оны
УИХ-ын сонгуулиар АН-ын олонх болсон нэгэн парламент бүрдэв. Энэ үед л
хэвлэлүүд \”мордохын хазгай” гэгч үгийг маш ихээр хэрэглэж, бичицгээж байлаа. АН-даа
ч биш, МАН-даа ч биш ерөөсөө л энэ парламент байх ёсгүй байж л дээ. Гэвч байх
ёсгүй зүйл байсаар дөрөв дэх жилдээ орчихлоо. Тэд олигтойхон шийдвэр ч гаргаж
чадсангүй. Хэлэлцэж буй асуудлууд нь нэг бол гацаанд орж, нэг бол хууль
зөрчинө. Ингэж явсаар л өнөөдрийг хүрч байна.

Сүүлдээ УИХ-ын
даргаа огцруулах тухай яригдах боллоо. З.Энхболд гишүүдийнхээ үгийг хэлүүлэхгүй
микрофоныг нь хааж, өөрийн үзэл баримтлалаар, өөрийн эрх ашгаар УИХ-ыг удирдаж
байгаа гэж МАН-ын бүлгээс үзэж, огцрохыг шаардаж, мэдэгдэл хийв. Улмаар Үндсэн
хуулийн цэцэд хандаж, асуудлыг нурших шинжтэй болоод эхэллээ.

 

Өмнө МАН-ын
гишүүн Ц.Нямдорж \”Үндсэн хууль зөрчсөн нь тогтоогдож” УИХ-ын даргын албан
тушаалаас огцорч байсан түүхтэй. Гэвч УИХ-ын бүрэн эрхийн дөрвөн жилийн хугацаа
дуусахаар дуншиж байгаа энэ давчуу хугацаанд ийм асуудал өргөн бариад явж байна
гэдэг нь л өнөөх \”түгжил” нэрийн утгыг илэрхийлэх мэт.

 

Ярих,
хэлэлцэх, хийх, амжуулах ажил тэдэн багадаагүй. Гэтэл Засгийн газрын гишүүдийг
цөмсөөр сүүлдээ, Ерөнхий сайдыг огцруулах аль эсвэл УИХ-ын даргыг огцруулах
гэсэн барьцааны маягтай албан бичиг өргөн бариад сууж байна. Ийм асуудлыг
өнөөдөртөө хэлэлцээд дуусчихдаг юм биш л дээ. Олонх болсныхоо хувьд АН даргаа
хамгаалж, завсарлага авна, асуудал өргөн барьснаараа МАН бас завсарлага авна,
тэдний дунд тоглолт хийж, бялуу хүртэж байгаагийн хувьд \”Шударга ёс” эвслийн
бүлгээс ч завсарлага авна. Энэ бүгд долоо долоон хоногоор хэмжигдэж, нуршсаар
нэг л мэдэхэд байх ёсгүй парламентын \”төгсөлтийн баяр”-тай хаяа дэрлэх вий дээ.
Хамгийн гол нь завсарлага авагдсан эдгээр хугацаанд бусад хэлэлцэх ёстой чухал
асуудлууд бүгд л орхигдож мэдэх \”нигуртай”.

 

Ингэж байхаар
Улсын Их Хурлаа бүхлээр нь огцруулаад, эртхэн шиг сонгуулиа зарлачихвал яасан
юм бэ. Ийм эр зориг гаргах, улс төрийн хүчин байна уу? Телевизийн дэлгэцээр \”огцорч,
дахин сонгууль хийе” гэж хэлэх зоригт баатрууд олон харагдах юм. Яг шийдвэр
гаргаад явчих нь даанч алга. Тэгээд л бие биеэ түгжилдээд л \”насыг барах нь”
гэдэг шиг, ирэх сонгуультай золгох нь бололтой юм. Нэгэнтээ олонхийн гаргасан
шийдвэр цөөнх дөө таалагддаггүй юм бол эртхэн шиг бүтнээрээ огцроод дахин
сонгуульдчихсан нь цаг хожоод хэрэгтэй л юм шиг санагдах боллоо.

 

Амар