Хуралдаж чадахгүй \”чацга царайлж\” байхаар тарчих л даа, эртхэн сонгуулиа хийе

Өнгөрөгч даваа гаригт УИХ-ын
ээлжит бус чуулган нээлтээ хийсэн. Гэвч \”нээлтээ хийлээ” гэхээс өөр мэдээлэл
Төрийн ордноос, чуулганы танхимаас ирсэнгүй. Шалтгаан нь ирц хүрэхгүй байгаатай
холбоотой. УИХ-ын гишүүдийн ирц 50 хувьд хүрч байж хуралдах учиртай. Өөрөөр
хэлбэл 38 гишүүн танхимд ирж, картаа уншуулснаар чуулган ээлжит бусаар
хуралдаж, асуудлуудаа шийдвэрлэх ёстой аж. Гэтэл УИХ дахь МАН-ын бүлэг дахиад л
ирцээр бойтог хийж, төрийн ажлыг гацааж орхив.

 

 

Уг нь АН-ын бүлгийн 35 гишүүн,
түүн дээр \”Шударга ёс” эвслийн бүлэг, ИЗНН-ынхан нэмэгдвэл МАН-тай, МАН-гүй
хурлаа үргэлжлүүлээд байж болно. Гэвч УИХ дахь \”Шударга ёс” эвслийн бүлэг \”Н.Энхбаярыг
Шадар сайдаар томилох эсэх асуудал”-аар АН-ыг харзнаж, чуулганыг гацааж орхисон
хэрэг. Харин МАН-ын хувьд \”анхнаасаа ээлжит бусаар хуралдах ёсгүй байсан юм”
гэх байр суурьтайгаар гэдийчихсэн. Ингээд л УИХ-ын З.Энхболд ирцээ бүрдүүлж
чадалгүй гурав хоног саатчихаад байна.

 

Ямартай ч өнөөдөр 14.00 цагт
чуулганы хуралдааныг зарласан. Гишүүд ирж, ирц бүрдэх эсэх нь тодорхойгүй.
Ирцэнд хамгийн ихээр нөлөөлж байгаа МАН-ынхан \”УИХ-ын даргыг огцруулна” гэсэн юм
яриад ерөөсөө ажил хийхээ больсон гэж хэлж болно. Үүн дээр нэг хүний намынхан
нэгдчихээр л төрийн ажил гацаанд орж, хэлэлцэгдэх ёстой чухал асуудлууд
хойшлогдсоор байна.

 

Ер нь энэ парламент иймэрхүү
журмаар л өнгөрөгч гурван жил хагасын хугацааг өнгөрүүлчихлээ.

 

 

Өөрт таалагдахгүй асуудал байвал
ирцээр бойтоглоод л бусад асуудлыг нь гацааж орхидог. Харин хэн нэгнийг
огцруулах бол бүгд ирж бүтэн шөнөжин хуралддаг. Ийм л парламент бүрдэж, ийм
хувиа хичээсэн хүмүүс гишүүн нэр зүүж Монголын ард түмнийг төлөөлж төрийн
ордонд хольхилдож байна.

 

Зарим хүмүүс төрийн
байгууллагын харилцах үйлчилгээнд ажиллаж байгаа хэдэн годгор охидыг \”бидний
татварын мөнгөөр цалинжиж байж сайн ажил. Чадахгүй бол чаддаг хүнийг ажиллуул”
гээд л загинаад байгаа харагддаг. Тэгвэл энэ парламентын гишүүдийг ч бас ингэж
загинамаар байх юм. Загинаад ч зогсохгүй эргүүлэн татаж, ирцээ бүрдүүлээд улс
орныхоо тулгамдсан асуудлыг хэлэлцээд явах чадамжтайг нь сонгомоор байх юм.
Гэвч тийм эрх зүйн боломж манайд алга. Тиймээс л ирэх сонгуулийг тэсэн ядан
хүлээж, шүд зууж байна даа.

 

Энэ 76 дотор үнэхээр л ард
түмэн, улс орноо боддог хүн байвал ёс зүйтэйхэн огцрох, дараагийн сонгуулийг
зарлах зориг гаргачихаач. Даанч тийм шийртэй эр байхгүй нь ойлгомжтой. Ийм байж
ямар нүүрээрээ иргэд сонгогчидтойгоо уулзах гээд байгаа улс юм бол доо. \”Бид
ирцээ бүрдүүлж чадаагүй учраас ажил хийж чадсангүй… бид эсрэг кноп дараад хүч
түрээд байсан болохоор хуралдаа суусангүй … манай даргыг Шадар сайд болгохгүй
байсан учраас шантаач хийсээр байгаад сонгуульт хугацаа дуусчихлаа” гэж ярих
гээд байгаа юм биш биз дээ. Угаасаа үүнээс өөр юу ч ярих билээ дээ. Харамсалтай
байна. Сонгуулийн өдөр ойрхон байна даа.

 

Бүгдийг чинь эргүүлэн татаж
чаддаггүй юм аа гэхэд бүлэг бүлгээр чинь цөөнх болгоод эвлэлдэн нэгдэхээс
аргагүйд хүргэчих чадал ухаан бий байлгүй дээ ард түмэнд чинь.

 

Амар