\”… Оюутнууд мундаг юм аа\”

 

Өнөөдөр оюутнууд даварлаа… тэднийг даврааж болохгүй… оюутнууд
автобусаар үнэгүй зорчих гэлээ… гэсэн маш олон сэтгэгдэл, бичвэрүүд цахим
хуудаснаа нийтлэгдэж байна. Оюутнуудад даруулга хэрэгтэй байгаа нь үнэн. Гэхдээ
хэн ийм байдлыг бий болгов гэдгийг эрэгцүүлэх л хэрэгтэй.

Дан Монголын оюутнууд эсэргүүцэл зарлаад, задарцгаагаад байдаг юм биш.
Бүхий л улс орны оюутнууд өөрийнхөө эрхийг хамгаалж эсэргүүцэл тэмцэл хийдэг.
Тэдэнд тийм эрх бий учраас тэр шүү дээ. Өнгөрсөн жил Хонгконгод болсон \”Шүхэрт
хувьсгал”. Тус эсэргүүцлийн жагсаалын гол зорилго нь сонгуульд саналаа өгөх
эрхээ баталгаажуулах байв. Харин манай улсын оюутнуудын хувьд зарим орныг
бодвол сонгууль санал өгөх эрхтэй. Үүнээс бол улс төрийн зорилготой арга
хэмжээнд татагдах орох нь элбэг.

Хичээлийн шинэ жил дөнгөж эхэлмэгц л оюутнууд жагсаал цуглаан зохион байгуулаад
эхэллээ. Уг нь хичээл номондоо шамдах ёстой, гэтэл талбай дээр сууж, дэмий
сэлгүүцэж байна хэмээн зарим хэвлэлүүд бичжээ.

Тэд эрдэм сурах гэж ирсэн нь үнэн. Гэвч тэднийг ашиг олох хэрэгсэл, туг
дарцагаа болгож байгаа эрх мэдэлтнүүдийг эсэргүүцэх шаардлага өнөөдөр тулгарсан
гэж ойлгож байна.

Шинээр элсэх оюутан цөөрсөн учраас сургалтын төлбөр нэмэгдлээ хэмээн
сургуулийн удирдлагууд болон сайд нь мэдэгдэл хийсэн. Шинээр оюутан элсэхгүй
байх нь оюутнуудын буруу биш биз дээ. Өнгөрсөн жил 400 мянган төгрөгийн үнэтэй
байсан дотуур байр энэ жил 600 мянган төгрөг болж нэмэгдсэн байна. Дотуур
байрны төлбөр 200 мянган төгрөгөөр нэмэгдсэн нь \”даварсан оюутнууд”-ын буруу
юу. Тиймээс л тэд эсэргүүцэх эрхтэй гэж бодож байна.

Оюутнууд давардаг нь үнэн. Сар бүр 70.000 төгрөгийн тэтгэмж авдаг. Дээр нь
автобусаар үнэгүй зорчдог. Тэгсэн мөртлөө дахин үнэгүй зүйл шаардаад
эсэргүүцээд даварч байна. Тийм ээ үнэн. Гэхдээ энэ бүгдийг оюутнууд хүсээгүй. Энэ
бүгд зүгээр л сонгуулийн амлалт. Амлалт өгсөн эрхмүүд амлалтаа биелүүлсэн л
хэрэг. Оюутнууд түүнийг нь л шаардаж байна.

Сар бүр 70.000 төгрөг өгсөн нэртэй сургалтын төлбөрөөр түүнийг нь суутгаад
авчихдаг сургуулиуд олон л байдаг. Автобусанд үнэгүй явдаг гэх юм. Тэр үнэгүй
явдаг гээд байгаа картыг чинь тодорхой хэмжээнд төлбөр төлж байж л авдаг юм.
Харин үүнээхээ төлөө тэд автобусанд чичлүүлж, хараалгаж, ад үзэгддэг. Мөнгөө
төлөөд явбал амар л даа. Гэхдээ оюутан болсных энэ бүгдийг үзэх л хэрэгтэй.

Сурагчид орлогогүй хэрнээ 200 төгрөгөөр автобусанд зорчдог. Харин оюутнууд
орлоготой хэрнээ автобусанд үнэгүй зорчдог. Ялгаа нь сурагчид санал өгөх эрхгүй
гэж тайлбарцгаадаг биз. Тэгвэл сонгуулийн санал өгөх насыг өөрчилж болно шүү
дээ. Ядаж 25 болгочихвол оюутан, сурагч гээд ялгаад байх шаардлагагүй болно.

Гэвч оюутнууд ноёдод хэрэгтэй. Тиймээс л элдэв янзын амлалт өгдөг. Харин
оюутнууд чинь тэднээс амлалтыг нь нэхэж чадаж байна гэдэг талаас атаархмаар.
Тэгсэн бид яаж байна. Цалингаа нэмэгдүүлье… хүн шиг амьдаръя… хүүхдийнхээ
мөнгийг авъя… эрүүл аюулгүй орчинд амьдаръя … гээд гараад орилж ч чадахгүй
дотроо бухимдаад л, стресстээд л, түүнийгээ гэр бүлийнхэндээ гаргаад л явж
байна шүү дээ.

Энэ талаас нь харвал оюутнуудыг магтаж, дэмжмээр. Тэд таалагдахгүй зүйл
гарвал шууд л эсэргүүцэж, үзэл бодлоо илэрхийлж, хэнтэй ч хамаагүй мэтгэлзэх,
тэмцэх эрч хүчтэй байна. Харин бид дэлгэцний цаанаас тэднийг хараах мөртлөө
өөрсдөө ил гарч чадахгүй тийм хулчгар хүмүүс шүү дээ. /Энд оюутны эрхийг хамгаалдаг нэртэй бизнесийн байгууллагуудын тухай огт дурдаагүй болно./ 

Амар