Нийтдээ 60 гаруй удаагийн аллага хүн амины хэрэгтэй холбоотой гэгдэн олон улсад эрэн сурвалжлагдаж байсан гэмт хэргийн бүлгийн толгойлогч Аслан Гагиевыг Австри улсаас ОХУ-д шилжүүлж өгчээ. Түүнийг Оросын орчин үеийн түүхэн дэх хамгийн том захиалгат аллагын эзэн гэж үздэг бөгөөд Аслан Гагиевыг өчигдөр Интерполийн шугамаар Оросын аюулгүй байдлын албаныхан ердийн агаарын тээврийн нислэгээр Москвад авч ирсэн байна.
Мөрдөн шалгах хорооны дүгнэлтээр хуучин ЗХУ-ын Хойд Осетийн уугуул Аслан Гагиев нь 2004 оноос эхлэн 50 гаруй гишүүнтэй захиалгат аллагын бүлэг байгуулан онц хүнд гэмт хэрэг үйлдэж эхэлсэн ба түүний удирдсан гэмт хэргийн бүлэглэл гол төлөв Хойд Осети, Москва орчимд захиалгаар хүн алдаг байжээ. Тэдний хохирогчдын дотор Владикавказ хотын дарга Виталий Караев, Хойд Осетийн дэд захирагч Казбек Пагиев болон хуульчид, банкирууд, бизнесмэнүүд зэрэг нэр хүндтэй хүмүүс багтаж байсан байна.
Аслан Гагиев нь 2013 онд ОХУ-аас зугтан, 2014 онд олон улсын хэмжээнд эрэн сурвалжлагдаж, 2015 онд Австрийн Вена хотод баригджээ. Тухайн үед түүнийг баривчлах үед түүнээс хуурамч Болгарын паспорт гарч иржээ. Тэр цагаас хойш Австрийн тал түүнийг ОХУ-д шилжүүлэхээр ажиллаж эхэлсэн боловч хууль эрх зүйн олон асуудалтай тулгарч байсан байна. Түүнчлэн Аслан Гагиевын баруун гар болох Олег Гагиев болон гэмт бүлэглэлийн бусад гол алуурчид нь өдгөө ОХУ-д бүх насаараа хоригдох ял эдэлж байгаа юм байна. Одоогоор энэхүү алуурчдын бүлгийн 16 хүнийг хуулийнхан баривчилж чадсан бөгөөд өдгөө 13 гэмт этгээдийг олон улсын хэмжээнд эрэн сурвалжилж байгаа ажээ. Мөн уг бүлгийн есөн гишүүн нь баригдалгүй зугтаж яваа аж. Баттай эх сурвалжийн мэдээлж байгаагаар түүнийг Орост олон тооны гэмт хэрэгт буруутган шүүхээс бүх насаар нь хорих ял оноож болзошгүй юм байна.
