Миний мэддэг улс төр лав биш ээ

 

 

Улс төр гэж миний мэддэгээс шал өөр зүйл бололтой юм. Уг нь хамгийн шилдэгүүд биднийг төлөөлж улс орноо удирдан жолооддог гэж боддог байсан. Гэвч миний бодлыг эрс үгүйсгэсэн үйл явдлууд шил шилээ даран ундарсаар л байна.

Тодорхой шаардлагыг давсан хүн бүр УИХ-ын гишүүн болж, иргэдийг төлөөлж, улс орноо удирдах үйл хэрэгт оролцох эрхтэй. Гэхдээ бид хүн бүр гэхээсээ илүүтэйгээр биднээс арай ухаан саруул, холын бодолтой, удирдах чадвартай, мэдлэг өндөр хүмүүсээ төлөөлөл болгон сонгодог гэж боддог.

Гэтэл сүүлийн үед хэн дуртай нь улс төрд орох гэдэг болж. Иргэдийн санал авсан ч бай, аваагүй ч бай УИХ-д сууж, гишүүн сэтэр зүүнэ. Ёстой л оймсонд хавчуулагдаад ч болов гишүүн болохыг санаархдаг болсон байна. Оймсонд хавчуулагдаад гишүүн болж болдог учраас бүгд л тэгж санаархах нь ойлгомжтой шүү дээ.

За тэр гишүүн болохыг санаархах ч дүүрч. Хүн бүр л амьдралаа сайжруулахыг хичээх нь ойлгомжтой. Харин гишүүн болоод ханахгүй, давхар дээл өмсөхөөр зүтгэж байгаа хүмүүсийг харахаар өмнөөс ичих шиг.

Чуулганы танхимд \”Би энэ хуралд суугаад юу ч ойлгохгүй байна” гэж хэлээд сууж байсан хүнийг сайд болгох гээд нэрийг дэвшүүлсэн байх юм. Мөн УИХ-ын гишүүн гэхээсээ илүүтэйгээр идэвхтэй фейсбүүкчин, сайн гэрэл зурагчин гэж тодорхойлогддог \”эротик” гишүүнийг нэр ч тодорчихсон явж байна гээд бодохоор энэ улс төр гээч зүйл үнэхээр ойлгогдохгүй, сүүлдээ толгой эргэх боллоо. Улс их орныг удирдах ажлыг \”candy crash” тоглодог шиг ойлгомж болмооргүй л санагдах юм.

Мөн намын дарга даа зориулж хууль өргөн барьснаараа сайдын суудлаар шагнуулж байгаа хүн ч байх шиг байна. Төрийн ордон Бэлтгэл хурандаад цөм цохиулдаг \”тэр хүүхэд” хүртэл сайд болох дээрээ тулсан гэхээр миний мэддэг улс төр лав биш ээ гэдэг нь ойлгомжтой боллоо.

Яахав цахим хуудсаар улс орон хямралтай, ард иргэд бухимдалтай байгаа учраас иргэдээ хөгжөөх зорилгоор эдгээр хүмүүсийг сайдад нэр дэвшүүлсэн гэх мэдээлэл яваад байна. Энэ талаас нь харвал дэмжиж болохоор хүмүүс энэ 76-д их бий. Гэхдээ улс орон удирдах ажил тоглоом биш гэдгийг эрх биш ойлгодог ганц ч болов хүн энэ төрд байгаа гэж найдаж байна. 

Амар