Брэнд гэдэг нь хэрэглэгчийн ой тойнд үлдэх онцгой нэгэн санаа, эсвэл зарчим. Манайхан сүүлийн үед брэнд гэх тодотголтой бүхэн рүү ялгаж салгалгүй гүйлдэж, халаасан дахиа харамгүй цацах нь энүүхэнд болсон. Үнэн худал нь мэдэгдэхгүй үнэ хадсан брэндийг тэгвэл яаж хуурамчаас нь ялгаж таних вэ? Өндөр үнэтэй бүхэн брэнд гэдгийг баталж байгаа хэрэг биш гэдгийг санах хэрэгтэй. Тиймээс жинхэнэ, хуурамч брэндийг хэрхэн таних зөвлөгөөг цүнхэн дээр жишээ аван хүргэж байна.
Оёдол
Хамгийн түрүүнд оёдлыг нь хар. Болхи оёдол, далд газрууддах муу хийцийг анхаар. Далд газрууд гэдэг нь цүнхний доод тал, дотор оёдлыг хэлж байгаа юм. Ихэнхдээ хуурамч бараанууд хийц муутай байдаг. Тэд зөвхөн дууриахаас бус хийцэнд төдийлөн анхаардаггүй юм. Оригинал цүнхний гадна оёдлыг материалд нь сайн шигтгэж, нэгэн жигд цэвэрхэн оёсон байдаг бол харин дуураймал цүнхний оёдол хайш яайш арзгар байдаг. Түүнчлэн дуураймал цүнхний арьсан деталиуд үрчгэр, нимгэн байдгаас гадна гялалзаж харагддаг аж. Хэрвээ хийц нь энгийн байвал хуурамч байх магадлалтай.
Материал
Хуурамч цүнхнүүдийн материал жинхэнэ брэндийн цүнхнүүдийн материалтай адилгүй. Ихэнхдээ хуурамч цүнхнүүд маш хатуу, болхи байдаг. Мөн өнгө алдсан, толботой байх нь бий. Хүмүүс жинхэнэ цүнхнүүд дотортой байдаг гэж андуурах нь бас бий. Гэтэл үнэндээ жинхэнэ цүнхнүүд доторгүй байдаг.
Шошго
Хаяг, шошго дээр байгаа үгийн алдаануудыг анзаар. Тэд нэрийг нь алдаатай бичдэг. Зөвхөн нэр бус заавар гээд бүгдийг нь шалгаж үзэх хэрэгтэй. Ихэнх чанартай бараануудын шошго нь оёгдсон байдаг бол хуурамч бараануудын шошгыг өлгүүрээс нь өлгөсөн байдаг. Тэгэхээр та онлайнаар жинхэнэ цүнхнүүдийн хаяг шошгыг хараад ялгааг нь харж болох юм. Хуурамч цүнхнүүдийн шошгонууд хямд материалаар хийгдсэн, заавар нь тодорхойгүй байдаг.
Цүнхэн доторх баталгааны бичиг
Баталгааны бичигтэй цүнх бүхэн оригинал гэсэн үг биш. Харахад л андашгүй. Хуурамч цүнхний бичиг нь арзайсан үсэгтэй, томоор бичсэн тоотой, болхи хийцтэй байдаг. Харин оригинал цүнхний бичиг нь эмх цэгцтэй, цэвэрхэн харагддагаас гадна гадуураа алтлаг метал хүрээтэй байдаг байна.
Cав боодол
Мэдээж брэнд бүтээгдэхүүнүүд сайтар хамгаалагдсан байдаг. Сав дотор нь ороох цаастайгаа байх ба цүнх хийх ууттайгаа гээд бүх зүйлс нь хамт ирдэг юм. Хамгийн гол нь цүнхний сав, уут нь яг цүнхэндээ зориулагдсан буюу хэт том, хэт жижиг бус яг таарсан байх ёстой. Хэрвээ таныг цүнх авахад өөрийнх нь зориулагдсан ууттай нь өгөхгүй бол эргэлзээтэй гэсэн үг шүү. Мэдээж албан ёсны дэлгүүрүүдээс авсан нь дээр. Хэн нэгэн өөрөө хэдхэн ширхэгээр зарж борлуулах нь ихэнхдээ хуурамч байдаг.
Лого
Логонуудыг нь хар. Та өөрийн мэдлэгээ өргөжүүлэх хэрэгтэй. Жишээ нь Louis Vuitton-ы логонууд хэзээ ч хоёр талдаа байдаггүй юм. Зөвхөн нэг талдаа л логогоо байрлуулдаг.
Үүнээс ч олон ялгаануудыг брэнд тус бүр дээр нь олж харж болно. Тэгэхээр авахыг хүсч буй брэндийн цүнхүүдээ сайтар судлах хэрэгтэй.
