Төрийн албан хаагч тэтгэвэрт гарахад үзүүлдэг, нэг удаагийн буцалтгүй тусламж саатаад байна

УИХ-ын гишүүн Х.Болорчулуун, Ц.Даваасүрэн, С.Ганбаатар, Г.Уянга
нар өчигдөр /2015.09.04/ Сангийн яаманд ажиллав.

Энэ үеэр УИХ-ын гишүүн Ц.Даваасүрэн чуулганы завсарлагааны
хугацаанд тойрогтоо ажиллах явцад иргэдийн тавьсан хүсэлтийн дагуу зарим
зүйлийг Сангийн яамнаас тодруулах шаардлага үүссэнийг танилцуулав.

Эдийн засгийн нөхцөл байдал иргэдийн амьдралд сөргөөр нөлөөлж
байгааг тэрээр тэмдэглээд, төрийн албан хаагчид, тэр дундаа боловсролын салбарт
ажиллаж буй албан хаагчид тэтгэвэрт гарах үед нь үзүүлдэг нэг удаагийн
буцалтгүй тусламжийн асуудлыг хэрхэн зохицуулах болсон талаар, түүнчлэн \”Монгол
мал” үндэсний хөтөлбөрийн хүрээнд малчдад олгох арьс, шир, ноос, ноолуурын
урамшууллын талаар тодруулав.

Төрийн албан хаагчдыг тэтгэвэрт
гарах үеэр үзүүлдэг нэг удаагийн буцалтгүй тусламжийг олгох асуудал төсвийн
хүндрэлтэй холбоотойгоор удааширч байна. Төрийн бүх байгууллагаас энэ онд
тэтгэвэрт гарах хүмүүсийн судалгааг хийж, 2016 оны төсвийн төсөлд тусгах байдлаар
санхүүжилтийг шийдвэрлэхээр төлөвлөснийг тус яамны Төсвийн бодлого,
төлөвлөлтийн газрын дарга Ж.Ганбат танилцууллаа.

Мөн тэрээр, \”Монгол мал” үндэсний хөтөлбөрийн хүрээнд малчдад
ноос, арьс ширний урамшуулал, газар тариалангийн салбарт хүнсний улаан
буудайн урамшуулал олгодог.

2015 онд ноосны урамшуулалд 18 тэрбум, хүнсний улаан буудайн
урамшуулалд 25 тэрбум төгрөг төсөвлөсөн. Эдгээр урамшууллыг олгохдоо үр дүнгийн
үзүүлэлтэй нь уялдуулах бодлого баримталж буйг танилцуулсан юм.

УИХ-ын гишүүн Г.Уянга, сургууль, цэцэрлэгийн хүртээмжийг
нэмэгдүүлэх нь тулгамдсан шаардлага болохыг онцлоод, боловсролын салбарын
бүтээн байгуулалтын төсөв, хөрөнгө оруулалтын талаар тодруулж, Хүүхэд харах
үйлчилгээний тухай хуулийг хэрэгжүүлэхэд шаардлагатай төсвийн бэлтгэлийг
лавласан юм.

Мөн энэ үеэр УИХ-ын гишүүн С.Ганбаатар, эдийн засгийн нөхцөл
байдал хүндэрсэнтэй холбоотойгоор хөдөлмөр эрхлэгчдийн цалинг нэмэгдүүлэх
шаардлагатай гэсэн юм. Тэрээр Засгийн газар төрийн албан хаагчдын цалинг
тодорхой хэмжээгээр нэмэх амлалт өгсөн нь биелэх боломжтойг тодрууллаа.

Цалин нэмэх эх үүсвэр болгон 90 тэрбум төгрөгийг төсвийн
тодотголоор баталсан. Энэ жил цалин нэмбэл 2016 оны төсөвт 360 тэрбум төгрөг
шаардлагатай. Харин УИХ-аас гаргасан төсвийн хүрээний мэдэгдэлд 2016 оны
төсвийн нийт зардлаа 2015 оныхоос 115 тэрбум төгрөгөөр бууруулах шаардлага
тавьсан. Тиймээс бодлогын сонголтыг Засгийн газрын түвшинд шийдвэрлэнэ гэж
Сангийн яамны Төрийн нарийн бичгийн дарга Х.Ганцогт хэлэв.

УИХ-ын гишүүн Х.Болорчулуун, Сангийн яам Монгол Улсын нэгдсэн
төсвийг төлөвлөж, УИХ-д өргөн барьдаг. Яам судалгаа, тооцооллыг нарийн гаргасан
тохиолдолд цаг алдалгүй улсын төсвийг батлах боломжтой. Тиймээс УИХ-ын гишүүд
Сангийн яамны мэргэжилтнүүдтэй уулзаж, улсын төсвийн талаар ярилцах
шаардлагатай гэв хэмээн
Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс
мэдээлэв.