СГЗ, нэвтрүүлэгч Жамъянгийн Батбаяр 2018 оны долдугаар сарын 23-ны өдөр өвчний улмаас таалал төгсчээ. Тэрбээр өнгөрсөн тавдугаар сард зүрхний хүнд хагалгаанд орсон бөгөөд биеийн байдал нь сайнгүй байсан аж.
Энэ тухай мэдээллийг МҮОНТ-ийн нэвтрүүлэгч, хөтлөгч Бужгарын Гантигмаа өөрийн цахим хуудаснаа нийтэлж, гашуудлаа илэрхийлсэн байна. Тэрбээр “Бурхан өөрөө ахыг минь илгээсэн юм, буцаагаад биднээс авчээ. Наадмаар Төв асарт ахтайгаа хамт ажиллана гэж их баярлаж байсан юм. Бие нь чилээрхээд хөөрхий та минь ганцхан энэ Наадмыг өнжсөн, өнжилгүй ажиллахгүй яав…Эвий ах минь! Ум сайн амгалан болтугай” гэжээ.
СГЗ, нэвтрүүлэгч Жамъянгийн Батбаяр нь Баянхонгор аймгийн Галуут суман төрж өссөн. Нэвтрүүлэгч сэтгүүлч, хөтлөгч мэргэжлээр улсдаа нийт 43 жил тасралтгүй ажиллажээ.Талийгааячийн гэр бүл, үр хүүхэд, төрөл төрөгсөд, ах, дүү хамаатан садан, анд найз, журмын нөхдөд нь гүн эмгэнэл илэрхийлье.
