Гол усны түвшин аюултай түвшингээс давж үерлэсэн энэ үед иргэд өөрсдийн хайхрамжгүй байдлаасаа болж живэх, урсах тохиолдлууд тасрахгүй байна. Тухайлбал, Нийслэлийн Баянзүрх дүүргийн 11 дүгээр хороо, “Ассем Вилла” хотхоны харалдаа Туул голд 08-30 УНГ улсын дугаартай “Прадо” загварын суудлын автомашин 2 зорчигчтой урсчээ. Энэ талаар энэ сарын 29-ний өдрийн 18:24 цагт мэдэгдсэний дагуу нийслэлийн Аврах ангийн алба хаагчид 18:53 цагт очиж тус дүүргийн харьяат 28 настай иргэн Б /эрэгтэй/, 27 настай иргэн Э /эмэгтэй/ нарыг аюулгүй газарт гаргаж, автомашиныг татах боломжгүй тул орхисон байна.
Мөн үерт 1700 толгой бог мал урссан байна. Тодруулбал, Өмнөговь аймгийн Баяндалай сумын Баян багийн “Ховил” гэдэг газар Малчин Э-ын мал үерт урссан тухай дуудлагыг энэ сарын 28-ны өдрийн 09:40 цагт хүлээн авчээ. Тус аймгийн Онцгой байдлын газрын алба хаагчид, нутгийн захиргааны байгууллагын хүмүүсийн хамт нийт 15 хүн 13:05 цагт очиж 1000 орчим малыг олсон бөгөөд 100 гаруй бог мал нь хорогдсон байна. Үлдсэн малыг эрэн хайх ажиллагаа үргэлжилж байна.
