Нийслэлийн Боловсролын газар, Хөдөлмөр эрхлэлтийн газар болон, Улаанбаатар смарт карт оюутнууд нийтийн тээврээр хөнгөлөлттэй зорчих талаар өнөөдөр хамтарсан мэдээлэл хийлээ.
Нийслэлийн боловсролын газраас Улаанбаатар хотод үйл ажиллагаа явуулж буй, их дээд сургууль, коллежуудад нийтийн тээврээр хөнгөлөлттэй зорчих цахим картыг түгээх ажлыг дөрөв дэх жилдээ зохион байгуулж байна. Энэ хичээлийн жил нийт 87 төрийн болон төрийн бус их дээд сургуулийн 108.970 оюутан нийтийн тээврээр хөнгөлөлттэй үнээр зорчих аж. Сургуулиуд хөнгөлөлттэй үнээр зорчуулах оюутныхаа тоог наймдугаар сарын 29-нд нийслэлийн боловсролын газар ирүүлэх ёстой юм байна.
Энэ талаар Нийслэлийн Боловсролын газрын Захиргааны хэлтсийн дарга Л.Буянтогтох хэлэхдээ “Картын сунгалт болон шинээр олгох ажлыг зохион байгуулж буй Улаанбаатар смарт компанийн хувьд сургуулиуд шаардлагатай бүх материалаа өгчихвөл тухайн сургуулийн оюутны тооноос хамаараад ажлын 1-2 хоногт картыг нь буцаан олгох боломжтой” гэлээ.
Мөн Улаанбаатар смарт компанийн үйл ажиллагааны менежер Б.Хонгорзул хэлэхдээ “Дэвшин суралцаж байгаа оюутнуудын картыг хүлээн авахад бэлэн болсон ч одоогоор сургуулиуд материалаа өгөөгүй байгаа. Сунгалт хийх картуудыг хүлээн авч буцаах ажлыг есдүгээр сарын 8-нд багтаан дуусгахаар төлөвлөсөн. Мөн өнгөрсөн жил цахим картаа үрэгдүүлсэн оюутнууд шинээр авах хүсэлтээ гаргаснаар есдүгээр сарын 10-ны дотор шинээр авах боломжтой. Олон сургуулиас зэрэг зэрэг хүсэлт өгч ачаалал нэмэгдэн, Улаанбаатар смарт карт газар дээр ачаалал үүсдэг. Тиймээс ачаалал ихтэй үед гэрээт ажилтан авч ажиллуулахаар болоод байна” гэв.
Шинээр авсан болон сунгалт хийлгэсэн цахим картаа хаяж, үрэгдүүлсэн, гэмтээсэн оюутнууд есдүгээр сарын 10-наас хойш Нийслэлийн үйлчилгээний нэгдсэн төвийн дөрвөн салбарт хандаж картаа дахин авах боломж бүрдэх юм байна.
-Оюутнуудын сургуульдаа бүрдүүлж өгөх материалын жагсаалт-
Анх удаа/Их, дээд сургуулиуд, коллеж, МСҮТ-д шинээр элсэгч/ захиалж байгаа бол:
-Цахим төлбөрийн карт захиалах мэдүүлэг бөглөх
-Иргэний үнэмлэхийн хуулбар
-Оршин суугаа газрын тодорхойлолт
-3,600 төгрөг төлсөн баримт
Сунгалт хийлгэх оюутнууд:
-Өөрийн цахим төлбөрийн карт
-Сунгалтын хураамж 1,000 төгрөгийг төлсөн баримт
Дахин/Картаа хаясан, үрэгдүүлсэн, гэмтээсэн буюу өмнөх жилүүдэд карт авч байсан/ захиалж байгаа бол:
-Цахим төлбөрийн карт захиалах мэдүүлэг бөглөх
-Иргэний үнэмлэхийн хуулбар
-Оршин суугаа газрын тодорхойлолт
-4,600 төгрөг төлсөн баримт
