АСЕМ-ын буянаар түргэн тусламжид 10 машин нэмэгдэнэ

 

 

Би санах юм, өнгөрсөн 10-аад жилийн дотор гэр бүлийн гишүүдийнхээ өмнөөс 10 хүрэхгүй удаа л түргэн тусламж дуудахад байсан. Тэр бүрт түргэн тусламж маш удаж ирдэг байсныг одоо ч мартдаггүй. Шөнийн 01:00 цагт дуудлага өгөхөд үүрийн 05:00 цагт ирж, өглөө ажилтай хүмүүс унтаж амрах яамай гэхэд ойтой хүүхдийг бүтэн 4 цаг уйлуулж зовоож байв.

Сүүлдээ ч, түргэн тусламжийг хүлээлгүйгээр харьяа хүүхдийн эмнэлгийг зорьдог болсон. Нэг удаа таксины жолооч ах \”Ах нь таван хүүхэдтэй. Манай эхнэр хүүхдүүдээ нялхад нь уйлахаар дагаад уйлчихдаг байсан. Социализмын үед түргэн тусламж маш хурдан шуурхай ирдэг байсан. Нэг өдөр бүр гурван дуудлага өгч, гурван удаа түргэн ирж байсан\” гэв. Харин би гэдэг хүн түргэн ирэхгүй болохоор шөнийн 00:00 цагт такси бариад явж байх жишээтэй.

Харин түргэн тусламжийнхан оройтдог шалтгаанаа манайх ганцхан машинтай, олон дуудлагатай учраас хэмээн \”ам таглана\”, бүтэн 10-аад жилийн хугацаанд шүү дээ. \”Түргэн тусламжид тэдэн машин бэлэглэлээ\” хэмээх мэдээ хааяа нэг сонсогддог ч нийслэлийн түргэн тусламжид бүтэн 10-аад жилийн хугацаанд хоногтоо 1 л машин үйлчилж байгаа юм байх. Тэгвэл АСЕМ-ын буянаар түргэн тусламжийн төв /103/ 10 шинэ машинтай болохоор боллоо.

Тиймээс түргэн тусламжид хойшид хоногтоо 1 машин явахгүй байх хэмээн найднам. НИТХ-ын Тэргүүлэгчдийн ээлжит хуралдаан өчигдөр болж хуралдаанаар нийслэлийн Засаг даргын нөөц хөрөнгөөс түргэн тусламжийн 10 машин худалдан авах тухай асуудлыг хэлэлцэн баталсан байна.

Түүнчлэн өчигдрийн байдлаар нийслэлийн хэмжээнд эрүүл мэндийн яаралтай түргэн тусламжийн үйлчилгээнд 70 машин явж байгаа хэмээх мэдээллийг албаныхан өгсөн юм. Гэсэн ч энэ нь яаралтай тусламж үйлчилгээ үзүүлэхэд хангалттай биш гэдгийг Эрүүл мэндийн газраас онцолжээ.

Олон улсын стандартаар 8-10 мянган хүн тутамд нэг дуудлагын машин байх ёстой бөгөөд нийслэлийн хэмжээнд яаралтай түргэн тусламжийн үйлчилгээнд явах 130 машин байвал эрүүл мэндийн түргэн тусламжийн үйлчилгээ сайжрах боломжтой аж.

Тиймээс нийслэлийн иргэдэд үзүүлэх эрүүл мэндийн түргэн тусламжийн үйлчилгээг сайжруулах, цаашлаад АСЕМ-ын уулзалтад ирсэн зочид, төлөөлөгчдийн эрүүл мэнд, аюулгүй байдлыг хангах зорилгоор иж бүрэн тоноглогдсон түргэн тусламжийн үйлчилгээнд явах 10 машиныг нийслэлийн Засаг даргын нөөц хөрөнгөөс худалдан авахаар шийдвэрлэсэн нь энэ.

Эдгээр 10 машиныг нийт 1 тэрбум 30 сая төгрөгөөр худалдан авах аж.  Гэхдээ шинээр авсан түргэн тусламжийн машинуудыг АСЕМ-ын уулзалтад ашиглах агаад зочид төлөөлөгчдийн байрлах газруудад байршуулах юм байна.

Харин АСЕМ-ын уулзалтын дараа түргэн тусламжийн машинуудыг дүүргүүдэд хуваарилан өгнө хэмээн Нийслэлийн ЗДТГ-аас мэдээллээ.

 Нинж