Авлигатай Тэмцэх Газрын дэргэдэх олон нийтийн зөвлөлөөс “Авлигын тор нэхэгчид УИХ-д үүрэлсэн байна” сэдвээр өнөөдөр хэвлэлийн бага хурал хийлээ.
Тус зөвлөлийн дарга Г.Баасан “Монголын авлигыг удирдаж буй хүмүүс УИХ-д сууж байна гэсэн яриа иргэдийн дунд хүчтэй тархаад байна. Үүний нэг тод жишээ нь 60 тэрбумын хэрэг. Өнөөдөр манай авлигатай тэмцэх газрын үндсэн зарчим нь дунд шатны авлигатай нарийн тэмцэх явдал болчихоод байна. Харин тэд дээд шатны авлигын хэргийг хөндөх дургүй байна. Монгол хүн бүр 60 тэрбумын асуудал нэн яаралтай шийдвэрлэгдээсэй гэсэн хүсэлтэй байгаа.
60 тэрбумын асуудал нь өөрөө юу вэ гэхээр Үндсэн хуулийн “3.2-т заасны дагуу төрийн эрхийг хууль бусаар авах, авахыг завдахыг хориглоно” гэсэн заалтыг зөрчсөн явдал. Харамсалтай нь манай хууль, хяналтын байгууллагууд энэ асуудлыг цогцоор нь ерөөсөө авч үзэхгүй байна.
Тэгэхээр энэ асуудлыг шалгах ёстой Прокурор, АТГ, Шүүх, Мөрдөн, Шүүхийн шинжилгээний үндэсний хүрээлэн гээд Монгол Улсын хууль хяналтын байгууллагууд цогцоороо авлигад идэгдсэн нотолгоо нь 60 тэрбумын хэрэг. Тийм болохоор мөнгө төлсөн мэргэжлийн бус хүмүүсээр төрийн ажлыг удирдуулж байгаагаас болж төрд дайсагнах, олон нийтийг эвдрэлцүүлэх энэ үндсийг бий болгоод байгаа юм.
Уг хэргийг авлига авах гэх ганцхан зүйл заалтаар зүйлчлээд дараа нь хэргийг хаасан. Гэвч энэ хэргийг хуулийн дагуу тагнуулын байгууллага шалгах ёстой. Гэтэл хэргийг тагнуулын байгууллагаар огт шалгуулахгүй байна. Бид энэ оны нэгдүгээр сараас өнөөдрийг хүртэл 156 бичиг АТГ-т өгсөн. Гэвч өнөөг хүртэл АТГ нэг ширхэг ч хэргийг шалгаж, хариуцлага тооцсонгүй.
Нэгэнт 60 тэрбумын асуудал сэргэсэн учир, энэ хэргийг Тагнуулын Ерөнхий Газар шийдвэрлэх ёстой гэж бидний зүгээс үзэж байгаа” гэв.
