Замын хөдөлгөөний дүрмийн шинэчилсэн найруулгыг цувралаар хүргэж байна. Уг дүрэм нь 2018 оны арваннэгдүгээр сараас хэрэгжиж эхлэх юм. Ингээд шинэчлэгдсэн дүрмийн зарим заалтуудаас хүргэе.
-Замын хөдөлгөөний хуулийн шинэчилсэн найруулгын 15.2 дахь хэсэгт “Уулзварыг бүрэн гүйцэд нэвтрэн гарах боломжийг хязгаарласан түгжрэл, саатал бий болсон үед жолооч (уулзвар нэвтрэх давуу эрхтэй буюу зөвшөөрсөн гэрэл дохио асаж байгаа эсэхээс үл хамааран) уулзвар руу орохыг хориглоно” гэсэн заалттай болсон. Иймд уулзварын шар тэмдэглэгээтэй хэсэгт нэвтрэн, хөдөлгөөнд саад учруулсан жолоочид хариуцлага тооцно.
-Зам тээврийн ослын үед жолооч нар өөр хоорондоо маргаангүйгээр тохиролцож, даатгалын байгууллагатай харилцан маргаангүй шийдвэрлэхээр тохиролцсон бол цагдаагийн байгууллагад мэдэгдэх үүргээс чөлөөлөгдөнө гэж шинэчилсэн дүрмийн 3.6-д заажээ.
-Дүрмийн 12.5-ын “б”-д мотоцикл, чиргүүлтэй автомашинаар суурин газрын гадна 60 км/ц-ээс илүү хурдтай явахыг хориглосон бөгөөд энэ нь хөдөө, орон нутгийн замд ихээр гарч буй мотоциклын ослыг бууруулахад чухал ач холбогдолтой гэж үзжээ.
-Жолооч замын хөдөлгөөнд оролцоод явж байхдаа тээврийн хэрэгслийн хөгжмийг чангалах, чихэвчээр дуу сонсохыг хориглоно. Хөдөлгөөнт байдлаар интернэт болон гар утас ашиглахыг хориглож байгаа.
Хүүхэд хамгааллын чиглэлээр:
-Дүрмийн 14.6-д жолооч тээврийн хэрэгслээ орхиж явахдаа 10 нас хүрээгүй хүүхдийг насанд хүрсэн харгалзах хүнгүйгээр тээврийн хэрэгсэлд үлдээхийг хориглох заалт оруулсан.
-23.8-д “Суудлын автомашинд болон ачааны автомашины жолоочийн бүхээгт 10 хүртэлх насны хүүхдийг тээвэрлэхдээ биеийн жин, өсөлтөд нь тохирсон зориулалтын нэмэгдэл суудал буюу хамгаалах хэрэгсэл ашиглана” гэж өөрчлөн найруулжээ.
-Мөн хүүхдийн нэмэгдэл суудал, хамгаалах хэрэгсэл нь Стандартчиллын үндэсний зөвлөлөөс олон улсын ISO стандартын хүүхэд хамгаалах системд нийцүүлэн 2016 онд баталсан “Хүүхдийн нэмэгдэл суудал, хамгаалах хэрэгсэл” MNS ISO 13216-1, MNS ISO 13216-2, MNS ISO 13216-3 стандартын шаардлагад нийцсэн байх, түүнийг тээврийн хэрэгсэлд байрлуулж ашиглахдаа үйлдвэрлэгчээс тогтоосон зааврыг баримтлах тухай заалтыг дүрмийн 23.8-д мөн тусгасан болно.
-Одоогийн мөрдөж буй дүрмээр 12 хүртэлх насны хүүхдийг мотоциклын арын суудалд тусгай бэхэлгээтэйгээр тээвэрлэхийг зөвшөөрдөг бол төслийн 23.9-ийн “е”-д “10 хүртэлх насны хүүхдийг мотоциклын арын суудалд” ямар ч тохиолдолд тээвэрлэхийг хориглохоор заасан байна.
-Жолооч нар сургууль орчмын бүсэд 20 км/ц-аас илүүгүй хурдтайгаар замын хөдөлгөөнд оролцоно.
Явган зорчигчид:
-Харанхуй үед гэрэлтүүлэггүй замд болон үзэгдэлт хангалтгүй нөхцөлд зорчих хэсгийн зах буюу хөвөөгөөр явах тохиолдолд явган зорчигч нь жолоочид харагдах нөхцөлөө сайжруулах үүднээс аль болох тод гэгээлэг өнгийн, боломжтой бол гэрэл ойлгох шинж чанар бүхий хувцас хэрэглэл, эд зүйлстэй явбал зохино” гэсэн зөвлөмжийн чанартай заалтыг нэмж тусгасан. Энэ шаардлагыг гадаадын олон улс орон, ялангуяа европын ихэнх орон замын хөдөлгөөний аюулгүй байдлын тухай хууль тогтоомждоо тусган хэрэгжүүлж байна.
-Явган зорчигч зорчих хэсгээр явахдаа утсаар ярих, интернэт ашиглах, чихэвчний хөгжим сонсох, ном сонин, ямар нэгэн зүйл уншиж явах, ролик, скутер зэргийг ашиглахыг хориглоно.
