Ард түмнийг соён гэгээрүүлэх, мэдээ мэдээллээр тасралтгүй хангаж, нийгмийг залж чиглүүлдэг чухал салбарт, дөрөв дэх засаглал болсон хэвлэл мэдээллийн байгууллагад, тэр дундаа МҮОНТ-д захиралын албан тушаалтай Л.Нинжжамц маш “өвөрмөц бөгөөд этгээд” зөвлөгөөг өглөө. Тэрээр “Ээжүүд ээ: Таны аман дотор 250 төрлийн бактери амьдарч байдаг. Үүнийг урсган зайлуулахын тулд шүлс ялгардаг ажээ. Иймд бүү шүлсээ залги. Болж өгвөл гадагш нь гаргахыг хичээ. Амаа бүү хуурай байлга. Таны шүлс байнга ялгарч байх ёстой. Ингэхийн тулд та хангалттай шингэн уувал зохино.” гэж жиргэжээ.
Тэгэхээр хүний амны хөндий дэх бичил биетний талаарх судалгаагүй энэ зөвлөгөө ямар олон хүний гайхашралыг төрүүлж, хэчнээн хүний шүүмжлэлийг хүртэж байгааг тоочих шаардлагагүй юм. Харин хариуд нь Л.Нинжжамц “Би зохиосон юм. Амаараа хүүхэддээ хоол өгөөд заваараад байдаг аав ээж нарт зориулж постолсон юм.” гэжээ. Түүнд өмхий шүлс, цэр заваан санагддаг гэжээ. Түүнийхээр бол ийм зүйлд дуртай нэгэн байдаг бололтой.
Түүний “гайхалтай” зөвлөгөөнд итгэж ташаарсан хүмүүст болон Л.Нинжжамцад өөрт нь зориулж танин мэдэхүйн бяцхан мэдээллийг тасралтгүй өгцгөөж байна. Тухайлбал,
-Шүлсний үндсэн үүрэг нь хоол тэжээлийн зүйлсийг чийглэж, зажлах, залгихад бэлдэхэд оршдог. Амны хөндийн тэр 250 төрөл, зүйлсийн бактери нь комменсалууд бөгөөд улаан хоолой даваад л ходоодны хүчиллэг орчинд шууд үхнэ.
-Тарган хүний өөх шүлсний булчирхайнуудыг дарсанаас болоод шүлс бага ялгарч, аман доторх бактериа устгаж чадахгүй болоод ирэхээр 50-иас дээш насны эмэгтэйчүүд ханиад их хүрч, уушигны хорт хавдар ихтэй болж байна гэсэн мэдээлэл байна. гэх мэтээр бичжээ.
Шүлстэй холбоотой маш олон мэдээллийг хаанаас л бол хаанаас харж болно. Мэдээллийн эрин зуунд хэвлэл мэдээллийн салбарын удирдлага ийм ташаа зөвлөгөө, мэдээлэл өгч байгааг олон нийт шүүмжлэх нь аргагүй биз ээ.
