Дархан аваргууд мэдэгдэл хийлээ

Монголын Үндэсний бөхийн өргөөг нээх зөвшилцөлд хүрсэнээ өнөөдөр Дархан аварга Х.Баянмөнх, УИХ-ын гишүүн, Дархан аварга Б.Бат-Эрдэнэ нар мэдэгдлээ. Тэд Бөхийн холбоон дээр үүссэн асуудлыг шийдэж, яаралтай бөхийн өргөөний хаалгыг нээхийг хүсч байгаа гэнэ. Монгол бөхийн хамгийн өндөр цолонд хүрсэн хоёр бөхийн хувьд жудаг, эрэмбээ эдлэж будлиантай асуудлыг шийднэ, шүүхээр шийдэгдэх асуудал нь шүүхээрээ шийдэгдэг гэж тохирчээ.
Б.Бат-Эрдэнэ: Монголын бөхийн холбооны энэ маргаан 16 жил боллоо. Миний бие хавар болсон “Их Эе” хурлаас холбооны тэргүүнээр сонгогдон ажиллаж байна. Энэ хурлын дараа олон жил эвлэрч чадаагүй бөхчүүд, бөхийн зүтгэлтнүүдтэйгээ уулзаж, учраа олохыг их хүслээ. Одоо Бөхийн өргөө хаалттай байна. Яагаад гэвэл маргаан, үймээн дэгдээж байгаа нөхөд дахин асуудал гаргахгүй гэсэн бичиг өг гэсэн шаардлагыг тавьж байна. Ингэж цагдаагийн байгууллагын хамгаалалтыг буулгана гэж байгаа. Бид хоёрын хувьд монгол бөхийн хамгийн өндөр цолонд хүрч өнөөдөр ахмадын тоонд орж байна. 20 насны зөрүүтэй ч гэлээ ах, дүүс, багш, шавийн барилдлагатай явж ирлээ. Одоогоор бөхчүүдийн хамтран ажиллах түр зөвлөл 6-7 гишүүнтэй байгуулагдаж, Бөхийн өргөөний үйл ажиллагааг хэвийн явуулах тал дээр ажиллахаар болж байна. Бид хоёрын үзүүлсэн амжилтаас илүү монгол бөхийн амжилт, жудагтай байх нь сүүлийн үед гараад байгаа допингийн асуудал, мөн жалга довын үзлийг цэгцлэх гээд бидэнд хийх ажил их байна. 16 жил шүүхээр явж байгаа энэ асуудал цэгцлэгдэж, шийдвэр яаж гарах нь үл хамааран “Их Эе” хурлыг дахин хийх, холбооны үйл ажиллагааг эв нэгдэлтэй хийх байр суурьтай байна.
Х.Баянмөнх: 16 жил шүүхээр явж, захирамж шийдвэр зургаан удаа гарч шийдэгдээгүй байна. Энэ асуудал өнөөдөр ч дуусаагүй байна. Миний хувьд ямар үзэл баримтлалтай байна вэ гэхээр Бөхийн холбооны маргаанаас гадуур бурхнаас заяасан үйлдлийнхээ ёсоор Б.Бат-Эрдэнэ бид хоёр бөхийн будилаантай асуудлыг шийдэх ёстой гэж нэгдлээ. Бөхийн жудаг, эрэмбээ эдэлж бөхчүүдээ удирдан зохион байгуулах ёстой. Бөхийн өргөө хаалттай хэвээр ес эхэллээ. Бид ийм байдалтай байж болохгүй ээ. Би Л.Чинбатын холбоог хууль ёсны холбоо гэж үздэг. Б.Бат-Эрдэнэ аварга наймдугаар “Их Эе”-ээс тэргүүн болсон. Энэ маргаантай байгаа асуудал шүүх дээр явж байгаа. Бид хоёрын хувьд бөхчүүдийн энэ зохисгүй үйлдлийг цэгцэлж, бөхийн ёс жудгийг сэргээж удирдах ёстой гэж бодож байна. Ингэж түр зөвлөл байгуулж, би даргалаад явж байна. Шүүхийн шийдвэр яаж гарсны дараа аль нэг холбоо нь ажлаа хийгээд яваг. Аль нэг холбоо нь шүүхийн шийдвэрээр албан ёсных гэж гарсан ч юм хийж чадахгүй ээ. Тиймээс зохицож нэгдсэн хурлаа хийх нь чухал байна. Бөхийн өргөөг төр авч болохгүй учраас холбооны ажилд орж болохгүй юм.
Б.Бат-Эрдэнэ: Бид хоёр хэрэлдээд, ноцолдоод байдаг юм байхгүй. Бөхчүүдийн хувьд ахмад үе, дээд цолтондоо хүндэтгэлгүй хандаж болохгүй. Харин энэ будлиан дунд би хүндэтгэлгүй хандсан зүйл байх вий гэж үзээд өнөөдөр уучлал хүсэж байгаа юм. Би энэ хүний урдаас эсэргүүцсэн үг хэлж байгаагүй. Энэ хүний үгэнд гомдож, юм санаж байсан удаа ч үгүй. Надаас 20 насаар ах, багш минь шүү дээ.
Бөхийн өргөөг нээж, барилдаануудыг тогтмол зохион байгуулна. Ордон, өргөө байхгүй болохоор үнэхээр хүнд байдаг юм байна. Бүх шатны барилдаануудаа энд тэнд түрээс төлж зохион байгуулж байна.
Энэ жилийн арванхоёрдугаар сарын 29-ний барилдааныг Нисэхэд байрлах Спортын ордонд зохион байгуулахаар Ерөнхийлөгчийн тамгын газартай тохиролцчихсон. Ер нь олон үзэгчтэй томоохон барилдаануудыг тэнд зохион байгуулах тохиолдол байж болно.
Х.Баянмөнх: Бидний хооронд муудалцаж байсан үе байхгүй. Үзэл бодлын зөрүү байсан. Хоёр холбооны будлиан дунд нэг нэгэндээ хатуу үг ганц нэг хэлж байснаас өөрөөр муудалцсан зүйл байхгүй. Холбооны маргааныг шүүх эцэслэнэ. Бид хоёр өргөөгөө нээж, бөхийн барилдаанаа явуулах, бөхчүүдийн сахилга дэг журмыг сахиулахын төлөө л ажиллана.