Иргэдэд үнэгүй интернетээр үйлчилдэг боллоо

Нийслэлийн ИТХ-ын дарга Д.Баттулга уг үйл ажиллагааг нээж хэлсэн үгэндээ \”Юуны өмнө Та бүхний энэ өдрийн амар амгаланг айлтгая. Өнөөдөр Улаанбаатар хотод бас нэгэн тэмдэглэлт үйл явдал болж байна. Нийслэлийн бүх хороог утасгүй интернет буюу wifi-д холбох төслийн нээлтийн ажиллагаа эхэлж байна. Өмнө иргэд нийслэлийн харьяа байгууллагууд, дүүргүүд дээр очиж өргөдөл гомдлоо өгч, төрөл бүрийн үйлчилгээ авдаг байсан. Харин одоо бол Дүнжингарав, Мишээл, Драгон төвөөс төрийн үйлчилгээг авдаг болсныг Та бүхэн мэдэж байгаа биз ээ. Энэхүү үйлчилгээг иргэдэд илүү ойртуулж, Улаанбаатар хотын бүх хороог утасгүй интернетийн сүлжээнд холбох гэж байна. Ингэснээр иргэд хорооноосоо 100 гаруй метрийн зайнаас утасгүй интернетэд холбогдож төрийн олон үйлчилгээг авах боломжтой болох юм” гэлээ.

Эхний ээлжинд Хан-Уул, Сонгинохайрхан, Сүхбаатар, Баянзүрх дүүргийн зарим хороонд утасгүй интернетийн бүс бий болгон туршилтаар ажиллуулж байгаа бөгөөд 2016 оны 6 дугаар сард багтааж дээрх 155 цэгийг бүрэн хамруулахаар төлөвлөжээ. Иргэд өөрийн амьдарч буй хорооны утасгүй интернетийн бүсэд холбогдсоноор төрийн үйлчилгээг түргэн шуурхай авах, мэдээ мэдээллээр хангагдах мөн өөрийн санал хүсэлт, өргөдөл гомдлоо  нийслэлийн удирдлагад шууд илгээх боломжтой болно.  

Хотын үнэгүй, утасгүй интернетэд холбогдохын тулд  иргэд өөрт ойр байрлах хорооны байр орчимд Wifi дэмждэг төхөөрөмжөө ашиглан \”UBWiFi” нэртэй сүлжээнд холбогдон бүртгүүлэх хэрэгтэй. Хэрэв өмнө нь цахим газар өмчлөл, цахим зуслангийн газар өмчлөлд бүртгүүлэн хандаж байсан бол тухайн бүртгэлийн мэдээллийг ашиглан утасгүй интернетэд нэвтрэн орох боломжтой.

Энэ сүлжээнд холбогдсоноор иргэд нийслэлийн мэдээ, мэдээллийг цаг алдалгүй авах www.ulaanbaatar.mn, Ухаалаг Улаанбаатар хөтөлбөрийн хүрээнд хэрэгжүүлсэн иргэний цахим нэг цонх www.citizen.ulaanbaatar.mn, газар өмчлөлийн цахим систем,  www.land.ulaanbaatar.mn, иргэдийн оролцоотой Улаанбаатар хотын газрын зураглалын нэгдсэн сан www.manaikhoroo.mn, өөрийн амьдарч буй хорооныхоо эрүүл аюулгүй байдлын индексийн талаар мэдээлэл авах боломжтой www.eabi.ub.gov.mn, нийслэлийн нээлттэй өгөгдлийн портал www.data.ulaanbaatar.mn, авто тээврийн хэрэгслийн нэгдсэн систем www.smartcar.mn зэрэг төрийн үйлчилгээний цахим сайтуудад өндөр хурдтайгаар холбогдож, төрийн үйлчилгээг авахаас гадна интернетийн орчинд хүссэнээрээ аялах боломжтой.  

Улаанбаатар хотыг утасгүй интернетжүүлэх төслийг хэрэгжүүлснээр Улаанбаатар хот дэлхийн өндөр хөгжилтэй хотуудын жишигт хүрсэн Ухаалаг хот болох нэг том алхам юм