Засгийн газар ард иргэдийг 300 мянган төгрөгөөр “худалдаж авах”-аар шийдэв үү

 

 

 

Үхрийн сүүлэн
дээр хутга гэгчээр өнгөрсөн дөрвөн жилийг шуудайд хийсэн үхрийн эвэр шиг өнгөрүүлж,
ашиг сонирхлын зөрчлийнхөө хөлд ард иргэдийг чирсэн Засгийн газар сонгуулийн
өмнө гэнэт ард иргэдэд хайр зарлаж, мөнгө өгөхөөр боллоо. Ингэхдээ иргэдийн
хармаанд ирээдүйд орох ашгаас \”хулгайлж” байгаад түүнээс нь багахан хэсгийг нь буцааж
өгөхөөр шийдэв.

Манайхан маргаашийн өөхнөөс өнөөдрийн уушгийг илүүд үздэг
хойно, Засгийн газрын төлөвлөгөө эрчээ авч, бүгдээрээ маргаашийн 3 сая, 30 сая
төгрөгнөөс өнөөдрийн 300 мянган төгрөгийг илүүд үзэж түүний хойноос
хойшуурцгаав. Адаглаад л, нэг ширхэг нь 933 төгрөгөөр үнэлэгдсэн хувьцаанаасаа
322 ширхгийг бид худалдахад Засгийн газарт нэг хүн 426 төгрөгөө шулуулж байна. Цэнхэр,
ягаан тасалбараар ард иргэдийг мунхруулж, байгаа зүйлээ нурааж, ашиглаж буй зүйлээ
хувааж идсэн нь багадаад байхгүй, ашиглаж эхлээгүй зүйлээс мөнгө гаргаж,
түүнийгээ ард иргэдэд тараах гэж байна. Төсвийн алдагдал 877 тэрбум төгрөгт
хүрч, мөнгө санхүү хүнд байхад Засгийн газар хаанаас мөнгө босгох гэж байгаа нь
эргэлзээтэй.

Магадгүй дахиад өр зээл тавьж, мөнгө хэвлэж, уул уурхайн ордоо
үнэгүй шахам өгөх биз. Үүнийх нь харгайг ард иргэд олон жилийн турш нуруундаа
үүрч, одоо авсан 300 мянган төгрөгөө хэд дахин нугалаад эргүүлж төлнө. Хойд хормойгоороо
урд хормойгоо нөхөж цалин, тэтгэвэрээ арайхийн тавьж, амь тавих дөхөж буй Засгийн
газар 2017 оноос бондын мөнгөө төлж эхлэхээ уг нь мэдэж байгаа. Гэсэн ч наана
нь сул мөнгө тарааж, ямар ч хамаагүй аргаар төрийн эрхийг дахин атгах үйл
ажиллагаа явуулж, түүнийхээ хүрээнд нэг иргэний саналыг 300 мянган төгрөгөөр
үнэлэв үү гэмээр төсөл хөтөлбөр хэрэгжүүлж эхэллээ.

Ингэхдээ иргэний 1072
ширхэг хувьцааны 322 ширхгийг 300 мянган төгрөгөөр бодож авахаар болсон бөгөөд
300 мянган төгрөгөө долоо, долоо хоногийн хугацаатай 100, 100 мянгаар гурван
удаа хувааж олгохоор болсон юм. Сонгууль угтсан энэ үйл ажиллагаа, мөнгө
тараалт нь Сонгуулийн хуулийн

3.1.10.\”эд
мөнгөөр татах” гэж мөнгө, эд хөрөнгө өгөх, аливаа ажил үйлчилгээг төлбөргүй
үзүүлэх зэргээр бусдын хүсэл зоригийн илэрхийлэлд нөлөөлөхийг;

3.1.11.\”сонгогчдын
санал худалдан авахад чиглэсэн бусад аливаа үйлдэл, үйл ажиллагаа явуулах” гэж
мөнгө, эд хөрөнгө өгөх, амлах, дамжуулах, зуучлах, аливаа ажил, үйлчилгээг
төлбөргүй үзүүлэх зэрэг бүх төрлийн арга, хэлбэрээр сонгогчийн санал өгөх
эрхийг өөрийн сонирхолд нийцүүлж, тодорхой нэр дэвшигчид санал өгүүлэх
зорилгоор явуулж байгаа ажиллагааг; зэрэг зүйл заалтттай харшилдаж байна. 300
мянгын сургаар хот гэлтгүй хөдөө орон нутагт иргэд хөлтэй нь холхиж, хөлгүй нь
мөлхөж банкуудад оочер дараалал үүсгэж, шаваад байна.

Нөгөө талаас 300 мянгыг
авахын тулд банкуудад гурван хувь анкет бөглөж өгч байна. Үүний нэг нь
банкиндаа үлдэж, нөгөө нь брокер диллерийн компанид очлоо гэхэд гурав дахь хувь
нь хаашаа очиж байна. Засгийн газар тэр дундаа нэг намд очиж, сонгогчдын
саналыг худалдаж авах эсвэл сонгуулийн өрсөлдөөнд ямар нэгэн байдлаар ашиглагдах
гэж байгаа юм биш биз.

Ер нь хувьцаа худалдаж авах нэрийн дор сонгуулийн өмнө
сонгогчдын саналыг худалдаж авах далд санаатай гэмээр энэ үйл ажиллагаанд бусад
намынхан болон сөрөг хүчнийнхэн анхаарлаа хандуулж, хууль журмуудыг зөрчиж
байгаа эсэхийг нягталж, шаардлага тавьж, буруутай бол хариуцлагыг нь
хүлээлгэдэг хууль зүйн орчинг нь тодорхой болгоно байгаа. Эс бөгөөс эрх
баригчид нь ирээдүй хойч үеэ, эх орноо энэ мэтээр улаан гараараа балласаар байх
нь.