Удтал хүлээлгэсний эцэст төлөөлөгчид нууц байдлаар саналаа өгч, С.Амарсайханг олонх дэмжлээ. Тодруулбал, 25 төлөөлөгч С.Амарсайханыг, 19 төлөөлөгч С.Мөнхчулууныг дэмжиж, нэг санал хүчингүй болсон гэж тооллогын комисс танилцууллаа.
Санал хураалтад 45 төлөөлөгч оролцсон. Өмнөх санал хураалтын үед гарсан алдаа, асуудлыг давтахгүй байхын тулд тооллогын комисс хичээн ажилласан гэдгээ мэдэгдсэн юм.
Төлөөлөгчдийн олонхий саналыг авсан С.АМАРСАЙХАН гэж хэн бэ?
НИТХ-ын дарга С.Амарсайхан нь 1981-1991 онд Налайхын бага, дунд сургууль, 1994-1996 онд АНУ-ын Пресно хотын коллеж, 1996-1998 Ютa Мужийн Коллеж, 1998-2000 онд Соут Вест Их сургуульд суралцаж төгссөн. Эрх зүйн магистр зэрэгтэй.
-1992-1993 онд Монгол улсын Шинжлэх Ухаан, Мэдээлэл Технологийн Төвийн ажилтан
-2000-2004 онд Монгол Улсаас БНХАУ-д суугаа Элчин Сайдын Яамны Консулын ажилтан, Атташе
-2004-2007 онд Американ Трейд & Девелопмент компанид гадаад худалдааны менежер
-2007 оноос “Оюуны Ундраа Групп” ХХК-ийн гүйцэтгэх захирал, ерөнхий захирал, ТУЗ-ын даргаар тус тус ажиллаж байна.
-2012 оноос хойш НИТХ-ын төлөөлөгчөөр хоёр дахь удаагаа сонгогдон ажиллаж байгаа. Энэ хугацаанд НИТХ-ын тэргүүлэгч, Хот байгуулалт, дэд бүтцийн хороо, Санхүү, Төсөв, Эдийн засгийн хороо болон “Ухаалаг Улаанбаатар” Хөгжлийн хорооны гишүүн, Нийслэлийн Авто худалдааны төвийн ТУЗ-ын гишүүнээр ажилласан.
-2016 оноос НИТХ-ын Санхүү, Төсөв, эдийн засгийн хорооны дарга, өмч хувьчлалын комиссын гишүүнээр тус тус ажиллаж байсан.
НИТХ-ын хуралдаанаас гарсан шийдвэрийг Ерөнхий сайдад танилцуулах бөгөөд Ерөнхий сайд тав хоногийн дотор батламжлах бөгөөд Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуульд зааснаар хоёр дахь нэр дэвшигчийг Ерөнхий сайд татгалзахгүйгээр батламжлах зохицуулалттай.
