УИХ-ын нэр бүхий гишүүдийг эрх мэдэл, албан тушаалын байдлаа урвуулан ашиглаж, Засгийн газрын тусгай сангаас өөрийн хамаарал бүхий аж ахуйн нэгжид зээл авч өгсөн байж болзошгүй асуудлыг хуулийн байгууллага шалгаж байгаа. Мөрдөн шалгах явцад гишүүний бүрэн эрхийг түдгэлзүүлэн шалгах шаардлага гарсан тул хүсэлтийг УИХ-д өргөн барьсан хүлээн аваагүй.
Мөн шалгагдаж байгаа гишүүдийн хувьд зээл авсан аж ахуйн нэгж нь өөрт хамааралгүй хэмээн мэдэгдсээр байсан.
Тухайлбал, УИХ-ын гишүүн Г.Солтан “Монгол шаазан” ХХК-ийг өөрт хамааралгүй гэж мэдэгдсэн удаатай. Гэвч “Монгол шаазан” ХХК Нийслэлийн хот төлөвлөлт, ерөнхий төлөвлөгөөний газартай холбоотой шүүхэд гомдол гаргасан байх бөгөөд компанийг төлөөлөх албан тушаалтнаар Г.Солтан байхыг доорх шүүхийн тогтоолоос харж болохоор байна. / http://new.shuukh.mn/toim/9001/view/
Эндээс “Монгол шаазан” ХХК нь УИХ-ын гишүүн Г.Солтанд хамааралтай юу, үгүй юу гэсэн асуулт гарч ирж байна. Жижиг дунд үйлдвэрлэлийг дэмжих сантай холбоотой асуудал яригдах эд үед Г.Солтан гишүүн “Монгол шаазан” ХХК-ийн эрх ашгийг хамгаалахаар Нийслэлийн хот төлөвлөлт, ерөнхий төлөвлөгөөний газартай шүүхдээд явж байсан байна шүү дээ.
Гэтэл сэтгүүлчид “танд хамаарал бүхий компани мөн үү” гээд асуухаар “Надад хамааралгүй. Би 2010 он хүртэл тус компанид удирдах ажил хийж байсан. Түүнээс хойш ажиллаагүй. 2013 оноос Баян-Өлгий аймагтаа амьдарч, улс төрийн ажил хийсэн. 2016 оноос УИХ-ын гишүүн болсон. Тиймээс би энэ аж ахуйн нэгжид хамааралгүй. 950 сая төгрөгийн зээл авсныг мэдэхгүй” гэж тайлбар өгсөн нь ямар учиртай вэ.
Өмнө нь ажиллаж байж одоо хамааралгүй гэж тайлбарлаж байгаа аж. Тэгвэл 2018 оны 12 дугаар сарын 12-ны өдрийн шүүх хурлын тэмдэглэл дээр Г.Солтаныг “Монгол шаазан” ХХК-тай хамаарал бүхий этгээд гэж дурдсан байна. Өөр нэг жишээ доорх албан бичиг юм.
Г.Солтан гишүүн ээ! Ийм баримтууд байсаар байхад “надад хамаагүй” гэж мэлзсээр байгаагийн учир шалтгаан юу вэ? Өөр та ямар асуудлыг “мэдэхгүй”, “надад хамаагүй” гэж мэлзсэн бэ? Эсвэл энэ албан бичиг, дээрх шүүхийн шийдвэрт дурдагдсан Г.Солтан гэгч нь өөр хүн үү?
