Цагдан хорих 461 дүгээр ангид түр хоригдож байсан иргэн Б амь насаа алдсан хэрэг гарсан. Албаныхан өөрийн амиа хорлосон гэж байгаа бол хохирогчийн гэр бүл болон ойр дотны хүмүүс эргэлзэж байгаагаа мэдэгдсээр байгаа билээ. Энэхүү асуудалтай холбогдуулж ШШГЕГ-аас мэдээлэл өглөө.
ШШГЕГ-ын дарга Ц.Амгаланбаяр “Цагдан хорих 461 дүгээр ангид АТГ-аас саатуулагдаж шалгагдаж байсан иргэн Б амь нас нь хохирсон харамсалтай явдал болсон.
Шалгалтаар тухайн үед үүрэг гүйцэтгэж байсан алба хаагчид болох давхрын харуул хамгаалалтын ажилтан, дүрс бичлэгийн албан хаагчид ажлын байрандаа хариуцлагагүй хандан хяналтаа сулруулсан нь тогтоогдсон. Хорих 461 дүгээр анги бол маш том анги. Улсын хэмжээнд гэмт хэргийн улмаас цагдан хоригдож байгаа бүх хүмүүс болон хорих ялаар шийтгэгдсэн хүмүүс хоригддог. Хорих байрын 1.2 дугаар давхар нь бусад хорих газартай тэнцэх хэмжээний хүнтэй, ачаалал ихтэй байдаг газар.
Ерөнхий газрын даргын зөвлөлийн хурлаар шалгалтын дүнг хэлэлцээд эрхэлсэн ажилдаа хариуцлагагүй хандсан хүмүүст хариуцлага тооцсон. 461 дүгээр ангийн дарга, харуул хамгаалалт эрхэлсэн дэд дарга, ерөнхий жижүүр, ээлжийн дарга, харуул хамгаалалтын холбогдох ажилтнуудыг үүрэгт ажлаас нь чөлөөлөх шийдвэр гарсан” гэв.
Мөн өнөөдөр энэхүү хэрэгтэй холбогдуулж Мөрдөн байцаах албанаас хэвлэлийн хурал хийлгэлээ. Хүнд гэмт хэрэг мөрдөх хэлтсийн ахлах мөрдөн байцаагч, хошууч С.Ууганбаяр “Хэвлэл мэдээллийн хэрэгслээр амь үрэгдэгч Л.Бямбааг санаатай, захиалгаар алуулсан гэх мэдээлэл цацагдаж байна. Хэрэгт эд мөрийн баримтаар 461 дүгээр ангийн хяналтын камерын бичлэгийг хурааж авсан. Үхлийн шалтгаан болон хэргийн газраас хурааж авсан эд мөрийн баримтад шинжилгээ хийлгэхээр ШШҮХ-д шинжээч томилсон байгаа. Одоогоор дүгнэлт гараагүй байна” гэж мэдэгдлээ.
