ИРАНЫ КИБЕР ДОВТОЛГООНЫ ТӨВ-ийн хакерууд Сири, Иракын тэнгэрт нисэж явсан АНУ-ын 7-8 нэгж нисгэгчгүй нисэх хэрэгслийн удирдлагын системд амжилттай нэвтэрч уг аппаратыг жолоодох/ажиллагаагүй болгох, эсвэл тэдний олзворлосон тагнуулын мэдээллийг хуулж авах болжээ. 2011 оны 12-р сарын 04-нд Ираны хакерууд тус улсын агаарын орон зайд тагнуулын нислэг үйлдэж явсан америкийн тагнуулын RQ-170 нисгэгчгүй нисэх аппаратыг олзолж авсан тухай мэдээ гарчээ. Уг аппаратыг буцааж өгөхийг тухайн үеийн ерөнхийлөгч Б.Обама хүсэхэд ираны тал татгалзсан байдаг.
2016 оны 9-р сард Ираны тал “Saegheh” нэртэй нисгэгчгүй нисэх аппарат бүтээж олонд танилцуулсан нь нөгөө америкийн олзлогдсон “RQ-170”-ийн хуулбар байв. Энд яригдаад байгаа RQ-170 бол 20 метр урт, 4,5 метр өргөн, 1,8 метр өндөртэй радарт үл үзэгдэгч нисгэгчгүй нисэх аппарат бөгөөд 15 мянган метрийн өндөрт агаарын тагнуулын үүрэг гүйцэтгэх зориулалттай бүтээгдсэн ажээ. 2011 оны 5-р сарын 02-нд Пакистан улсад Осама бин Ладенийг устгах тусгай ажиллагааны үеэр хамгийн багадаа 1 нэгж RQ-170 агаарт нисэж газар дээр болж байгаа үйл явдлын мэдээллийг хиймэл дагуул руу шууд дамжуулж байжээ.
Мөн 2016 оны 7-р сард америкийн MQ-9 дрон удирдлагаггүй болж ослын буулт хийж газардсан нь ираны хакеруудын “ажил” байсан юм. Америкчууд уг дроныг дайсны гарт оруулахгүйн тулд сөнөөгч онгоц хөөргөж бөмбөгдөж бүрэн устгасан тохиолдол гарч байв. Радиоэлектроны тэмцэл улам ширүүсч байна даа.
Р.Энхболд
