Н.Энхбаяр: Монголчуудын минь сэтгэлийн шөрмөсийг хэн ч тасалж чадахгүй

УИХ-ын 75 дугаар тойрогт МАХН-аас нэр дэвшигч О.Цолмонгийн Сонгинохайрхан дүүргийн II хорооны иргэдтэй хийсэн уулзалтад Монгол Улсын гурав дахь Ерөнхийлөгч, МАХН-ын дарга Н.Энхбаяр оролцож, намынхаа мөрийн хөтөлбөрийг танилцуулж, иргэд сонгогчдын сонирхсон асуултад хариулсан юм.

Тэрээр \”Би уг нь энэ тойрогт өрсөлдөх байсан. Гэвч та бүхэн намайг сонгочих гээд байсан учраас төр барьж байгаа хүмүүс айж намайг оруулахгүй бүх аргыг хэрэглэж байна. Би сонгуульд оролцож ялснаар ард түмнийхээ ядарсан амьдралыг өөрчилж, оюутнуудаа төлбөргүй сургаж, гэр хорооллын иргэдээ орон сууцанд оруулж, мянганы төмөр зам барьж, жаргалын найман хот байгуулж, хэлмэгдүүлэлтийг таслан зогсоох учир тэд ийнхүү айж байгаа юм. 

Аргаа ядаад намын дунд шатнаас таныг хүнд хэцүү үед түшиж тулан, жаргал зовлонгоо хуваалцаж ирсэн заяаны хань, мэдлэг боловсролтой О.Цолмонг дэвшүүлэх нь зүйтэй гэсэн санал гаргасан. Анх энэ саналыг О.Цолмонд хэлэхэд өөрөө дургүйцэж байсан ч оронд нь нэр дэвших хүн урваж шарвах, барьцаанд орвол яах билээ гэж ятгасны дүнд зөвшөөрсөн. Би сүүлийн долоон жил хэлмэгдэж тэмцэж явна. Юуны тулд гэхээр ард түмэндээ Тавантолгой, Оюутолгойг өгөх гэж байгаа учраас эрх мэдэлтнүүд надаас айж байна. Энэ бүхнийг дуусгах цаг болсон.

Миний зовох зүдрэх, хэлмэгдэх юу ч биш. Ард түмэн минь зовох ёсгүй. Өнөөдөр Төрийн тэргүүнд байгаа Ц.Элбэгдорж муу ажиллаж байгаа учраас би намтайгаа, гэргийтэйгээ ард түмнийхээ төлөө энд ирээд байна. Намайг баривчлах гэж 600 цагдаа ирээд миний гарын шөрмөсийг тасласан байсан. Гэхдээ миний сэтгэлийн шөрмөсийг хэзээ ч тасалж чадахгүй. Монголчуудын минь сэтгэлийн шөрмөсийг хэн ч тасалж чадахгүй. Та бүхний сэтгэлийн шөрмөс тасарвал урвалт хууралт худал хуурмаг болж айж эмээж эхэлнэ. Хэдий болтол сонгинохайрханчууд минь уулын оройд амьдарч, гэр цахилгаангүй, бохир хүнд орчинд амьдрах билээ. Тиймээс энэ сарын 29-ний өдөр сонгуулийн хувьсгал хийж хөгжлийн хувьсгалд хамтдаа хүрцгээе” гэсэн юм.

Харин иргэд \”Хотын захын хөгжлөөс хоцорсон дүүрэгт ирж нэр дэвшиж буй О.Цолмонд юуны түрүүнд баярлалаа гэдгээ хэлье. Би Н.Энхбаяр даргыг нэр дэвшихгүй болсныг сонсоод сэтэлээр унаж байсан. Гэвч өнөөдөр эх орон маань хүнд хэцүү үеийг туулж байгаа энэ цаг мөчид нөхрийнхөө өмнөөс нэр дэвшиж байгаа О.Цолмонд  баярлалаа. 30 жил ханилж, дөрвөн хүүхдийн эцэг, эх болсон хүмүүс бие биенээ орлохгүй бол өөр хэн орлох билээ.

Өнөөдөр Монгол Улсын Ерөнхийлөгч Ц.Элбэгдорж 30 тэрбум төгрөгийн хохирол учруулсан Жастин Каплаг өршөөсөн хэрнээ нэгэн цагт Ерөнхийлөгч байсан, хамтран төр барьж явсан нөхрөө шоронд хорьж, шонд дүүжлэхээр явж байгаа нь аймшигтай юм. Энэ сонгууль маш онцлог болж байна. Оффшор данстай хүмүүс УИХ-д суухаар санаархаж байгаа нь жигшмээр. Хоёр нам нэгдэж ард түмнийхээ төлөө хамтран ажиллаж, өрнөөс гарая, улс орноо хөгжүүлэе гэхэд МАН татгалзсан. МАН-ын сонгуулийн штабыг АНУ-д долоон хаустай, хоёр ч оффшор данстай С.Баяр ахалж байгаа гэдгээс л энэ нам яаж сонгуульд өрсөлдөж байгаа нь харагдана.

2012 онд ард түмэнд хувьцаа өгөхөөр данс нээлээ, нэг ширхэг нь 1000 төгрөг гэж байсан ч одоог болтол өгөөгүй. Тэгснээ сонгуулийн өмнөхөн хувьцаа нэрийдлээр бэлэн мөнгө тарааж, санал худалдаж авах гэж оролдож байна. Үнэндээ өнөөдөр Монголын нийгэм ямар байгааг, боловсролын тогтолцоо, эрүүл мэндийн салбар ямар байгааг бид бүгд мэдэж байна.  

Тиймээс Монгол төрийн удирдлагад байх ёстой цорын ганц хүн болох Монгол Улсын гурав дахь Ерөнхийлөгч МАХН-ын дарга Н.Энхбаярыг дэмжиж, сонгуулийн хувьсгалаас хөгжлийн хувьсгалд хүрцгээе гэж уриалмаар байна” гэж санал хүсэлтээ хэлж, МАХН-ын нэр дэвшигчийг дэмжихээ илэрхийллээ. Харин энэ үеэр 75 дугаар тойрогт нэр дэвшигч О.Цолмон \”Нэр дэвшигчдийн мөрийн хөтөлбөрийг сайн харьцуулж сонголтоо хийгээрэй гэж хүсмээр байна. Гоё ярьж, сайхан юм амладаг ч сонгогдоод алга болдог тухай иргэд ярьж байна. МАХН-ын мөрийн хөтөлбөр бол амьдралд ойр, ард түмний төлөө гэсэн судалгаа шинжилгээн дээр үндэслэн гаргасан том ажил юм. Н.Энхбаяр гэдэг хүн хэзээ ч худал амладаггүй.

2000 онд монголчуудын амьдрал хүнд байсан. Байгууллагууд цалин мөнгөө тавьж чадахгүй, улс орон гадаад дотоод өрөнд орсон үе. Харин Н.Энхбаяраар ахлуулсан баг мөрийн хөтөлбөрөө 100 хувь биелүүлсэн. Их өрийг тэглэж, гадаад дотоод өрийг дарж, улс орны хөгжлийн үндэс суурийг тавьж чадсан. Тиймээс ч энэ удаад мөрийн хөтөлбөрөө хэрэгжүүлэхийн тулд багаараа сонгогдож олонх болох хэрэгтэй байна. Тавантолгой, Оюутолгойн ордыг 100 хувь ард түмний мэдэлд өгнө гэснээс болж хэлмэгдэж эхэлсэн. Өнөөдөр хүртэл улс төрийн хэлмэгдүүлэлт үргэлжилсээр байна. Сонгуульд нэрээ дэвшүүлэх эрхийг нь хүртэл хаслаа. Тиймээс энэ сонгуулиар бүгд МАХН-ыг багаар нь дэмжиж, сонгуулийн хувьсгалаас хөгжлийн хувьсгалд хүрэхийн төлөө хамтдаа зүтгэе” гэсэн юм  гэж МАХН-ын сонгуулийн штабаас мэдээлэв.