Энэ долоо хоногт Мэргэжлийн сүмо бөхийн 69 дэх Их аварга Ёкозуна М.Даваажаргал иргэншилээ солих хүсэлт гаргасан гэх худал мэдээлэл Монгол хүн бүрийн сонорт хүрлээ. Үүнийг бүгд л ярьж аваргыг зөвтгөх нь зөвтгөж, буруушаах нь буруушаав. Уг нь бол энэ асуудал дээр ингэж хоёр талцаад байх шаардлагагүй л юмсан. Энэ тухай аварга нэгэн нэвтрүүлэгт оролцох үедээ аль хэдийн өөрийн тайлбараа өгчихсөн. Тухайн тайлбартаа үндсэн хоёр зорилготой гэдгийг ч хэлсэн.
1. Мэргэжлийн сүмод дэвжээний эзэн заавал Япон хүн байна гэх дүрэм үйлчилдэг. Үүний дагуу л Монголчууддаа туслахын тулд иргэншилээ сольж байгаа хэрэг. Хэрэв дэвжээнийх нь эзэн Монгол хүн болчихвол сүмод хөл тавихаар зорьж байгаа нутаг нэгт хүүхдүүдэд их тустай явдал болох юм. Цагтаа Их аварга маань өөрөө сүмод хөл тавихаар очоод сүмогийн дэвжээнүүдэд гологдон элсэж чадаагүй гэдэг. Ингээд аргагүйн эрхэнд нутаг буцахынх нь өмнөх орой Кёкшюүзан Д.Батбаяр дэвжээнийх нь багшийг арайхийн зөвшөөрүүлж сүмод үлдээсэн аж.
Тэгвэл Их аварга маань дэвжээний эзэн болчихвол сүмог зорьсон Монгол хөвгүүдэд маань гологдоод нутаг буцчихгүй болох талтай. Ирээдүйн Монгол хөвгүүдийнхээ төлөө иргэншилээ сольж байгаа гэдгийг ойлгох хэрэгтэй.
2. Монголчууд анх 1964 оны олимпоос эхлэн энэ их айлд элссэн. Энэхүү олимпийн наадмын нээлтэд БНМАУ-ын Төрийн далбааг Хакухо М.Даваажаргалын аав Дархан аварга Ж.Мөнхбат барин алхжээ. Тэгвэл Их аварга маань 2020 оны Токиогийн олимпийн наадмын нээлтэд сүмогийн ёсолгоог Монгол хүнээр, өөрөө хийхийг хүссэн юм. Хэдий япон улсын далбаан дор уг ёсолгоог хийх хэдий ч энэ л үед Монгол хүн гэдгээрээ бахархах болно хэмээн тайлбарласан.
Их аварга маань үүний төлөө л иргэншилээ солих хүсэлт гаргах гэж байгаа юм. Эх орон нэгт монголчууддаа туслах гэж нутгаа сольж байгаа болохоос биш эрхэлж хэвтэх гэж нутгаа солиогүй түүнд талархаад баршгүй. Зорилго томтой хүн чинь том л сэтгэж байгаа юм. Хэдий өнөөдөр иргэншилээ сольсон ч бие сэтгэл нь үүрд эх орондоо үлдэнэ гэдэгт бид итгэнэм.
