“Рио Тинто” группийн Зэс, очир эрдэнийн группийн Гүйцэтгэх захирал Арнауд Суарат Монгол улстай байгуулсан “Оюутолгой”-н гэрээнд өөрчлөлт оруулахыг эсэргүүцэж буйгаа илэрхийлсэн мэдэгдэл гаргасан билээ.
Үүнтэй холбогдуулан өнөөдрийн УИХ-ын чуулганы хуралдааны эхэнд Г.Тэмүүлэн гишүүн энэхүү мэдэгдлийн талаар тодруулга авч, яагаад ийм мэдэгдэл гаргах болсон талаар УИХ-ын даргаас тодрууллаа. Харин УИХ-ын дарга “Рио тинто” группийн удирдлагаас уулзах хүсэлт ирүүлсэн. Гэвч миний бие завгүй байсан учир тэднийг УИХ-ын Эдийн засгийн байнгын хороон дарга Д.Дамба-Очиртой уулзуулсан гэсэн юм.
Харин Д.Дамба-Очир гишүүн уулзалтын талаар “Оюутолгойтой холбоотой ажлын хэсгийн дүгнэлт, АТГ-ын шалгалтын дүгнэлтийг өнгөрсөн долоо хоногт, аудитын дүгнэлтийг өчигдөр хүлээж авсан. Эдгээр асуудлыг ирэх долоо хоногт Байнгын хороогоороо хэлэлцүүлээд явна. “Рио Тинто” группийн удирдлагуудтай би уулзсан. Уулзахдаа “Гүний уурхайн ажил чинь явдгаараа явах байх. Хөрөнгө оруулалтын гэрээ, Хувь эзэмшигчдийн гэрээ, Дубайн гэрээг сайжруулахын тулд өөрчлөлт оруулах асуудал яригдах байх. УИХ-аар хэлэлцэж Засгийн газарт чиглэл өгсний дагуу ширээний ард суун асуудлаа шийдэх байх” гэж хэлсэн. Гэтэл их эмзэглэж хүлээж авч байна лээ. Тэд “Гэрээнүүдэд нэг өгүүлбэр, үг үсэг, цэг таслалын ч өөрчлөлт оруулахгүй” гэсэн. Би хариуд нь нэг тал нь ингэж хатуурхаж болохгүй. Ширээний ард суугаад хэлэлцэх хэрэгтэй гэдгийг хатуу анхааруулсан. Гэтэл үүнээс болоод гэнэт мэдэгдэл гаргаж байгаа бололтой” хэмээн тайлбарлалаа.
Зэс, очир эрдэнийн группийн Гүйцэтгэх захирал Арнауд Суарат
