Сүүлийн өдрүүдэд хэвлэл мэдээллийн салбарт нэг талаас “Эм Эн Би Си” ХХК, нөгөө талаас ТВ-8 телевизтэй холбоотой асуудал олон нийтийн анхаарлыг ихээр татаж байна. Энэ хүрээнд ТВ-8 телевизийн зүгээс өөрсдийн байр суурийг хамгаалсан, хэт нэг талыг барьсан мэдээ мэдээллийг давталттайгаар, удаа дараа үзэгчдэд хүргэсээр байна.
Уг нь хэвлэл мэдээллийн байгууллага мэдээллийн тэнцвэрт байдлыг хадгалж ажиллах үүрэгтэй. Гэвч тус телевизийн хувьд явцуу эрх ашгийг хамгаалан, олон нийтийг төөрөгдүүлсэн, тэнцвэрт байдлыг алдагдуулсан мэдээллийг хүргэж ажиллаж байгаа нь харамсалтай.
Тухайлбал, “Эм Эн Би Си” ХХК-ийн зүгээс /2019.05.28/ хэвлэлийн бага хурал хийж, үүсээд буй асуудлаар мэдэгдэл хийсэн. Энэхүү хэвлэлийн хуралд ТВ-8 телевиз ирсэн хэдий ч олон нийтэд мэдээллийг хүргэсэнгүй. Тэдний энэ үйлдэл анхнаасаа мэдээллийг олон нийтэд түгээх хэвлэл мэдээллийн байгууллагын үндсэн үүргээ биелүүлэх биш, зүгээр л удирдлагаас өгсөн үүрэг даалгаврын дагуу тандалт хийхээр иржээ гэж харагдаж байна.
Үүнийгээ баталж байгаа мэт өнөөдөр “Хатуу сурвалжлага” багаас хийсэн хэвлэлийн хурал дээр ч ТВ-8 телевиз очсон бөгөөд олон нийтэд тэнцвэртэй мэдээллийг хүргэх эсэх нь эргэлзээтэй байна.
“Ард түмний толь” нэртэй ТВ-8 телевизийн мэдээллийн хөтөлбөр ийнхүү хэт нэг талыг барин ажиллах болсон нь тухайн телевизийг саяхан худалдаж авсан МСНЭ-ийн Ерөнхийлөгч Х.Мандахбаяртай шууд холбогдож байна.
Х.Мандахбаярын хувьд бусдаас ёс зүй нэхдэг мөртлөө өөрт нь ёс зүйн үнэрч байхгүй нэгэн аж. Түүний “Эм Эн Би Си” ХХК-ийн Үйл ажиллагаа хариуцсан захирал Ж.Золбаттай ярьж буй бичлэгийг ЭНД ДАРЖ сонсоод ямар ёс зүйтэй хүн бэ гэдгийг нь мэдэж болно.
Ийм хүн сэтгүүлчдийн байгууллагыг удирдаж яваа нь үнэхээр харамсалтай. Мөн түүнийг ёс зүйн алдаатайгаас гадна салбарынхаа сэтгүүлч найруулагчдын уран бүтээлийг өмчилж, оюуны хулгай хийж явдаг нэгэн гэдэг нь “Хатуу сурвалжлага” багийн найруулагч Б.Мөнхтөрийн ярианаас анзаарагдлаа.
Тодруулбал, Б.Мөнхтөр “Миний бие “Тосон бумбын нулимс” нэртэй цуврал нэвтрүүлгийг хийсэн байхад Х.Мандахбаяр өөрөө хийсэн мэтээр ярьж яваа нь оюуны өмчийн хулгай юм” гэж хэвлэлийн хурлын үеэр мэдэгдсэн юм. Эндээс МСНЭ-ийн Ерөнхийлөгч Х.Мандахбаяр асуух хэдэн асуулт гарч ирж байна.
– Та хаагуур юу хийгээд явна вэ?
-Бусдаас ёс зүйг нэхдэг атлаа та өөрөө “Эм Эн Би Си” ХХК-ийн ажилтанг утсаар дарамталж байгаа нь ёс зүй мөн үү?
-Тантай хамт ажиллаж байсан найруулагчийнхаа бүтээлийг өөрийн мэт тайлбарлаж яваа чинь оюуны хулгай биш үү?
-Өөрийн ёс зүйгүй үйлдлээ хаацайлахын тулд одоогийн удирдаж буй хэвлэл мэдээллийн байгууллагуудаа татан оруулж, ёс зүйн зөрчил гаргуулах нь шударга ёс МӨН үү?
