Есөн сарын турш үргэлжилсэн Европын хөлбөмбөгийн УЕФА буюу Европа лигийн шигшээ тоглолт Азербайжан улсын Олимпийн цэнгэлдэх хүрээлэнд боллоо. Шигшээ тоглолтонд Английн хоёр баг болох “Арсенал”, “Чельси” багууд шалгаран үлдсэн бөгөөд хоёулаа Европа лигийн шигшээ тоглолтонд анх удаагаа таарч байгаа юм.
“Чельси” баг 2013 онд УЕФА-гийн цомыг өргөж байсан бол, “Арсенал” баг 2000 онд шигшээ тоглолтонд шалгаран үлдсэн хэдий ч Туркийн “Галатасарай” багт хожигдон цомгүй үлдэж байсан билээ.
Тоглолт харьцангуй зөөлөн эхэлсэн бөгөөд эхний үед аль аль нь гоол оруулж чадалгүй дуусгасан. Харин завсарлагааны дараа багуудын довтолгоонууд ширүүсч, Чельсигийн О.Жиру өөрт ирсэн бөмбөгийг мөргөн өөрийн хуучин багийн хаалганд эхний гоолыг оруулсан юм. Энэхүү гоолыг оруулснаас 10 минутын дараа Педро эсрэг багийн хаалгыг мялааж, багийнхаа тэргүүллийг баталгаажуулсан байна. Үүнээс хойш Чельсигийн довтолгоо улам ширүүсч Э.Азар өөрт оногдсон 11 метрийн цохилтыг амжилттай гүйцэтгэн улмаар 72 дахь минутанд өөрийн хоёр дахь гоолоо оруулжээ. Харин эсрэг баг болох Арсеналын нэр төрийн ганц гоолыг А.Ивоби 16 метрийн гаднаас хийсэн юм.
Ийнхүү Европа лигийн шигшээ тоглолтонд тус бүр хоёр дахь удаагаа шалгарахад “Чельси” хоёр түрүү хүртэж, “Арсенал” хоёр удаа хожигдол амслаа.
