Л.Оюун-Эрдэнэ: Нүүрээ эргүүлээд худлаа яриад байгаа энэ ах нарыг монголын төрөөс цэвэрлэх юмсан

ЗГХЭГ-ын дарга Л.Оюун-Эрдэнэ Засгийн газрын яамдын гадаа АН-аас зохион байгуулалттайгаар хийж буй жагсаалуудын талаар байр сууриа илэрхийлсэн юм.
Засгийн газрын яамдын сайд нарт хариуцлага тооцох уу? Сүүлийн үед бараг яам болгоны гадна жагсаалтай өдрүүд үргэлжилж хариуцлага нэхээд байна?
Аливаа асуудалд хариуцлага бол яригдах ёстой зүйл. Гэхдээ эдгээр жагсаалууд ямар зорилгоор, хэний даалгавраар хийгдэж байгаа нь олон нийтэд ил болсон асуудал. АН-ын удирдлагын аппарат тэр чигтээ яамдын гадна жагсаж байгаа. Хамгийн гол нь шаардаж байгаа асуудлуудыг шалгаад үзэхээр АН-аасаа угшилтай асуудлууд байгаа юм. Жишээ нь, тэр ГХЯ, дипломатуудтай холбоотой асуудал. Анх тэр хүн хэзээ томилогдсон бэ гээд хөөгөөд үзэхээр АН-ынхны, Ц.Элбэгдоржийн хамааралтай хүмүүс байдаг. 1,2 сая еврогийн авлигалын асуудлыг бас хөөгөөд үзэхээр АН-н гишүүн, дэд сайд асан О.Эрдэнэбулганы л асуудал. Ер нь бол өөрсдийнх нь хийсэн энэ замбараагүй авлигалыг л цэгцлэх гэж явж байна шүү дээ. Энэ бүгд нь бутарч дэлбэрч гарч ирж байгаад миний хувьд баяртай байгаа. Цаашид энэ их авлигалууд нь цэгцлэгдэх, эмх цэгцэндээ орох асуудал одоо сөхөгдөж байна. Энэ дипломатуудын асуудал нь өөрөө Ц.Элбэгдорж гэж хүний л хийсэн ажил.
Шүүхийг хүнд байдалд оруулсан асуудал нь Ц.Элбэгдорж МУИС-ийн хэдэн багш нарыг авлигал өгч аваачиж, хамтдаа нүүрсний наймаа руу орж асуудлыг ийм дээр нь хүргэсэн. Одоо энэ авлигалын сүлжээ, гаж систем бий болгосоноо юунд нь нялзаах гээд байгаа юм. Өөрсдөөсөө асуух хэрэгтэй. Гэхдээ энэ бол бурууг хаацайлж байгаа зүйл биш. Шат шатандаа хариуцлага тооцоод явах ёстой. АН-ынхны хувьд эдийн засгийг сэргээх, Эрдэнэтийн 49 хувийг шийдээч гэдэг лоозон барих эрхгүй. Тэгвэл Д.Эрдэнэбат, С.Эрдэнэ нар өөрсдөө шоронд орох ёстой шүү дээ. Шууд их хурлын гишүүнээсээ татгалзаад явах ёс зүйтэй байх хэрэгтэй. Миний бухимдаад байгаа зүйл ард түмнийг цагаан цаас гэж боддогоо болиоч. Цагаан дээр хараар бичигдсэн зүйлийг ямар ч нүүрний хувирал байхгүй зуун хувь нүүрээ эргүүлээд худлаа яриад байгаа энэ ах нарыг монголын төрөөс цэвэрлэх юмсан гэж бодож байна.