Өршөөлийн хуулийн “нөгөө” тал

Өршөөлийн тухай
хуулийг УИХ-ын гишүүн Ц.Оюунбаатар/Шадар сайд болсон/ намын даргадаа зориулж
санаачилсан гэж ойлгогдоод байгаа. Гэвч нөгөө талаас энэ хууль нь Н.Энхбаяраар нүүрээ
тагласан АН-ынхны захиалгын хууль гэх юм.

 

Тиймээс ч анх орж
ирсэн хуулийн төслийг ногоон гэрлээр баталчихсан байх талтай. Эхний санал
хураалт нууцаар явагдсан учраас хэн хэн \”yes” товчийг дарж дэмжсэн бэ гэдэг нь нуугдаад үлдсэн. Харин
Ерөнхийлөгчийн хоригийг хэлэлцэх үеэр бүгд түмний нүдэн дээр байсан тул өмнөх
саналаасаа буцсан байх магадлалтай.

Энэ талаар УИХ-ын
гишүүн Ц.Оюунгэрэл УИХ-ын ээлжит бус чуулганаар Ерөнхийлөгчийн хоригийг
хэлэлцэх үеэр \”Энэ хуулийг батлахад нууцаар санал хурааж, бид олонхиороо
дэмжсэн. Олон хүн дэмжсэн шүү дээ. Нууц санал хураалт байсан болохоор олон
хүний санал нуугдаад үлдсэн. Харин энэ удаад бүгд зүсээ хувиргаж санал өгөх нь.
Би зүсээ өөрчлөхгүй. 30 жилийн дараа дэлгэгдэх нууц санал хураалтын дүн
өнөөдрийн саналтай адилхан байх ёстой. Би нууц санал хураалтаар хүнд
таалагдахгүй шийдвэр гаргасан бол өнөөдөр ч гаргалцана. Хүмүүст таалагдахын тулд
хоригийг хүлээж авна гэхгүй” гэж мэдэгдсэн юм.

Эндээс УИХ-ын ихэнх
гишүүд нууцаар санал хураахаар Өршөөлийн хуулийг дэмжээд, ил санал хураахаар
дэмжихгүй байна гэж харагдаж байна. Үүнийг ердөө та бидэнд таалагдах гэсэн \”улс
төрийн шоу” гэж нэрлэдэг.

АН-д ч тэр, МАН-д ч
тэр Өршөөлийн хууль хамрагдчих хүсэлтэй гишүүд цөөнгүй байгаа гэдгийг эх
сурвалжууд хэлж байна. Гэвч \”би хамрагдмаар байна…” гээд хэлчих \”чин зоригтон”
даанч алга. Тиймээс нэгэнтээ яллагдчихсан Н.Энхбаярыг урдаа түрээд ард нь
нуугдах санаатайгаар хориг тавигдсан хуулийг яг хэвээр нь буцаагаад УИХ-д өргөн
барихаар зүтгүүлж байна.

Уг нь Авлигатай
тэмцэх газар 100 хүний нэрийг тодорхой мэдээлчихвэл энэ асуудал цэгцэрнэ. Гэвч
улс төрчдийн бие биенээ барьцаалах гол хэрэглүүр учраас тийм ч амар
дэлгэгдэхгүй болов уу. Яахав АТГ-аас өмнө нь хэвлэлээр баахан бичигдсэн
болохоор Ё.Отгонбаяр, Л.Болд нарын нэрийг зарлаж \”дүр үзүүлсэн” байх. Түүнээсхэзээ ч зарлахгүй. Харин хоёр гишүүний хувьд зарлал гарсны дараа хэрхэн тайлбар
хийхээ аль эрт бэлдчихсэн байсан хэрэг.

Мөн зарим гишүүд
АТГ-ыг шахаж, 100 хүний нэрийг зарлахыг шаардаж байгаа царай гаргаж байгаа ч
цаагуураа зарлаж болохгүй шүү гээд тохирчихсон ч байхыг үгүйсгэхгүй. Өөрөөр
хэлбэл бидэнд, ард түмэнд \”гоё” харагдчихаад цаагуураа юу ч хэлж, тохиролцсон
байх боломжтой. Цаашид энэ тоглолт хэрхэн өрнөхийг хэлж
мэдэхгүй юм. Гэхдээ л өршөөлийн хууль нөгөө талын хүчээр батлагдаж, \”олонхийн”
зоо тэнийх нь.

А.Аюуш